في مصر، فيه روابط مشجعين أندية أوروبية!

يوسف وائل

اللي فاكر إن الروابط عندنا عبارة عن ألتراس الأندية المصرية وبس، يبقى ناقصه معلومة مهمة. الموضوع أكبر من كده بكتير. مؤخرًا، طلعت ظاهرة روابط مشجعين أندية أوروبية في مصر. 

يعني إيه رابطة مشجعين نادي أوروبي بس في مصر؟

 يعني مجموعة مشجعين ومحبين للنادي اللي بيشجعوه قرروا يينشأوا نادي للجماهير علشان كل المشجعين اللي زيهم يتجمعوا ويتفرجوا على ماتشات بشكل رسمي ومنظم

membership_image2.png

بس طبعًا وجود رابطة مشجعين حاجة واعتمادها بشكل رسمي من النادي حاجة تانية خالص. بيبقى فيه شروط ومتطلبات كل نادي بيحطها علشان يتم إعتماد النادي في البلد اللي انت فيها. على سبيل المثال، من شروط "مانشستر يونيتيد" إن يبقى فيه أكتر من ٥٠ مصري عنده عضوية مصرية في النادي

إيه الفكرة إنه يكون معتمد؟ رابطة المشجعين لو معتمدة، النادي بيكون مُعترف بيها ولو الرابطة دي تقيلة، النادي ببساطة هيدلعها جامد. مثلًا، هيبعت اللعيبة القديمة أو سفير النادي للبلد دي ويظبطوا كل حدث يحصل مع اللعيبة ديه، ويتفرجوا على ماتش أو حتى يظبطوا يلعبوا ماتش مع بعض، برضه النادي هيبعت للرابطة تذكارات زي مثلًا تيشيرت ريترو ممضية من لعيب أسطوري أو تيشيرت الموسم الجديد ممضية من الفرقة كلها 

فيه في مصر روابط مشجعين لأندية أوروبية زي مانشستر يونيتيد، أرسنال، بايرين ميونخ، ليڤرپول، تشيلسيه، برسلونة، ريال مدريد. من بين دول كلهم، برسلونة وأرسنال هم اللي مش معتمدين بس برضه عاملين اسم وضجة كبيرة جدًا

رابطة مشجعين برسلونة في نهائي دوري أبطال أوروبا الموسم اللي فات عملوا إيڤينت ضخم هنا وبدأوا بدخلة زي الألتراس في الأستاد 

من أتقلهم برضه رابطة مشجعين مانشستر يونايتيد اللي مؤخرًا عاملين شغل جامد. في ماتش ضد الغريم المحلي ليڤرپول، نسقوا مع الراعي الرسمي للفريق شيفروليه وأتجمعوا في الشو رووم بتاعهم وحضر الإيفينت فوق الـ٢٠٠ واحد 


شارك هذا المقال: