بعد كل الأيام دى .. إكتشف غلطتك ع السحور !

أحمد صلاح

اكتر وجبه بنهتم بيها فى رمضان هيا السحور .. بس مش اى اكل هتاكله فى السحور هيخليك تانى يوم شبعان ومش عطشان .. لان الموضوع دا بيختلف على حسب الاكل اللى انت بتاكله , وكتير مننا فاكر انه لما يملى بطنه على الاخر ويفضل يشرب مايه قبل الفجر يبقى هو دا الصح ..
تعالو نعرفكم على اهم الحاجات اللى لازم تكون على سحورك عشان تفضل وحش وانت فى شغلك


الالياف


لازم تدور على الاكل اللى فيه الياف كتير .. لان الالياف هاتحسسك بالشبع اوى تانى يوم
زى ايه ؟ عندك العيش الاسود والشوفان والشعير وهتلاقيها فى الفاكهه زى التفاح والخوخ


الفاكهه المجففه


الموجوده فى ياميش رمضان زى الاراسيا , والمشمشية والتين وبتكون فيها عناصر غذائيه كويسه اوى للصحه من المعادن والفيتامينات


بذر الكتان


بذر الكتان معروف بالنسبه للناس اللى بتعمل ريجيم لانه بيخليك شبعان دايما .. عشان كدا ممكن تجيب كوبايه لبن رايب وتحط فيها شويه بذر كتان
  انما بقه موضوع العطش دا احسن حاجه تعملها وبينصح بيها كل خبراء التغذيه .. انك لازم من بعد الفطار تبدأ تشرب مايه لغايه السحور بشكل تدريجى كل ساعه من كوبايه لكوبايتين مايه .. وبلاش قبل الفجر تفضل تشرب مايه كتير لان الكلى عندنا بتطرد المايه اللى بتدخلها بشكل مفاجىء فى وقت قصير .. وطبعا لازم تقلل من الملح فى السحور وماتنساش الزبادى


شارك هذا المقال: