لماذا تحب النساء رشدي أباظة ؟

فريق راجل. دوت كوم
شارك هذا المقال:


أسطورة الرجولة عند المصريات القدماء والحاليين كمان إسمها ( رشدى أباظة ) اللى قليل اوى لما تلاقي ست مش بتحبه وهيمانه فيه غرام .. وإحنا معشر الرجال دايماً بنستكتر عليه هذا الحب الطاغي - إشمعن يعنى ؟ - مافيه غيره كتير !
هنحاول فى المقال ده نوصل لأسباب حبهم لرشدى .. وياريت هم كمان يشاركونا يمكن يطلع مننا كام رشدي !

1 - برنس فى نفسه !
رشدي كان برنس .. من عيلة الأباظية المشهورة كان مرتاح مادياً وده خلاه ميتنازلش عن حاجات كتير علشان الفلوس والمادة .. عزيز النفس .. البَرنسة صنعته .. عاش حياته بالطول والعرض من غير حسابات ..اللى بييجى فى دماغه بيعمله .. بيعامل الست – أى ست – على إنها اميرة وبرنسيس .. جنتلمان حقيقى مش مصتنع .. أحمد رمزى قال عنه فى أحد البرامج : " رشدى كان أجن واحد فينا .. كان يفوت فى الحديد وعمره ماخسر رهان على ست " .. الست بتحب الراجل ده.

1404304956_65_NEW-ABAZA.jpg

2- حبيبي إنت يافيلسوف
الستات بتنبهر باللى يقولها كلمتين عربي مترتبين من غير ما يتهته ...مابالك باللى بيكلمها عربي وإنجليزى وفرنساوى وإيطالي وأسبانى وألمانى ؟!! قاموس متحرك يبهر أى حد .. متحدث لبق وقارئ لكل أنواع الكتب وعنده وجهة نظره الخاصة فى كل شئ .. يعنى وقت الجد يتكلم ووقت الهلس .. عمدة الهلاسين ! بيفلسف اى شئ حتى لعب البلياردو اللى كان بيواظب عليه شبه يومياً فى المينا هاوس .. الست بتحب الراجل ده .

13139377_10153511515693344_7808331364357392306_n.jpg

3- ملامح الرجولة
شنب رشدى أباظة ! .. كان مثال بينضرب بيه المثل فى الوسامة ... ستات كتير مش بتحب ( الشِنبة ) وحبيتها بس على رشدى أباظة .. ملامحه الرجولية المصرية اللى من غير أفورة فى فتح قميص أو ترقيق للحروف جذبت الستات ليه .. لأنه حسسهم إنه زيهم ..منهم .. سهل الحصول عليه مش فى وادى وهم فى وادى ... كل ست مصرية مهما كان مستواها الأجتماعي شافت فيه الحلم الممكن مش المستحيل .. الست بتحب الراجل ده.

rr.jpg

4- الأساطير
مهما كنت جميل ووسيم وابن ناس و..و...و... مش هيكفيك علشان تكون رشدي أباظة .. لازم شوية أساطير حواليك ومغامرات مليانة فلفل وشطة تخلي سيرتك لما تيجي تتحفر فى الذهن ومتطلعش .. ( الصيت ولا الغني ) .. مابالك بقا باللى متصيت ومعاه فلوس .. مغامرات رشدي فى البارات والكباريهات والخناقات ودخوله أكتر من مرة فى تحدى مع الملك حوالين بنت جديدة عينهم منها هم الإتنين ..وكان هو اللى بيكسب .. والحكايات دى مش بتستخبي ومن بق لبق .. والستات بتحب بودانها قبل عينيها .. ورشدي كان ليه كل يوم حدوتة .. الست بتحب الراجل ده.

1404304956_93_1a5.jpg

5- أثر رشدي لايزول
لو جاز نستعير تعبير الشاعر " محمود درويش " : أثر الفراشة لا يُري أثر الفراشة لا يزول
رشدي كان أثره فعلاً لا يزول .. اللى بتمثل معاه مرة عايزة تمثل تانى .. زميلاته كلهن بيقولو عليه عبقري .. والتمثيل معاه ليه طعم .. رشدي بالمقارنة مع غيره من الفنانين متجوزش كتير .. 5 بس .. تحية كاريوكا .. بربرا الأمريكية وأم بنته الوحيدة قسمت .. سامية جمال .. صباح .. وبنت عمه نبيلة أباظة ... كل واحدة من دول لما تسمعها بتحكي عن رشدي تحس إنها بتتكلم عن ساحر ليه قدرات خاصة فى الإبهار .. صباح مثلاً ليها الجملة الشهيرة اللى ( صيتت ) رشدي على مر الاجيال : " اللى متجوزتش رشدي أباظة متجوزتش "
كلهم اجمعوا على ( حنيته – تفهمه للمواقف – إحتواءه ) على الرغم من عدم ولاءه الكامل ليهم فى فترة الجواز وتعدد علاقاته النسائية بس الست تغفر كل حاجة لو ال3 صفات دول أوفردوز فى حياتها .. الست بتحب الراجل ده.

rosh.jpg

6- الإقتحام
يمكن من أهم أسباب حب الستات لرشدي أباظة إنه عنده صفة مهمة جداً خصوصاً فى العلاقات الإنسانية مع الجنس الآخر .. الإقتحام .. الستات طول عمرهم يحبوا الراجل اللى يقتحم حياتهم ويملاها بإندفاع وجنون من غير مايخبط الباب ... رشدي كان مبيخبطش .. كان بيضرب أبواب قلب اللى تعجبه برجله ويدخل ويقعد .. ويربع ! مريم فخر الدين بتحكي فى الفيديو ده عن يوم ما جه وضرب القفل اللى على باب بيتها بالمسدس ودخل معاه كباب وكفته وويسكي وقعد ياكل فى الصالون! الست بتحب الراجل ده .