و مراتك عارفة إنك سنجل ؟

ساره وفير

الجواب باين من عنوانه ؛ موضوع مهبب للناس اللي عارفة نفسها كويس و علي راسها بطحة  طبعا

بقابل رجالة كتير و بسمع حكاوي اكتر بس اكتر راجل بحسه Creative في نظري اللي بيبين حاجة و هوا وراه بلوة سودة لسة مابانتش..

تعددت البلاوي بس بلوة النهاردة عن الراجل اللي متجوز و خاطب و مصاحب و بيظبط في نفس الوقت من غير ما اي حد يعرف حاجة عنه ... مش عارفة اسمه اية الكلام ده بس قمة في الإبداع او ممكن يبقي قمة في الزهق او مراهقة متأخرة او اعتزاز بالذات مثلا او يمكن فن بوهيمي و احنا لسة منعرفش او ممكن يكون جاله المرض البطال و سن البلوغ لسة معاداش عليه...

المهم انه مرض انتشر بقوة في الايام السودة دي و زي اي مرض طبيعي ليه أعراض جانبية ؛ المرض اللي بتكلم عليه هنا ليه اعراضه برضه بس جه الوقت اللي لازم نفضح الأعراض دي عل الملأ عشان نشوف مع بعض ايه طرق العلاج منها.

1) السهوكة:

maxresdefault.jpg

اداء عالي في السهوكة؛ داخل عليكي بدباديب كتير ؛ ورد اكتر .. حب و حنان و شوق و غرام و حنين ناتج عن افتقاده لحنان أمه ؛ سنس سهوكة واضح جدا في الأداء فتعرفي علي طول وراه مصيبة. ده تجيبيله ببرونة هدية و تمشي بشياكة بعد كدة او ممكن تجيبيله اقراص Anti Mohn هيساعد في تهدئة الحالة.

2) تقلبات مزاجية و نوبات صرع:

0.jpg

بعد السهوكة و الدباديب ممكن فجأة يقلب علي الراجل الأخضر اللي بيطلع في اعلانات Mountain View ؛ فجأة كدة من غير اي اسباب واضحة بس ممكن يكون عشان فقد القدرة علي التركيز او عنده مصيبة مع مراته. مش عارفة ده الحل بتاعه ايه؛ بس ممكن يتحبس او ياخد جلسات كهربة لحد ما يهدي و يبينله صاحب او حد يسأل عليه.

3) إختفاء:

72713558d1e7-original.jpeg

متعرفش تجيبه منين؛ اختفي في 60 داهية او ممكن يكون بيعمل خلوة؛ المهم لو اتنططت مش هتعرفله طريق جره. دة حله اعلان بسيط في برنامج تنوية عن المفقودين مع لمسة تشريد علي الـ Social Media انه اختفي و احنا قلقانين عليه و ربنا يساعدنا علي فعل الخير 

4) البخل:

475328_0.jpg

طبعا ماهو مش هيلاحق علي مين ولا مين "انتي خادتي بطاطس" و الجو ده.
اخرجي معاه تاني علي فكرة و كلي و اشربي و العبي و انبسطي و هاتي اللي نفسك فيه؛ بس بعد كدة اختفي انتي كمان فجأة في نص الخروجة مع اي حجة بسيطة رايحة الحمام مثلا و مترجعيش يا ست الكل ...حركات بنات بقة عيب داحنا دافنينه سوا.

5) مكالمات و مقابلات في أوقات غريبة و حتت مقطوعة:

snaps127.jpg

مخكوا ميروحش لبعيد.
فينك طول اليوم مش بترد ... معلش اصلي مشغول قوي ... عندي اجتماع مهم باخد فيه مقاسات .. اي بتنجان من النوعية دي.
يللا نخرج!! يللا يا حبيبتي .. غالبا هيوديكي Beanos cafe عشان مداري شوية و الرجل عليه مش كتير (مع احترامي الشديد لـBeanos طبعا) او لو في شوية رخص في الموضوع ممكن تخرجوا ورا مصنع الكراسي او اي حتة مطرفة مفيهاش زحمة عشان ميتفضحش. أخرجي معاه و اعملي Check in.

6) إهتمام:

6c345e6ecc.jpg

(مش بيكي يا حبيبتي ... بنفسه طبعا)
سبسبة في الشعر؛ ممكن تلاقية بيعمل حواجبه عادي .. متتخضيش؛ لو شايف نفسه اوي و حاسس انه ياما هنا ياما هناك هتلاقية شايل شعر ايده و سدره و كدة. متزعليش برضه بوسيه و حوطيه جنب الحيطة و متنسيش تسألي عن الـ Beauty Center اللي هو بيتردد عليه.

7) هبل:

167942_28_1465975051.jpg

في الغالب عشان وراه مصيبة هتحسي انه راجل أهبل كدة؛ إستظراف لا ارادي علي الفاضية و المليانة لدرجة انك ممكن تحسي انك خارجة مع كرتونة بيض مش انسان طبيعي زي بقية الناس. طبعا ده حله انك اوعي تقابليه تاني لحد ماتجيبي قراره و تكلمي المسئولين عنه تشرحيلهم الحالة اللي هو فيها بالظبط و تسلميه تسليم أهالي.


عيب ولا مش عيب اللي انا قلته ده كله.. ينفع يا رجالة الكلام ده "ميصحش كدة"

بص بقا يا نور عنيا منك ليه؛ احنا كبنات مش بنسكت و بنفضل ورا الحاجة اللي عايزين نعرفها لحد منجيب قرارها.

*** معلومة مهمة عن البنت حطها في ودنك: البنت لما بتحب تعرف حاجة عن الولد اللي حاسة انه بيلاحقها و كدة بتبقي احسن من اللي بيشتغلوا في الـ F.B.I – هتجيبك من قفاك و هتجيب قرارك من ساعة ما ابوك و امك كانوا بيظبطوا و قرروا يتجوزوا عشان يجيبوا حتة عيل عشان يفرحوا بيه لحد اللحظة اللي انت فيها دلوقتي ....

طبعا الموضوع مش هيقف لحد هنا و بس .. لا يا حبيبي 
ده كل اللي انت بتعمله ده هيوصل للست الكومل اللي قاعدة في البيت مستنياك و انت عمال تستغفلها؛ مع شوية تشريد علي أعلي مستوي و مش بعيد تلاقي صورك في الشوارع و محطات المترو.. ده غير شوية التحابيش في الفضايح علي حسب نوع البنت اللي وقع حظك فيها و عملت قدامها 7 رجالة في بعض.

7pepy-com_17356.jpg

لو عايز تهفلط و ظروفك مش سامحة خليك علي الأقل صريح مع كل الأطراف و سيب حرية الاختيار للي قدامك لكن شغل الشمال ده عيب في حقك كراجل.

ممكن يبقي في حلول تانية كتير انك تعيش حياتك زي ما انت عايز من غير ما يبقي فيه اي ظلم او أذي نفسي من اي نوع هيحصل لشخص معين في حياتك من تحت راسك بسبب ان انت انسان مختل من الاول و معرفتش تختار صح و تبقي اد اللي اخترته و تكمل و تبقي اد المسئولية و تفكر في الحلو اللي عندك و انت مش حاسس بيه او اضعف الايمان لو عندك شوية خيال تحاول تتخيل نفسك مكان اللي قدامك اي ان كان الطرف مين و تفكر لو حصل فيك اللي انت بتعمله ده يبقي احساسك اية ساعتها. لكن اوعي ابدا تفكر ان كونك راجل ده هيعفيك انه يحصل فيك بالمثل عشان الدنيا دواره 

CCtUoXUWMAAuUJP.jpg

و لو ربنا بلاك بعدم الاحساس بمشاعر الناس اللي حواليك يبقي انت كدة في خطر يا برنس علي نفسك قبل علي الناس و محتاج تتعالج نفسيا و عصبيا .. لان في جميع الحالات هتتبهدل بهدلة سودة في الدنيا و الأخره لحد مايبنلك صاحب.

"و قد أعذر من أنذر"


شارك هذا المقال: