أشهر حملات السوشيال ميديا في ٢٠١٥

عمرو موسى
شارك هذا المقال:

بعد لما مواقع التواصل الإجتماعي مش أكتر من وسيلة للترفيه للشباب، بقيت مساحة مفتوحة للتعبير عن الأراء لكل فئات المجتمع وده اللي خلاها تتحول بسرعة لأداة لقياس مدي رضا أو رفض الرأي العام لأي خبر أو حدث بيحصل. في 2015، حصل كذا حدث يخليك تقف وتفكر قد إيه الرأي العام علي السوشيال ميديا بقى قوة محدش يقدر يستهون أبدًا بيها على كل المستويات سواء الإعلامية أو الرياضية أو السياسية…شالت ناس وجابت وقسمت الآراء لفريقين…

استقالة وزير العدل

wazeer-el-adl.jpgalmesryoon.com

لو كنت قلت لك من كام سنة إن السوشيال ميديا ممكن تكون في يوم من الأيام السبب إن وزير العدل يستقيل كنت هتقول لي انت شارب حاجة، لأن ساعتها فكرتنا عن الفيسبوك وتويتر كانت إنهم لعب عيال ومجرد تسلية، بس ده فعلًا اللي حصل بعد تصريح وزير العدل الشهير إن 'ابن الزبال ماينفعش يبقى قاضي' اللي أثار موجة غضب كبيرة على مواقع التواصل الإجتماعي وده أرغم وزير العدل إنه يقدم استقالته بعد أقل من أسبوع.

تي شيرتات وقفة رمضان صبحي

wa2fet-Ramadan.jpg

almogaz.com

لاعب النادي الأهلي رمضان صبحي، عمل الحركة  الشهيرة وهي "وقفته على الكورة" في إشارة حركية منه إنه حط علي الفريق التاني. بدل ما يعملها مرة، عملها مرتين. حركة زي دي عمرها في الذاكرة كان ممكن يبقي ربع ساعة في قعدة شباب على القهوة، بس لأننا في عصر "السوشيال ميديا"، الموضوع بقى معركة فكرية بين ناس "مع" الوقفة وإن ده عادي ومن حقه، وناس "ضد" الوقفة وشايفين إنه عيب وفي النص، ظهرت تي شيرتات وماجّات مرسوم عليها الوقفة دي. 

وقف برنامج ريهام سعيد

riham-said.jpg

alarabiya.net

في آخر فترة لبرنامجها "صبايا الخير" كان فيه عدد كبير من الجمهور بينتقد ريهام سعيد بسبب تصرفاتها والطريقة اللي بتدير بيها الموضوعات وتركيزها علي عمل بروباجاندا كل فترة لجذب الأنظار حتى لو على الفاضي، كان أشهرها لما جابت بنات وأدعت انه راكبهم جن وعفاريت والموضوع في الأخر طلع متظبط، بس اللي جابها الأرض وخلى كل الناس تقلب عليها حتى القناة اللي هي شغالة فيها كان لما عرضت صور خاصة خدتها بدون علم بنت كانت متسضيفاها لأنها رافعة قضية على مُتحرِش، كمحاولة منها "كمذيعة" و "فاعلة خير" إنها تعرفّنا إن البنت اللي رافعة قضية علشان "شرفها" أصلًا معندهاش أخلاق! ساعتها قامت حملة ضخمة لمقاطعة منتجات رعاة البرنامج، وده طبعا خلي الرعاة يعلنوا عدم مسئوليتهم عن المحتوى المقدم في البرنامج وقام أكتر من 15 راعي بسحب عقود الرعاية، وده عشان يعتبر خراب بيوت أعتذرت القناة وأعلنت وقف برنامج ريهام سعيد، كل ده تم بعد أقل من 48 ساعة من الحملة.

منحة لـ يوسف، بائع الفريسكا (أو الجندوفلي)

freska.jpgalwafd.org

يوسف شاب حاصل على شهادة من معهد خدمة اجتماعية، بس مش شغال بيها عشان مفيش شغل، شغال بياع فريسكا في وسط البلد ومشهور إنه دايمًا لابس شيك ومسرح شعره وبيضحك، واحد صوّره ونزل صورته علي فيسبوك وحكي حكايته، الناس تفاعلت معاه وشاركت قصته. بدون الدخول في تفاصيل زي هل الناس 'أڤوّرت' شوية ولا لأ، بس السوشيال ميديا كانت سبب في حصوله على منحة ماجستير في إدارة الأعمال من الجامعة الأمريكية بواشنطن.