أغرب المطاعم في العالم

عمرو موسى

 

الاستمتاع بالأكل مش بيبقى بس في طعمه، بتاكل مع مين وفين بيفرق جامد في نفسية الواحد وهوا بياكل، يعني مثلًا كام مرة استمتعت بفطار من على عربية فول أكتر من 100 عزومة ملوكي، ولا عشوة باليل مع الصحاب بعد الشغل في مطعم أي كلام ولا علي عربية كبدة، عشان كده المطاعم في العالم مش بتتنافس بس في جودة الطعم، وفيه بعض المطاعم بتحاول ماتبقاش تقليدية وتبقي مبدعة سواء في شكل المكان أو تقاليده اللي ساعات بتبقي مختلفة، غريبة...أو مقرفة!   

 

مطعم النينجا- أمريكا

ninja-resturant.jpg 

كل اللي شغالين في المطعم اللي الفرع الرئيسي بتاعه في نيويورك بيبقوا لابسين لبس النينجا الأسود وبيعملوا حركات النينجا القتالية وهما بيقدموا الأكل عشان يحسسوك إنك قاعد في فيلم من أفلام النينجا.

 

غدا في السما- كندا

sky-resturant.jpg 

الموضوع ابتدى من كام سنة والفكرة عجبت الناس وانتشر في كذا مدينة أشهرهم مونتريال في كندا، كل الحكاية إنك بتطلع تاكل على إرتفاع 50 متر من الأرض وبعد أما تخلص وجبتك تنزل تاني، السؤال هنا لو الشوكة وقعت، أعمل إيه؟

 غدًا في الضلمة- كندا

dark-resturant.jpg

صاحب المطعم طول عمره بيحس إن الإستمتاع بأي حاجة بيبقى أحسن في الضلمة، لإنك بتبقي مركز في اللي انت بتعمله وبس، علشان كده قرر يفتح مطعم فكرته إنك بتدخل تاكل في ظلام تام، الموبايلات والساعات وأي حاجة بتنور حتي لو ضوء خفيف ممنوعة، بتروح المطعم تطلب الأكل بعد كده واحد من اللي شاغلين بيدخلك في أوضة ضلمة تمامًا، ويشرحلك فين كل حاجة علي الترابيزة علشان انت مابتبقاش شايف حاجة، بعد كده يسيبك تقعد تاكل لمدة ساعتين في ظلام تام.

 

غدًا في التواليت- الصين

ice-cream-WC.jpg 

مش عارف هل فعلًا فيه حد يقدر يعمل كده؟ أو السؤال بطريقة تانية هو ليه أصلًا حد مجبر يعمل في نفسه كده ويتغدا في طبق علي شكل قاعدة كابينيه، مؤسس المطعم بيقول إنه قرر يقدم الأكل بالطريقة دي علشان فكرة إنه يفتح مطعم جاتله وهوا قاعد على قاعدة  كابينيه.

 

الغريب إن المطعم لما بدأ كان بيقدم آيس كريم بس، بعد كده لما لقى الإقبال على المطعم كبير قرر يقدم منيو كاملة!


مطعم الروبوتات 

المطعم يعتبر دعاية لشركة يابانية بتصنع روبوتات وفكرته إن الوجبة بتتعمل كلها بإستخدام روبوتات حديثة ومعقدة جدًا من غير أي تدخل من الطباخين، السؤال هنا يا تري إيه نظام نفسهم في الأكل؟


شارك هذا المقال: