الحريم مبتسترش .. حتي لو مرات رئيس جمهورية

عمرو موسى


أمريكا مهمة للعالم كله وطبيعي الناس كلها تبقي مهتمة بتفاصيل رئيسها القادم, والكلام اليومين دول عن الإنتخابات الرئاسية الأمريكية كتير خصوصا إنها خلاص كمان كام شهر, والناس كلها مركزة مع كل حاجة بيعملها المرشحين سواء دونالد ترامب أو هيلاري كلينتون وأي حد تبعهم من بعيد أو قريب, بس من الواضح إن ميلانيا ترامب مرات المرشح دونالد ترامب مكنتش واخدة بالها من الموضوع ده

ميلانيا ألقت خطاب في مؤتمر الحزب الجمهوري في ولاية أوهايو، الحزب اللي جوزها المرشح بتاعه في الإنتخابات, الخطاب كان بيتكلم عن مستقبل أمريكا وعن القيم الأخلاق وإن الناس لازم تشتغل بجد عشان امريكا تفضل بلد عظيمة وإحترام الناس ومعاملتهم بكل إحترام وأدمية وعدم التفرقة بين الناس وكل كلام الإنشا ده, لحد كده كله تمام ومفيش مشاكل

المشكلة إن الهانم طلعت سرقة أجزاء من الخطاب وقالتها زي ما هيا بالنص محاولتش تغير ترتيب الكلام حتي, يعني ده اللي بيسرق تويت ولا ستاتس من علي الفيسبوك الناس بتقفشه وبتحفل عليه للصبح, مش قادر أفهم هيا كانت بتفكر في إيه وهيا بتسرق خطاب بيشوفه ملايين, المشكلة الأكبر إن الأجزاء المسروقة دي طلعت من خطاب لميشيل أوباما مرات باراك أوباما الرئيس الحالي لأمريكا, يعني كمان لما جات تسرق قررت تسرق من مرات رئيس أمريكا, لو عايز تشوف الهبل علي أصوله شوف الفيديو اللي جاي ده

دونالد ترامب للي ميعرفهوش يعتبر توفيق عكاشة بتاع أمريكا, ومشهور بتصريحات كتير مجنونة وحركات هابلة متطلعش من واحد ممكن يكون في يوم من الأيام رئيس أكبر دولة في العالم, كمان مشهور بكرهه الجامد للعرب والمسملين, الأنيل بقي إن الراجل مبيحورش وبيقولها بكل صراحة من غير تزويق كلام, مع كل ده ليه مؤيدين كتير في أمريكا ومتوقع فعلا إن هو اللي هيكسب, ربنا يستر..


شارك هذا المقال: