الشرابات اكسسوار و لا غيار ؟

مروان حازم

ناس كتير بتفكر فى الشراب على انه قطعة تكميلية مش قطعة متفردة بذاتها و لكن احب اقولكم ان الشراب دة من اهم القطع الى ممكن تفضح صاحبها او تخليه ملك فى نفسه كدة.

50eee272efe33e37c6eab8a9ad641ae5.jpg

طيب ازاى يعنى.....تعالى اقولك يعنى تخيل نفسك مثلا لابس بدلة و شيك و جيت تقعد البنطلون اترفع هوب هوب هوب لقينا شراب اديداس على بدلة مثلا حاجة تكسف الصراحة او مثلا رايح النادى تلبس شورت و عليه شراب طويل لحد ركبك لا يا كابتن انت مش فى الكشافة.
بص ازاى تتقن لعبة الشراب, اولا الشراب دة بيعبر عن شخصية الى لابسه سواء كان جد او بتاع هزار او رياضى او او او .......

914f2a81ce3ec880dfc3d40422b1e47b.jpg

طيب ازاى نظبط الاداء فى القصة دى طبعا لكل مكان شراب و مش هنلخبط لو سمحتوا اولا لو لابس بدلة يبقى تركزفى لشرابات الحرير و دى عشان بتبقى خفيفة و مريحة مع الجزم الفورمال و مش هتحس ان رجليك مخنوقة جوة الجزمة و طبعا قاعدة اساسية الشراب يبقى لون بنطلون البدلة مش لون القميص و لا الكرافات و لا اى حاجة تانية يبقى لون بنطلون البدلة.

ثانيا لو انت هتلبس كاجوال و هنا بقى اللعب كلوا لو انت بتحب الجد و عدم اللخبطة و فردة الشراب ضاعت و تاهت يبقى وحد لون شراباتك يعنى ابيض (صعب فى الغسيل) او اسود (بيبوظ بسرعة), اما بقى لو بتحب اللعب مع الموضة يبقى جدد و خلى شرابك لوحة فنية على رجلك مش مجرد جراب قطن لرجلك لا دة قطعة معمولة بفن لواحد بيفهم.

eb5d0775da0eaea68e1737af04f77cbd.jpg

طيب نلعب ازاى دة بقى بيبقى على حسب الوان الطقم و لو انت لابس سادة و لا مشجر, بمعنى انك لو لابس سادة يبقى انت فى ملعب كبيييير اوى و تقدر تفنن على حسب الوان الطقم دة و ايه الى يليق عليه مش لازم من نفس الوان الطقم بس الوان متماشية معاه. طيب لو لابس مشجر يبقى نقى لون مش واخد حقه فى النقشة بتاعت المشجر و هو دة هيبقى لون شرابك عشان تخلق توازن فى الطقم من فوق لتحت و مش لازم ان الشراب يبان عشان تحس انك عملت مجهود و كدة لا الراجل الشيك بيلبس كله مظبوط حتى لو متدارى و مش هيبان.

ورونا بقى شرباتكوا هتبقى عاملة ازاى و ابدعوا.


شارك هذا المقال: