مفاجأة: ممكن تهرب من الواتساب!

عمرو موسى

 

أكيد واتساب بقى بالنسبة لنا شيء أساسي في حياتنا وبيوفر علينا كتير من الوقت والمجهود. لو عايز حاجة من أي حد ممكن في ثانية تقولها له، بيساعدك في نقل الصور والملفات بسرعة، لو رايح لحد وتايه ممكن تطلب من اللي رايح له يعمل لك Share Location، وطبعًا الجروبز اللي عليه بتساعد كتير مع الشغل والصحاب لو بتتكلم في حاجة مع عدد من الناس مش واحد بس

بس بيجي علينا وقت بنبقى عايزين نهرب من واتساب علشان هو أكتر وسيلة متاحة لكل الناس فساعات بتبقى عايز ما تبقاش متاح إجتماعيًا وتنعزل أو ممكن يبقى واقع لأسباب تكنيكية، ولذلك فيه برامج كتير شبه واتساب، ويمكن أحسن منه كمان وفيهم مميزات زيادة بس واتساب أشهر علشان أقدم وأسهل في الاستخدام. هعرض أشهر البرامج دي ومميزاتهم الزيادة عن واتساب.

Viber

Viber-logo.png

يعتبر تاني أشهر برنامج محادثة بعد واتساب عشان بينفع تعمل منه مكالمات ببلاش، بس ناس كتير ساعات بتنسى إن ينفع تعمل من خلاله chat عادي.

Facebook Messenger

facebook-messenger.png

فيسبوك من فترة فصلت Facebook Messenger عن برنامج الفيسبوك العادي علي الموبايل لإنها عايزاه يبقى بديل للواتساب، بتقدر من خلاله توصل لكل صحابك اللي علي فيسبوك وتعرف مين فيهم Active ومين لأ.

Telegram

telegram.png

برنامج طالع بقوة على الساحة في الفترة الأخيرة علشان موضوع الحماية والأمان والتشفير وإن محدش يقدر يراقبك ويشوف الكلام اللي بتكتبه إلِا الشخص اللي انت باعت له. موضوع التشفير ده الناس برا بتاخد بالها منه وبتهتم بيه كويس أوي حتي لو ناس عادية يعني زينا مبيقولوش أسرار وهما بيعملوا Chat

ميزة كمان في Telegram إن موضوع الجروبز فيه أكثر تنظيمًا من واتساب لأن أدمن الجروب هو اللي بيتيح مين ممكن يتكلم ومين لأ ودة بيحسّن الدنيا شوية لو جروب شغل مثلا وفيه ناس كتير

كمان بيبقى فيه Public Groups ممكن تدخل فيها، حاجة كدة زي ال ICQ لو انت قديم وعارفه بس أكثر تقدمًا وتنظيمًا طبعًا.

BBM

BBM.png

أيوا هو الـBBM اللي كان أشهر حاجة من كام سنة. آه خلاص مابقاش مشهور زي زمان بس هو لسه موجود. وكمان بقى موجود علي كل الموبايلات من بلاكبيري بس. ولسه بينفع تعمل Add عن طريق الـPin وده بيوفر شوية خصوصية وحرية في اختيار مين تبقى متاح له ومين لأ، غير الواتساب اللي بمجرد إنه عندك، بتتجاب منه على طول. 

Hangouts

Hangouts.png

هو برنامج تبع Google بيبقى موجود علي الموبايلات الـAndroid وممكن ينزل علي أي موبايل تاني عادي. له ميزتين مهمين؛ الأولى: إنه بيظهِر لك الرسايل اللي جت لك علي موبايلك زائد الـChat العادي, وده ممكن يكون لبعض الناس أحسن إن كله يبقى في مكان واحد. التانية: إن ممكن تعمل مكالمة فيديو بين كذا شخص مش إتنين بس, عن طريق الموبايل أو الكمبيوتر.


شارك هذا المقال: