دليلك للتعامل مع 10 قدرات خارقة للستات !

ساره وفير
شارك هذا المقال:

مختلفناش إن الست هي المخلوق اللي بتجمل و تحلي حاجات كتير في حياتنا؛ و عشان الحياة من غيرهم ملهاش لا طعم ولا لون .. فربنا اداها من وسع شوية قدرات خارقة للطبيعة تلون بيها الحياة محدش يقدر ينافسها فيها؛ و بما اننا بنكلم رجالة هنا فلازم حد ينوركم شوية عن القدرات و المهارات اللي عند كائن الأنثي تفتكروها كويس عشان يبقي دليل ليك عن فن و مهارات القتال في التعامل مع الجبهة الاخري و تبقي عارف ترسم خطة محبوكة تحوط عليها بيها.

435744_dreambox-sat-com.jpg

1- "جهاز كشف الكدب و الاستشعار عن بعد"

قدرة خيالية في شم ريحة الكدب و الاحساس بيه من قبل حتي ما انت تنطق بكلمة؛ جهاز مفيهوش اي مجال للخطأ مهما ان حصل. فقصر و لخص لو سألتك اي سؤال .. و افتكر هي مش بتسألك عشان تعرف الاجابة منك (لا يا حبيبي) هي عايزة توقعك في المصيدة و طبعا اجبتك بتبقي مصحوبة بالأدلة و البراهين الدقيقة الوصف.

arabstoday544.jpg


2- التتبع والترصد

طبعا اللي فوق ده بيصحبة قدرة علي التتبع و الترصد لكل حركاتك او خطواتك او تصرفاتك في و من جميع الاتجاهات احسن من جهاز الـFBI نفسه. فانت كدة كدة تحت المراقبة لو حطاك في دماغها – حاول تتقي شرها و متحطش نفسك في مستوي الشبهات تجنبا و احتسابا لمبدأ "عليك مراقبة".

banat-6-.jpg

3- موهبة التمثيل..

دي حاجة تلقائية مولودة بيها. تمثيل في افتعال و فبركة مشاعرها و ردود أفعالها علي حسب مزاجها؛ و طبعا تحت اي ضغط عمرك ما هتعرف الحقيقة غير لو هي عايزة تعرفهالك.. طبعا المقدرة دي بيندرج تحتها السهوكة و الرقة علي جميع المستويات.

957.jpg

4- النكد

او ممكن نسميها "بركان الغضب" – تقلبات مزاجية حادة و نوبات صرع بدون سابق إنذار (اللهم احفظنا).
لو جاتلها النوبة و حبت تقلب الترابيزة عليك مش هتشوف خير أبدا و مفيش حاجة هترحمك؛ فتعامل بحرص شديد خصوصا في ايام معينة من الشهر مع الأخذ في الاعتبار التركيز الشديد في اي كلمة طالعة من بقك.

772016-071354AM.jpg

5- شخصية مكس .. كل حاجة و عكسها.

بمعني هتلاقيها واقفالك في المطبخ زي امنا الغولة (طبعا انسي مشهد انها لابسة القميص بتاعك و واقفة تطبخلك بيه زي اللي بتشوفه في حتت تانية) و في نفس الوقت هتلاقيها نازلة معاك اي فرح او خروجة شيك بمنتهي اناقتها و شياكتها؛ كأنها اتبدلت بواحدة تانية. جبـــــارة

Banat_Superman_EP16.jpg

6- الثرثرة

في اي حاجة و طبعا فاهمة و عارفة في كل حاجة. سياسة تلاقي خبيرة و اقتصادية محنكة؛ فنون قتالية تلاقي؛ موضة تلاقي؛ تحضير أرواح و سحر موجود طبعا؛ علوم فلك و ما وراء الطبيعة بروفيسيرة؛ أجتماعيات خبرة - و طبعا اوعي تعارضها عشان متفتحش علي نفسك النار. استني لما تنام و قول رأيك..

9364_banat-superman-762016.jpg

7- الفضول

طبعا الثرثرة بتنمي عندها قدرة "الفضول" – هي كأنثي متقدرش تعيش من غير فضول لاي حاحة في اي حاجة و عن اي حاجة ، مرجع قيم ذو خبرة خصوصا عن العلاقات الانسانية ، طبعا الفضول ده ممكن يموتها فعشان كدة هتلاقيها عندها خبرة لا بأس بها في السحر و الشعوذة عشان تعرف توصل لغرضها.

Banat_Superman_EP8.jpg

8- جهاز بث

جهاز لبث أشارات و نظرات و موجات دقيقة في معاينة اي شئ قدامها من جماد لحيوان لانسان من غير ما تفتح بقها النونو بكلمة واحدة؛ و طبعا بيبقي مكشوف عنها الحجاب في معرفة علم الغيب لأي شئ غير مرئي بالنسبالك. انسي اي منافسة من اي نوع في المقدرة دي عشان محدش هيقدر يفهمها او ينافسها او يتواصل معاها غير انثي زيها.

fa1109b64e1445f.jpg

9- الذاكرة الحديدية

متجادلهاش و متحاورهاش و متناقشهاش في اي حاجة ليها علاقة "بالذاكرة" متعلقة بيك. هي عارفة بالتواريخ و الدقايق و الأرقام مين كلمتك و سلمت عليك امتي و فين و الساعة كام. ذاكرة من حديد لادق التفاصيل عمرها ماتتنسي مهما ان عفا عليها الزمن. و في كل مرة تفتكر انه موضوع عدي و فات انسي .. دي هتقلب في القديم و الجديد و هتفكرك و تجيب ناس تفكرك.

1-yusra-lawzi-1-06-05-2016.jpg

10 - الفصال

اخر حاجة "الفصال" من الهوايات المفضلة علي الإطلاق لدي النساء من جميع الاعمار و الاشكال و الألوان. و من عجايب الزمن و القدر ان الفصال عند الانثي مش بيبقي من منطلق الفصال الوسطي الجميل.. لأ.. دي هتفاصل لأخر نفس فيها.. و بعد كدة عادي هتلاقيها بتكسر نفس اللي قدامها و تجيب مناخيره الارض وهتسيب الحاجة و تمشي بمنتهي الثقة و الفخر و هي رافعة راسها لفوق و بتقول لنفسها "مايقدر علي القدرة غير ربنا".

1532075002ac7ad649e9550d330be3194642309a55.png

جبارة ولله... مفيش اي مجال للخطأ او التفاوض في اي قدرة من دول .. و عمرك ما هتقدر تنافسها.. كل اللي تقدر تعمله انك تعد تتفرج عليها في صمت و تقول بينك و بين نفسك "حسبي الله و نعم الوكيل".

تحطها علي اي ناحية أو تظبطها علي اي موود هتلاقيها شغالة و دايسة و عارفة و جايبة معاك في اي حاجة – "مدرسة"

ياعيني عليك ايها الكائن الذكر الغلبان .. لا حول ليك ولا قوة. فخلي بالك بقه - بس عزائي الوحيد ليك  "ان كيدهن عظيم"