إيه أحسن لفلوسك .. تحوش ولا تاخد قرض ؟

أحمد صلاح


" الاقتراض يسعدك اليوم ويرهقك غدا .. انما الادخار يرهقك اليوم ويسعدك فى الغد "

جملة قرتها من كام يوم كده ووقفت قدامها كتير .. لان الجمله دى فى الزمن دا اعتقد ممكن ماتكونشى صح لان فى متغيرات اقتصادية بتنفى الكلام دا وتعارضه تماما ..

قبل ما اقولكم ليه .. ياترى انت رأيك ايه فى الموضوع ده ؟ وهل انت من الناس اللى بتحب تحوش ولا من الناس اللى بتحب تقترض وكام حاجه دلوقتى انت بتمتلكها وبتسدد فى ديونها ؟

5679892ec36188e5308b45c3.jpg

طبعا زتونه الموضوع ده هتختلف من واحد للتانى اعتقد هيكون المعيار هو الدخل .. ولان دخول الناس مش واحده فبالتالى هيكون وجهه نظر كل واحد فى الموضوع دا مختلف هل مرتبك فيه باقى تقدر تحوشه ؟؟

بس برده مش ده هو المعيار الوحيد .. لان ممكن حد يقولى طيب انا اعرف ناس دخلها كويس اووى وبتقبض مبالغ محترمه ومديونه لشوشتها .. وفعلا دى حقيقه ممثلين ولعيبه كوره ورجال اعمال عايشين فى دواير قروض ومديونيات مابتنتهيش وده لاننا دايما متطلعين واحتياجاتنا كتييير ومش

بتخلص ونمط استهلاكنا عالى جدا

طيب فكرت فى يوم تعمل كريدت كارد ؟ ودا ابسط انواع القروض وبتكون غالبا لمصاريفك الصغيره .. اكيد جالك فى يوم من الايام مندوب من اى بنك او البنك اتصل بيك عشان يعرض عليك كارت كريدت الـ هو بتقدر تشترى بيه اى حاجه انت عايزها لحد مبلغ معين وبعد كده بتروح تسدد الـ انت

دفعته خلال 55 يوم .. ناس كتير ماتعرفشى ايه مكسب البنك من الموضوع دا ... وميعرفوش انهم عايزينك تفضل تستخدم الكارت بشكل كبير وساعتها مش هتقدر تسدد الفلوس للبنك ويقوم البنك حاطط عليك فوايد وبيكون هو دا مكسب البنك

unnamed-8-.jpg

بس برده ماعرفناش ايه افضل الاقتراض ولا الادخار؟

مؤيدين الادخار والتحويش هيقولو ان بدل ما اشترى مثلا عربية دلوقتى وازنق نفسى بقسطها وفوايدها الكتير انا ممكن احوش ليها الاول واشتريها فى الوقت المناسب

انما مؤيدين القروض هيقولك لا انا اشترى دلوقتى وادفع اقساط افضل بدل ما الاسعار بتزيد عليا وافضل احوش وفى الاخر ماشتريش الـ انا عايزه وهيا دى فعلا المتغيرات الاقتصاديه الـ احنا عايشينها وهو التضخم وارتفاع الاسعار المستمر ..

وفى ناس تقولك انا ولا هفضل احوش مع نفسى وولا هاخد قرض انا هدخل جمعيه ودا الـ بيكون مسك العصايه من النص

unnamed-4-.jpg

القروض بقت منتشره فى حياتنا بأشكال كتير سواء قروض عربيات او تسهيلات عقاريه او كريدت كارد او حتى سلفنى شكرا .. وللاسف فى دول كبيره وقعت بسبب الديون الـ عليها من كتر اقتراض الاشخاص زى اليونان مثلا ..

وفى النهاية نقول ان الاعتدال هو أهم شىء وانك لازم تعرف امكانياتك ودخلك قد ايه وهاتعرف تسدد اى ديون عليك ولا هاتغرق فى دوامه الديون الـ مالهاش أخر .


شارك هذا المقال: