خدت أجازتك؟ حجزت طيارتك؟

عمر القشاوي

بما إننا في أجازة نص السنة، أنا رأيي إن كل واحد لازم يعمل حاجة مفيدة في الأجازة دي. أوحش حاجة إن الواحد يبقى مالوش لازمة في الأجازة وإنه يبقى قاعد في البيت زي الدولاب بياكل وبيشرب وينام وبس. 

فيه حاجات كتير ممكن الواحد يعملها في وقت الفراع ده، بس لأن اللي طالع من امتحانات ومذاكرة بيبقى مش قادر حاجة مفيدة يبقى فيه التزام. فأحسن حاجة مفيدة تتعمل هي السفر. سافروا. سافروا وانتم صغيرين علشان ده أصح حاجة تتعمل في السن ده. السفر دايمًا له نتيجة إيجابية. وأدي شوية فوايد للسفر من وجهة نظري: 

بيغيّر منطورك للحياة

 إحنا عايشين في قوقعة صغيرة جدًا وقافلين على نفسنا بمفتاح. لما بتخرج من القوقعة وتسافر، بتشوف حاجات عمرك ما كنت هتشوفها لو فضلت في المكان اللي انت ارتبت وعشت فيه طول عمرك. أكيد الانترنت والشوشيال ميديا ساعدوا على إنك تعرف عن العالم، بس صدقني لما تسافر وتختبر الحاجات دي بنفسك، التجربة بتبقى مختلفة تمامًا. 

هتشوف الناس بطريقة تانية

مصر واحدة من البلاد اللي مفيش فيها جنسيات مختلفة كتير، فبتلاقي إن العادات والتقاليد دايمًا ثابتة حتى لو اختلفت الأديان. لما بتسافر، بتشوف ناس مختلفين عن بعض ومختلفين عنك، وهيبقى عادي تكوّن صداقات مع ناس مش بيتصرفوا ولا بيلبسوا شبهك. التعامل مع الاختلاف ده، هيعلمك تبقى جريء في التعامل مع الآخر وإنك ما تحكمش على غيرك بالمظهر زي ما إحنا متعودين هنا.

التخلص من الأنانية

هتعرف إن العالم ده مش بيدور حواليك انت وبس. الواحد مننا كل ما بيكبر، بياخد باله إنه يعرف حاجات قليلة أوي عن الحياة دي. 

الثقة إنك عارف كل حاجة دي بتيجي من معرفتك بالبلد اللي انت منها والناس اللي حواليك، ده طبيعي تبقى عارفه. بس لما تسافر وتشوف العالم، أكيد هتكتشف إن فيه حاجات كتيرة أوي في الدنيا دي انت ما تعرفهاش وإن الدنيا مش بتدور حواليك انت وصحابك وبابا وماما وبس. هتقابل ناس كتير وهتتعلم منهم حاجات جديدة وهتنمّي مهارات ماكنتش عارف إنها موجودة وهتكتسب مهارات جديدة من اللي حواليك. هتتعلم إزاي تيجي على نفسك وتتحدي نفسك لما تتحط في مواقف عمرك ما تخيلت إنك تتحط فيها.

بيقّوي الراجل

هتضطر تتصرف في مواقف لوحدك. تخيّل لو باسبورك ضاع؟ أو فلوسك خلصت؟ أو صاحبك يجرى له حاجة؟ أو حتى يا سيدي جالك دور برد. هتضطر ان انت بنفسك اللي تتعامل في الموقف ده. وحتى لو في المتع اللي بتحصل في السفر. عارف يعني تتتسلق جبل لأول مرة في حياتك؟ كل دي مواقف انت عمرك ما هتتحط فيها وانت قاعد هنا على القهوة أو بتلعب بلاي ستاشن.

هتقدر حياتك أكتر

عارف ظروف البلد كويس وعارف الوضع، بس لما تسافر بتلاقي ناس عايشة في رعب وتهديد الحروب ومش لاقين المايّة اللي إحنا بنقعد نضيّعها أو الشاب اللي طالع عينه علشان يقدر يعيش ويصرف على نفسه (لأننا مرفهين في الحتة دي)…فبترجع وتقدر الماية اللي بتشربها وإنك ممكن تمشي في الشارع بالليل متأخر من غير خوف وإن أهلك علي طول خايفين عليك وعايزينك جنبهم. أيًا كان إيه وضع البلد، دايمًا ترجع من السفر مقدر حاجة معينة حتى لو تافهة في العيشة هنا..حتى لو الشطّاف.

هتتطلع لحياة أفضل

زي ما مصر مقارنة بغيرها من البلاد فيها حاجات أحسن، هي طبعًا ولا حاجة بالنسبة لبلاد تانية متقدمة بمراحل عننا، يعني مثلًا لما تكون في أوروبا وتشوف الناس قد إيه متحضرين وقد إيه فيه ناس متعلمة كويس وعندها طموحات عالية للحياة، بترجع وانت عايز تتطبق اللي شفته هناك هنا.

 السفر هيخليك تبص لكل حاجة بواقعية وتفاؤل…هترجع وانت عايز تتغيّر وتغيّر وعند طاقة على الشغل ونفسك مفتوحة…المهم إنك ترجع بس!


شارك هذا المقال: