قصات شعر لا تنسى!

شريف زكي

زي ما في لعيبة كرة معروفين بشكلهم وبمهارتهم، في لعيبة كرة معروفين بقصات شعرهم . على مدار التاريخ في تقاليع وقصات شعر عمرنا ما حننساها، في حاجات بنحبها وقلدناها وحاجات اتريقنا عليها وحاجات لحد دلوقتي محدش فاهمها . تعالوا مع بعض نشوف أقوى 10 قصات وتقاليع شعر وستايل في تاريخ اللعبة :

" سير " " بوبي شارلتون ":

" بوبي " يعتبر أعظم لعيب في تاريج انجلترا ونادي " مانشستر يونايتد ". حصل على لقب كأس العالم سنة 1966 ، " بوبي " كان لعيب رهيب وشعره كان حكاية . الراجل كان طول عمره أقرع بس كان عنده الحتة اللي عالشمال أطول من اليمين، فكان بيلمهم كلهم على ناحية واحدة . الستايل ده اسمه " comb over " اللي هوه تجيب شعرك كله بالمشط على ناحية واحدة، زي كده رئيس الجزائر المُعمر " عبد العزيز بو تفليقة ".

bobby2.jpg

مصدر الصورة : https://goo.gl/iKYjVc

" فريدي ليونبرج ":

واحد من الجيل الذهبي لفريق " الأرسنال " في اوائل الألفينات . " فريدي " معروف انه موديل " كلوتات " للماركة العالمية " كالڤن كلاين " أو زي ما الشباب بتحب تقول " سي كاْي " ، بس لعشاق الكرة، " فريدي " معروف بشعره عشان كان بيصبغه " بينك " من النص لأنه بيلعب لنادي " الأرسنال " ، ووقتها العيال الصغيرة من مشجعين النادي كانه بيعمله شعرهم زيه . و اكيد طبعاً مينفعش ننسى كابتن ابراهيم السعيد لما احترف في نادي " ايفرتون " وقتها، حب يقلده وعمل شعره من النص أحمر، بس النادي عاقبه، عشان اللون الأحمر كان لون فريق " ليفربول " العدو اللدود للنادي .

freddie-ljungberg.jpg

مصدر الصورة : https://goo.gl/tdKnPk

منتخب روومانيا في كأس العالم 1998:

فرقة رومانيا نزلت قدام تونس في اخر ماتش في المجموعة وهما صابغين شعرهم باللون الأصفر تيمناً بلون العلم بتاع بلدهم . العالم كله كان مبهور بالحركة ده وكذا فرقة قلدتهم بعد كده والموضوع بقى موضة، حتى مغني " الراب " " ايمينيم " كمان قلدهم .

romanian-team-1998.jpeg

Source : https://goo.gl/WRvKii

" رونالدو ":
طبعاً الجيل الصغير أو البنات حيفتكروا اني بتكلم عن " رونالدو " بتاع " ريال مدريد " ، بس أنا قصدي على " رونالدو " البرازيلي اللي برده بيلعب في " الريال " واللي البعض بيعتبره ( ومنهم العبد لله ) انه اعظم مهاجم في تاريخ الكرة . " رونالدو " طول عمره بيحلق " زيرو " وبسببه أنا والجيل بتاعي ابتدينا نحلق شعرنا بالموس، وحتى التوأم حسام وابراهيم قلدوه . المهم في كأس العالم 2002 ، " رونالدو " كان شعره خفيف مش " زيرو " ، وفجأة في دور التمانية فاجئ العالم كله بقصة جديدة وغريبة . " رونالدو " ساب حتة من شعره اللي قدام وحلق الباقي " زيرو ". لما الناس سألوه بعد الماتش ايه هو السبب ورا الحلقة ده، قال ان ابنه في الماتش اللي فات لما البرازيل كسبت، راح عند التليفزيون و قام " بايس " " روبرتو كارلوس " وقال " داااادي " ، وعشان كده " رونالدو " قرر انه لازم يعمل قصة مختلفة .

ronaldo.jpg

مصدر الصورة : https://goo.gl/F8cEzJ

 

" روبرتو باجيو ":
عندليب الكرة الإيطيالية والسبب ان جيل التمانينات كله قرر يعمل " بوني تايل " و " سكسوكة " ( أو " دوجلاس " على رأي الحلاق بتاعي ). " باجيو " كان حكاية مش حتتكرر تاني في الكرة، وأحلى حاجة انه فضل بال " بوني تايل " و " السكسوكة " لحد ماعتزل وشعره ابيّض .

roberto-baggio-old.jpeg

مصدر الصورة : https://goo.gl/oq9Bef 

" تاريبو وست ":
طبعاً اللعيب ده بالذات معروف عندنا عشان أفريقي ( من نيجيريا بالتحديد ) وكان ليه مواقف مع لعيبتنا في ماتشات أفريقيا . " وست " كان مدافع تعبان على قده، بس كان مميز بقصة شعره . كان بيحلق " زلابطه " وعامل " دفاير " من النص، وملونهم بألوان الفرقة اللي بيلعبلها، شوية أخضر وساعات أزرق، الخ .. وكانوا مسميّينه "funky shoelaces" يعني رباط الجزمه المزهزه .

taribo-west.jpeg

مصدر الصورة : https://goo.gl/swy73c

 

" كارلوس فالديراما ":
أحسن لعيب في تاريخ كولومبيا وواحد من أحسن 120 لعيب في تاريخ الكرة ( على حسب تصنيف " بيليه "). " فالديراما " كان لعيب نص رهيب، بس اللي كان بيميّزه حاجتين، " الباسات " الصغيرة بتاعته وشعره اللي كان يعتبر النوع التاني من " الأفرو " ، وكانوا مسميّينه "rainforest" يعني الغابة الإستوائية .

carlos-valderrama.jpeg

مصدر الصورة : https://goo.gl/9HHQbe

" آبل زافير ":
مدافع برتغالي، ظهر لفترة قصيرة وكان عزه في بطولة " يورو 2000" وكان السبب ساعتها ان البرتغال متوصلش النهائي بعد ماتسبب في " بنالتي " في آخر 5 دقايق قدام فرنسا وطبعاً " زيدان " حطها وفرنسا راحت النهائي واخدت البطولة بعد كده . " زافير " كان عامل تقليعة غريبة، عشان هو لونه اسمر برونزي وكان صابغ شعره ودقنه باللون الذهبي الفاقع .

apel-xavier.jpeg

مصدر الصورة : https://goo.gl/PJtfos 

" كريس وادل ":
جناح انجلترا الطاير في التمانينات، وكمان كان بيحب يغني وعمل البوم كسر الدنيا ساعتها . " كريس " كان عليه قصة شعر مش مفهومة، شعره كان خشن وناعم في نفس ذات الوقت، حاجة " موزومبليكس " عالآخر .

Chris-waddle.jpg

مصدر الصورة : https://goo.gl/IgUqdG

" جبريل سيسيه ":
" سيسيه " كان كل أسبوع لازم شعره يكون لون مختلف وفيه رسومات وأشكال مختلفة عن الأسبوع اللي قبله . 

Djibril-Ciss-.jpg

مصدر الصورة : https://goo.gl/Vq8vft


شارك هذا المقال: