7 هدايا تثبت بيهم أى بنت .. وإستحمل رقم 4 معلش

شيماء عادل


الهدية..أى هدية هى الحل السحرى لأى حاجة سواء كانت مشكلة أو خناقة أو مناسبة أو حتى من غير أى سبب. حقيقى هى المفتاح إللى ممكن يفتحلك أى باب ويسهلك أى حاجة بشرط أنك تكون جايب الهدية دى فى الصميم وإنك تعرف تختار الهدية المناسبة للمرأة المناسبة ، وممكن إللى يسهل عليك مراحل إختيار الهدية إنك تستعين بحد قريب منها أختها أو صاحبتها مثلا .

presents-153926_960_720.png

لكن علشان نسهل عليك المهمة الرخمة دى، هنرسيك على كام أوبشن كده مستحيل أى بنت متكونش بتحب حاجة فيهم لأنهم بيعبروا من الثوابت والمقدسات عند البنات.

1- البرفان

1.jpg

طبعا مفيش بنت مش هتحتاج للبرفان فى أى وقت وأكيد كمان بتحب أنواع معينة وروايح معينة وأنت لو ركزت شوية هتلاقيها دايما بتحط نفس النوع مثلا أو أنواع متشابهة، فكل إللى عليك إنك تحاول تستنج هى بتحب أى نوع، الروايح القوية ولا الهادية، الحاجات إللى ليها روايح معينة زى

الفانيليا مثلا أو الشكولاتة أو جوز الهند وهكذا وساعتها مهمتك هتكون سهلة فى إنك تروح لأى محل وتطلب منهم حاجة فى الإطار دا. كمان لو لقطت البرفان بتاعها وعرفت إسمه دا هيكون أضمن وأسهل إنك تجبلها نفس النوع المفضل ليها بالظبط وتفاجئها بإنك عارف ومركز من غير ما تسأل

قال يعنى فاهم بقى فى حاجات البنات وكده.. المهم إنها هتفرح هتفرح وهيدخل مزاجها جدا. أما بقى لو إحتست خالص ومعرفتش تركز ولا تعرف هى بتحب إيه أو لو ملكش فى الفقع دا فممكن تروح تخبطلك أى برفان والسلام بس هنا لازم تقولها جملة من دول "أنا حابب أشم البرفان دا عليكى"

أو "حاسته أنتى أوى" حاجة زى كده هتسند معاك جامد وهتخلص الحوار فى ثوانى ومش بعيد كمان تلاقيها غيرت ذوقها علشانك.

2- الشوكولاتة

2.jpg


أكيد الأوبشن دا مفروغ منه ومش محتاجين نأكد عليه لأن مفيش حد مبيحبش الشوكولاتة سواء بنت أو ولد أو شايب حتى"إلا لو أنت حظك دكر" وحتى لو فى بنت ممكن تلاقيها مش بتحب الشوكولاته العادية مثلا فممكن تكون بتحب الشوكولاتة البيضة أو إللى بالكراميل أو بتحبها على هيئة حاجة

تانية زى الكب كيك مثلا أو تورتة أو موس أو كيك بوبس وهكذا. المهم إن سؤال الشوكولاتة دا من بدائيات أى علاقة و لازم تسأله فى الأول علشان تعرف ذوقها وتبقى ملكتها بقى على طول فى أى زنقة ولا حاجة تطلع بلوح الشوكولاتة. أهمية الأوبشن دا بتكمن "إسمحولى أقولكم تكمن فى نص

الكلام" فى إنه أوبشن سهل وسريع ومش مكلف خالص يعنى ممكن تظبطها ب 5 جنيه أو ب 200 جنيه أنت وظروفك بقى.

3- الإكسسوارات

3.jpg

المقصود بيها هو الدهب أو الفضة يعنى منحبذش أوى الإكسسوار بتاع ب2.5 دا لأنه بيقلل منك أنت شخصيا، صحيح ممكن تكون ظروفك صعبة فى وقت من الأوقات والإمكانيات متتحملش دهب أو فضة ودا مش عيب أبدا لكن ساعتها بلاش الأوبشن دا من أصله وممكن تخليك فى الإختيار إللى

قبله لأن أهم حاجة هى منظرك وإنك متبانش بخيل مثلا. وبالرغم من إن الناس بتفهم الأوبشن دا غلط أو إنه غالى ويوجع الجيب لكن دا مش صحيح لأن خصوصا فى الفضة هتلاقى حاجات كتير كويسة وبنت ناس فى أسعارها وبالذات فى الخواتم، يعنى ممكن تلاقى خاتم حلو فى حدود من 50

أو 60 جنيه مثلا ودا يعتبر رقم كويس على هدية قيمة وهتديك برستيج كده قدامها. أما لو عملت حاجة عمولة عليها إسمها مثلا أو جملة حلوة فممكن تبدأ من 120 او 150 على حسب كمية الحروف أو حجم الجملة.

4- الكريمات واللوشن

4.jpg

كمان دى من الهدايا المفرحة جدا وإللى تعجب أى بنت، شنطة العناية بالجسم والبشرة دى كنز من الكنوز إللى أى بنت بتحب تملكها وحتى لو مش هتقدر تجيب المجموعة كلها على بعض فممكن تجيب حاجة واحدة أو اتنين. الحاجات دى بتكون زى شاور جل بريحة بتحبها أو زيوت للجسم أو كريم

للوش واليد أو ماسك وصابون معين وحاجات زى كده كتير. الأوبشن دا فى حد ذاته يعتبر عااالم تانى خالص لو دخلت فيه لوحدك يمكن تتوه خصوصا لو ملكش فى الحوارات دى أوى علشان كده ننصحك إنك تروح المحل وتسأل هناك عن حاجة تكون فى حدود ميزانيتك وهم هيدلوك على كذا

إختيار تقدر تنقى منهم. ونصيحة كمان أجل دايما الهدية دى لوقت ال sale لأن المحلات المتخصصة فى الحاجات دى دايما بيجيلها فترات وتعمل عروض وهمية زى إنك تشترى 2 بسعر 1 أو خصومات 50% على الأسعار وكده، بس علشان تلعبها صح بقى أوعى تطلع الهدية فى الوقت دا

"سقعها زى تسقيع الأراضى كده" يعنى إشتريها وخليها عندك كام أسبوع ولا شهر ولا حاجة لحد ما الsale يخلص وتقوم طالع بالهدية ساعتها مش هتبان إنك استرخصت وجبتلها حاجة علشان عليها عرض وخلاص. كمان الأوبشن دا هيغنيك عن المكياج لأنه أحسن وأريح أقيم.

5- عزومة على العشاء

5.jpg

إلبسى علشان هنخرج..أو أنا عازمك إنهاردة، من أقوى الجمل إللى ممكن تسمعها أى بنت وتطير بيها من الفرحة. السبب ورا الجملة السحرية دى هو إنك بتبينلها حبك ليها بأقوى وأحلى طريقة وهو إنك عايز تكون معها دلوقتى وعايز تشوفها وتقضى الوقت معها. أما بالنسبة للعشا فدا لقدسية الوجبة

دى عند كل الناس وإنها بتعمل جو حلو كده وغريب. وبرده الأوبشن دا ممكن تخليه يتناسب مع ظروفك يعنى ممكن تكون عشوة ع النيل أو مطعم رومانسى أو رووف أوتيل شيك مع أضواء الشموع وممكن تقضيها ساندوتشات أو بيتزا او أى fast food وتأكد إنها هتكون مبسوطة فى حالة من

الحالات دى لأننا زى ما قولنا أهمية الهدية أو المفاجأة دى فى مضمونها نفسه بعيدا عن أى مظاهر وشكليات.

6- الورد

6.jpg

"عايزة ورد يا إبراهيم" الجملة إللى لخصت الحوار دا وبينت أهميته فى كام حرف. صحيح إن هند صبرى لما قالت الجملة دى كانت تقصد بيها حاجات كتير بتحتاجها البنت زى الإهتمام والحب والحنية والدلع لكن عظمة الجملة مكنتش هتبان لو قالت كل الكلام دا فإختارت إنها تلخص كل المعانى

دى فى حاجة بتظهر كل دا وهى "الورد". الورد بيعتبر أبسط وأوضح دليل تبين به للبنت إد إيه أنت بتحبها وبتفكر فيها وعايز تبسطها، حتى إن الورد بينفع جدا فى المراحل الأولى زى إنك تبين لواحدة إنك معجب بيها..بيبقى عامل كده زى جرس إنذار تدوق عليه فى أى وقت ولازم تلاقى إجابة

"سواء حلوة أو وحشة" لكن لازم إجابة لأنه بيبقى عامل كده زى إنك كشفت الستار عن مشاعرك كلها، حقيقة واضحة زى الشمس بدون لف و دوران.

7- اللبس

7.jpg

نقصد بيه هنا أى حاجة بتتلبس أو تتمسك، يعنى شنطة جزمة سكارف طرحة أى حاجة فى السكة دى، المهم إنك تعرف تختار أكتر حاجة هى بتحبها. يعنى مثلا فى بنات بتموت فى الشنط فهنا ممكن تجبلها شنطة حلوة وشيك أو شنطة لاب توب أو هاند باج لو بتسافر كتير وهكذا، وفى بنت تانية

بتحب دايما تلبس سكارف تكمل به لبسها فهنا الأحسن إنك تجبلها حاجة زى كده. كمان مهم تكون واخد بالك ومركز فى الستايل بتاعها يعنى لو هى من بنات باربى وبتحب اللون البينك والحاجات المحنتفة أوى أو لو هى بتحب الشياكة بزيادة وبرندات زى شانيل أو ممكن تكون رياضية وعملية

وبتحب تجيب من نايك مثلا، كل دا هيفرق فى شكل الهدية وهيفرق أوى معاها فمينفعش تجيب ستايل غلط لأنك ساعتها بدل ما المفروض إنك هتكون جايب هدية تفرحها هتلاقى ريأكشن تانى خالص.

كام نصيحة كده ع الماشى

-الألوان: حاول دايما وأنت بتجيب أى هدية تجبها باللون المفضل ليها، يعنى لو هتجيب شنطة أختار أكتر لون بتشوفها ماسكاه ولو هتجيب خاتم إختار الفص بأكتر لون بتحبه وهكذا.

fashion-643064_960_720.jpg


-الطريقة: إللى أهم من الشغل..تظبيط الشغل، علشان كده لازم تهتم بالطريقة إللى هتقدم بيها الهدية والشكل النهائى إللى هتطلع به لأنه مهم جدا ويمكن ميكنش أقل أهمية من الهدية نفسها. وعلشان نبسطلك الموضوع حاول دايما مع أى هدية تحط وردة أو كام شكولاتة صغيرة او بالونة هيليوم، الكام حاجة دول بيعتبروا من المكملات لأى هدية.


شارك هذا المقال: