أنا مش قادر أديك

أحمد عادل علي

أنا تَعبان..." لأ أنت مينفعش تتعب. ده أنت اللى الناس بتجيلك لما بيكونوا تعبانين عشان يرتاحوا معاك.
"أنا نفسى أقعد لوحدى و أقفل تليفونى".. أنت بهزر، مش كدا؟ ده أنت اللى الناس بتجيله لما تبقى مش عايزة تشوف أو تكلم حد.
"أنا زهقان أوى و مش عارف أعمل إيه؟" أنت زهقان إزاى؟ ده أنت اللى الناس بتجيله و هما زهقانين عشان يتبسطوا شوية. (قرداتى أنا !).
"أنا نفسى الناس تسيبنى فى حالى و محدش يطلب منى أى حاجة لمدة يوم واحد بس" أستغفر الله.. يابنى قضاء حوائج الناس ده ثواب كبير ! (طب و قضاء حوائجى أنا أولّع فيها؟!)
كلنا بيعدى علينا فترات مش قادرين نكون إجتماعين و بقينا كتير بنسمع كلمة "معنديش الenergy أو معنديش الطاقة إنى أعمل حاجة أو أكلم حد" و بقينا بنستسهل نخسر ناس أو نفكس فرح أو كتب كتاب حد بنحبه أوى عشان الشعور بالتقل ناحية أى حاجة من اللى بنسميها فى العرف واجبات.
كل واحد فينا بيناسبه وصف شخصية من الشخصيات اللى فوق دى و فى أكيد فينا حاسسين إنهم الشخصيات دى كلها مع بعض فى نفس الوقت بكل التحديات دى فى كومبو واحد.
كفاية أحاسيس و مشاعر كدا و خلينا نشوف إيه سبب الموضوع ده – غير إن الناس بقت مقرفة :D – و إزاى تتغلب عليه. أولا لازم تعرف إنك زيك زى الموبايل أو اللابتوب إللى أنت ماسكوا دلوقتى و بتقرا منه، بمعنى إيه؟ بمعنى إن انت عندك بطاريات لازم تتشحن و عندك وقت لازم تنزل ويندوز أو سوفتويير جديد و عندك سعة تخزين محدودة و عندك cache و RAM كمان.

بطاريات الأنتخة:
الجسم بيحتاج للراحة و كلنا حافظين "لازم تنام 8 ساعات فى اليوم" أنا حد قاللى حاجة فى مرة حاسيت بكوباية تلج نزلت فى ضهرى منها. قالى "هو بقى فى حد بينام 8 ساعات دلوقتى؟ صلى على النبى." عليك أفضل صلاة و تسليم يا نبى. هو عنده حق و غير كدا إيه نوع ال 6 ساعات اللى بقينا بننامهم؟ كلهم تفكير و أحلام بالشغل و الناس اللى مزعلانة و كلام مالوش أى تلاتين لازمة لا بيقدم ولا بيأخر.

النوم السليم إنك تسيب الموبايل قبل ما تنام بربع ساعة مش لحد ما تنام على نفسك و الموبايل يقعد يقع على خلقتك يصحيك – نوم ده ولا سجن أبو غريب.
عوًّد عقلك على إحساس "الهشششش" زى ما بتّسكت عيل صغير بالراحة هيزن شوية و شوية و هيهش و يسكت و زى ما بتدى للطفل حاجة حلوة تشغله إدى مخك فكرة حلوة؛ فسحة ناويها فى الويك إند، حد واحشك قرر إنك تكلمه لما تصحى تقوله كلمة حلوة يفرح منك فتفرح إنت كمان، حاجة إشتريتها كان نفسك فيها من زمان أو إن الله الملاية ريحيتها حلوة !!! اللى عايز بجد هيلاقى.
الأنتخة أنواع بردوا، إنك تقعد ساعة كدا من غير موبايل فى إيدك تشوف مين خطب و مين قلعت الحجاب سيب كل ده و أقعد مكانك إسرح فى اللاشىء، عيش فى المهلابية و إسمع أغانى حلوة و هادية و عيش إعلان الشيكولاتة بتاع زمان ده اللى كانت الست تاكل الشيكولانة من هنا الكرسى يكبر و المزيكا تشتغل من هنا.


بطارية الطاقة و الحيوية:
و دى ليها علاقة بالقدرة الجسدية و الطاقة و الحيوية و النشاط بقى. خلينى صريح، الأكل الغير صحى طعمه حلو، الكبدة و السجق –و على القارئين من الأسكندرية الإلتزام بنطقها سدق – و البرجر و البطاطس المحمرة و المكرونة سي فود و المايونيز بس لو ده بس أكلك إبتسم لأن معدتك هتزعلك كمان شوية.
أنواع الأكل دى كلها – بلا إستثناء – بتعمل قلبان فى المعدة و عدم راحة عامةً غازت و حموضة و تقليب على الجنبين طول الليل. حاول تاكل أكل صحى أكتر، كل سلاطة خضرة و خس و جرجير و خيار و جزر و طماطم أكتر و قلل الأكل المحمّر الكتير و الملح الزيادة فى الأكل لمدة 15 يوم و شوف الفرق فى حاجة. بطّل تتعشى متأخر و لو متعود تتعشّى كُل فاكهة. الصحة العامة من أكتر الحاجات اللى بتساعد الواحد تبقى دماغه رايقة.
الرياضة ثم الرياض ثم الرياضة، الرياضة كلنا بنعتبرها هم على القلب و مقصدش الجيم و مرايات و "عاش يا وحش" أنا أقصد الرياضة اللى تحسسك بالحرية و بتجيب نتيجة بسرعة، الجرى من أهم الرياضات. إجرى و لو 3 مرات فى الأسبوع لمدة 20 دقيقة. شوية جرى و شوية مشى، إجرى 5 دقايق؛ و ده مش كتير ولا صعب، و إمشى دقتين و هكذا و كداهوّن. هتحس بالفرق فى الهضم و القدرة العامة.


الطاقة الروحانية:
مش مهم دينك إيه بس الإلتزام بروتين تواصل مع ربنا مهم جدا، عشان كدا فى خمس صلوات فى اليوم و عشان كدا فى كنيسة كل جمعة و حد. طب ما فى ناس ملحدة تعمل إيه؟ أنا مش هكدب على نفسى آه فى ملحدين كتير فى البلد و مش ده موضوعى فمش هتكلم فيه كتير، بس خلينا نشوف هما ممكن يعملوا إيه. الهدف من أى صلاة هى إنك تسكّت لسانك شوية و تسيب روحك هى اللى تتكلم؛ يعنى تواصل مع النفس و القوة العظمى اللى فى الكون. الصمت من أحسن الطرق إنك تدى روحك الفرصة تتكلم، سيب الموبايل، إقفل المزيكا، إطفى التلفزيون، بطّل تاكل و لو حتى لبان. إسمع صوت نفسك و ركّز و شوية شوية إدخل فى مرحلة التأمل Meditation و دى من أكتر الحاجات الى بتخلى الواحد يخلص من الطاقة السلبية الNegative Energy. اليوجا من أكتر الحاجات المتكاملة فى الدنيا، فيها تركيز و هدوء و Stretches بتشيل كل التوتر اللى فى العضلات و تطلع الLactic Acid اللى كتره بيسبب الشد العضلى – اللى هى أصلا طريقة الجسم للتخلص من الLactic Acid من جوا العضلة فأنت لما بتشد العضلة بتعتصره من جواها. و على فكرة اليوجا والMeditation لا يتعارضوا مع أى أديان بالعكس دول بيساعدوا الإنسان على الشعور بالسعادة و الراحة و ده من أهداف الدين – صلّى و صوم و اقرأ قرآن و الكتاب المقدّس و مارس التأمل الى هو الMeditation و إعمل يوجا و على فكرة كل الرسل و الأنبية وصلتهم الرسائل من كتر التأمل بإختيار إلهى طبعا بس هما كان عليهم دور السعى و قاموا بإعتزال الناس و التأمل.

فى الآخر أحب أقولك إشرب مية كتير لسببين؛ أولاً فى حاجات إسمها الKetone Bodies بتنزل فى البىبى ولا مؤاخذة و دى كترها فى الجسم بيسبب إستعداد للإكتئاب. إشرب شاى أخضر بينزِّل المياه المحبوسة فى الجسم و أهم حاجة حِب نَفسَك و خد بالك مِنها، متشميش ورا نِفسَك و خاف منها.


شارك هذا المقال: