ماتستثمر فلوسك فى الدهب زى ساويرس ؟

أحمد صلاح

مع تغير الظروف الاقتصاديه فى بلدنا , بنحب كل فترة كده نقولكم ايه افضل مكان ممكن تحط فيه فلوسك ؟ .. يعنى كان اخر سنه قولنا ان افضل استثمار هو الشهادات اللى بالعائد 20% ودى كانت مدتها سنه وسنه ونص .. ومن نص الشهر اللى فات قرر طارق عامر محافظ البنك المركزى انه يوقف الشهادات دى وبكده اى حد كان دخل فى الشهاده دى مش هيقدر يجددها تانى عشان ياخد نفس العائد الكبير اللى هو 20% ..


والاسبوع دا سمعنا خبر عن الملياردير المصرى نجيب ساويرس انه حول نص ثروته استثمارات فى الدهب وقال ان سعر الاوقيه اللى هو دلوقتى فى حدود 1300 دولار قدامه طريق انه ممكن يزيد اكتر من 500 دولار بس ماحددشى الفتره اللى ممكن يوصل فيها للسعر دا .. يعنى لو اتكلمنا بالجنيه هو يقصد ان سعر جرام الدهب 21 اللى هو دلوقتى 645 جنيه بيتوقع انه يوصل 900 جنيه يعنى زياده 40 % ..


طيب دلوقتى انت لو معاك فلوس مصرى وعايز تستثمرهم ؟ تحطهم فى ايه ؟؟


الدهب
السعر العالمى للدهب منخفض فى الوقت الحالى وفيه توقعات انه يرتفع وخاصه مع التوترات الدوليه الحاليه مع امريكا وايران واغلب المستثمرين بيشتروا دهب لانه استثمار امن وبشكل مبدئى ممكن سعر الجرام يكون 700 جنيه فى خلال سنه


الشهادات البلاتينيه 3 سنين
دى الشهادات اللى بتقدمها البنوك فى مصر دلوقتى بفايده 15% بس مشكلتها انك بتحجز الفلوس لمده 3 سنين


العقارات
لو المبلغ اللى معاك كبير ممكن تروح تحطهم فى شقه مش هاتخسر وخاصه بعد زياده اسعار البنزين والكهربا فى الشهور الجايه هتغلى اكيد الاسمنت والحديد وبالتالى سعر الشقه هيزيد

وطبعا دى كلها اراء خبراء ومستثمرين كبار ومش شرط تكون صادقه بنسبة 100%


شارك هذا المقال: