18 درس تتعلمهم من ستيف جوبز لما تقدم أفكارك

أحمد سامي


طريقة عرضك لأفكارك أهم من أفكارك نفسها وستيف جوبز، مؤسس شركة أبل، كان واحد من أعظم الـ Presenters في التاريخ، فيه Presentations ليه بتتدرس وبتتاخد كأساس لتقديم الأفكار والمنتجات. لو بصينا على الـ Presentations بتاعة ستيف جوبز لما قدّم أول Macintosh سنة 1984، ولما قدّم أولiPod في 2001، وأول iPhone في 2007، وأول iPad في 2010، هنلاقي مجموعة عوامل مشتركة بين كل الـ Presentations دي، مجموعة Techniques كان بيستخدما جوبز عشان يخلّي الـ Presentations بتاعته مُلهمة وخالدة.

stevejobs1.jpg

هنتكلم عن الـTechniques دي، وهنتعلم مع بعض ازاي نطبّقها على الـPresentations بتاعتنا، سواء كنا بنقدّم فكرة أو منتج، وسواء كنّا بنخاطب جمهور عادي أو مستثمرين.

1-قبل ما تفتح الـ Software اللي هتعمل عليه الـ Presentation حاول تعمل Sketch لأفكارك على ورق، الطريقة دي هتنظم أفكارك أكتر، وهتقدر من خلالها ترتّب الـPresentation بتاعتك قبل ما تدخل في بناء الـSlides نفسها.

2-في بداية الـ Presentation بتاعتك لازم يكون فيه Headline، ببساطة ايه هي الفكرة اللي عايز الـ Audience يطلعوا بيها من الـ Presentation دي؟ خلّي الـ Headline مختصر وقصير (خلّيه 140 حرف كإنك بتكتب تويتة) بس في نفس الوقت لازم يكون مُعبّر لإن دي أول حاجة بتقولها للجمهور بتاعك، وحاول دايمًا تكرره خلال الـ Presentation بتاعتك. ستيف جوبز لما كان بيقدم أول iPhone في 2007 قال: "Today Apple reinvents the phone!".

3- قبل ما تتكلم عن أي فكرة أو منتج لازم انت نفسك يكون عندك شغف بالفكرة دي، وده مش كلام كتب بنقوله وخلاص، ده واقع هتحس بيه لو حضرت أي Presentation مع حد مش مقتنع أوي أو مبيحبس اللي هو بيقدمه. وده بردو هتحس بيه لو اتفرجت على الـ Presentations بتاعة ستيف جوبز اللي كان مع كل منتج بيقدمه يحسسك انه بيقدم أحسن حاجة في الكون، هتحس بده لإن جوبز نفسه كان بيبقى مقتنع ان ده أحسن حاجة في الكون. الـPassion Statement من الحاجات اللي هتساعدك توصل الشغف ده للـAudience بتوعك، هات ورقة وقلم واكتب: " أنا متحمس للفكرة/المنتج ده عشان ........."، وحاول خلال الـPresentation بتاعتك توصل الجملة دي للناس.

4- بعد ما بتكتب الـHeadline والـPassion Statement، هنبدأ نكون الـ Key Messages أو الحاجات اللي انت عايز الـ Audience يعرفوها ويفضلوا فاكرينها كويس بعد الـ Presentation بتاعتك. هتكتب كل حاجة تيجي في دمغك، بعد كدة بتبدأ تصنفهم وتقسمهم لـCategories، وفي الآخر بتختار 3 حاجات بس تشتغل عليهم. الأبحاث بتقول الناس عادة مبتقدرش تفتكر أكتر من 3 حاجات بعد الـPresentations، وبالتالي هنركز -الـPresentation بتاعتنا على 3 Key Messages نوصل بيهم فكرتنا.

5- حاول دايمًا أثناء تقديمك للفكرة أو المنتج تركز على المشكلة اللي بيحلها المنتج ده. لو قدرت في بداية الـ Presentation تقدم مشكلة بتمس الـ Audience اللي قدامك هتقدر تلفت انتباههم وتجذبهم يسمعوا الـ Presentation بتاعتك بحماس وتركيز. وخلّيك فاكر دايمًا ان الناس مبتهتمش بالمنتج بقدر ما بتهتم بمشاكلها الشخصية، وبالتالي احنا بنشتغل على المشاكل دي.

aca0eb67-2cf0-4bff-86b9-68efe254c9c2.png


6-الأبحاث بتقول ان الناس عادة بتفقد تركيزها مع الشخص اللي بيتكلم بعد 10 دقائق من بداية كلامه، عشان كدة ستيف جوبز كان دايمًا بيقدم للـ Audience حاجة جديدة تجذب انتباههم كل 10 دقائق خلال الـ Presentation. قسّم الـ Presentation بتاعتك لـBlocks كل Block مدته 10 دقائق، وحاول في بداية كل Block تقدّم للناس حاجة تعيد جذب انتباههم.

7- بلاش Bullet points. الناس اتعودت دايمًا ان الـ Presentation يعني Slides عليها Bullet points مكتوب فيها اللي الـPresenter عايز يقوله. لو بصينا على الـPresentations بتاعة ستيف جوبز هنلاقي ان الـSlides مفيهاش غير صور، كل Slide عبارة عن عنوان وصورة وبس. اتسخدامك للطريقة دي هيخلي الـ Audience دايمًا مركزين معاك انت ومع الكلام اللي بتقوله، مش مركزين مع الـSlides بيحاولوا يقرأوا اللي مكتوب فيها.

8- حاول دايمًا تستخدم احصائيات وأرقام حقيقية من السوق لدعم الكلام والافتراضات اللي بتقولها خلال الـ Presentation. بس خلّي بالك متخليش الأرقام والاحصائيات دي كتيرة ومعقدة لدرجة انها تلخبط الـ Audience.

9- استخدم دايمًا كلمات سهلة وبسيطة. الأسطورة بتقول استخدم كلمات كبيرة وصعبة عشان تعجب الناس، لكن ده مش حقيقي، استخدامك لكلمات صعبة هيلخبط الـ Audience وهيخليهم دايمًا بيفكروا في معنى الكلام مش مضمونه.

gettyimages-79003906.jpg

10-استخدم تشبيهات ومقارنات. المقارنات من أقوى الـTechniques اللي الناس بتستخدمها في الـ Presentations، وستيف جوبز استخدم المقارنات كذا مرة في الـ Presentations بتاعته، وجمل التشبيه والمقارنة بتاعته كانت بتبقى عناوين للصحف بعد الـ Presentation. مثال على كدة لما جوبز حب يقدّم أول Memory Card بسعة 12 جيجا قال: "Today we’re announcing the first 12 GB memory card for cell phones. What does it mean? Enough memory to listen to music while traveling to the moon … and back!".

11-جهّز Demos. واحد من أهم العوامل المشتركة في معظم الـ Presentations اللي قدمها ستيف جوبز انه كان بيجرب المنتج بنفسه قدام الجمهور أثناء الـ Presentation. بدل تقعد تعد الـ Features اللي في المنتج أو تكتبها في Slides، جرب المنتج بتاعك قدام الناس ووريهم الـFeatures دي بشكل مباشر. في بعض الأحيان مش هتقدر تجرب كل الـFeatures اللي في المنتج اللي بتقدمه أثناء الـPresentation لضيق الوقت، وهنا هتضطر تختار أهم الـFeatures اللي عايز الناس تفتكر المنتج بتاعك بيها.

12-ستيف جوبز كان عادة بيشارك الـStage مع أشخاص تانيين أثناء الـ Presentation، مرة كان الـ CEO بتاع شركة Intel، ومرة كان Sony CEO، ومرة كانت مادونا! مشاركة الـStage مع أشخاص تانيين بتدي حيوية للـPresentation بتاعك. دايمًا لو عندك شركاء من شركات تانية بيساهموا في بناء المنتج بتاعك، خليهم يطلعوا يتكلموا عن الفكرة أو المنتج. أو خلي حد من الـ Team بتاعك يطلع يتكلم عن جزء معين في الـ Presentation. ظهور شخص جديد أثناء الـ Presentation هيخلّي الـ Audience يعيدوا التركيز معاك لو كانوا فقدوا تركيزهم لأي سبب.

13-استخدم Testimonials. الـTestimonials هي تجارب الـCustomers اللي جربوا بالفعل المنتج اللي انت بتقدمه خلال الـPresentation، وبتعتبر من أهم الحاجات اللي بتدي ثقة للـPresentation بتاعتك وبتحمس الـAudience يتفاعلوا معاك. الـWord of mouth من أهم العوامل اللي بتؤثر في نجاح شركتك أو منتجك، حاول تستغلها خلال الـPresentation بتاعتك عن طريق انك تقدم تجارب حقيقة لـCustomers عجبهم المنتج بتاعك.

14-ضيف Video Slides. الفيديوهات من أهم الحاجات اللي استخدمها جوبز في الـPresentations بتاعته عشان يخلّي الـAudience يخرجوا من الـPresentation فاكرين كل كلمة قالها. ضيف في الـSlides بتاعتك اعلان للمنتج، أو ممكن الـTestimonial اللي اتكلمنا عنها في النقطة اللي فاتت تكون في شكل فيديو.

6-miniatura-de-steve-jobs.jpg

15-الـPresentations مش بس Slides، معظم الناس لما بييجوا يقدموا فكرة أو منتج بيحبسوا نفسهم جوة الـSlides بس. حاول دايمًا تستخدم Tools تانية تخلي الـPresentation أكثر حيوية وتخليك توصل فكرتك لكل أنواع الناس. ستيف جوبز كان بيستخدم الـSlides، والـVideos، وكمان كان أحيانًا بيستخدم الـFlip chart لشرح حاجة معينة. ستيف جوبز كان معظم الوقت بيعمل حاجة كمان مهمة جدًا، كان بيوزع المنتج اللي بيقدمه على الـAudience عشان يجربوه بنفسهم. شعور الـAudience وانطباعهم هيختلف تمامًا لو اديتهم منتج ملموس يجربوه، بدل ما تكلمهم وتحكيلهم عنه بس.

16-ركز دايمًا في الـBody language بتاعتك، وحافظ على الـEye contact بينك وبين الـAudience، دايمًا تكون باصص للـAudience مش الـSlides. غير من نبرة صوتك وسرعة كلامك بما يتناسب مع الكلام اللي بتقوله.

17-البس اللبس المناسب للـ Audience اللي بتكلمهم، وللمنتج أو الفكرة اللي بتقدمها.

18- وأخيرًا، بعد ما تجهز الـPresentation بتاعتك جربها مع نفسك أكتر من مرة، اعمل Presentation كاملة لوحدك أو قدامك مجموعة من اصحابك. سجّل لنفسك فيديو واتفرج عليه بعد ما تخلص، واكتب الأخطاء اللي انت شايفها في نفسك. ده هيساعدك تحسّن من أداءك وهيديك ثقة كبيرة.

59511bdf-f50f-4356-a52e-9a3548361c15.jpg

لو التزمت بالـنصايح دول هتقدر توصل فكرتك للناس بشكل سلس، وفعّال.
عشان تقدر تربط الكلام اللي في المقال بالواقع، أنصحك تتفرج على الـKeynote اللي قدم فيها ستيف جوبز أول iPhone في 2007


شارك هذا المقال: