قواعد العيد الخمسة عند المصريين

فريق راجل. دوت كوم


طبعاً العيد بيبقا ليه طقوس كتير ولكن فيه كام حاجة كدة بتبقا مميزة وبتحسسك فعلاً بأجواء العيد ...

1- التطبيق لحد الصلاة
كلنا بنبقا متعودين على السهر من رمضان والسحور وعلى الأقل محدش بينام قبل الفجر ، ومعظم الناس بتفضل مكملة الساعتين تلاتة لحد صلاة العيد صاحيين وبيغالبوا النوم بالعافية علشان متأكدين إنهم لو ناموا مش هيعرفوا يقوموا يصلوا العيد ... وبيبقو موصيين بعض اللى يصحي يكلم التانى يصحيه .. وفيه شباب ورجالة كتير متعودين يطبقوا سهر فى الشارع من بالليل لحد بعد صلاة العيد ...

2- السنكحة بعد صلاة العيد
غالباً بتكون فقت خلاص ومعاد نومك طالما عدي فتقدر تواصل ... الجو فى الساحات والمساجد بيفوقك أصلاً غصب عنك ، وبهجة الناس وريحتهم ونضافتهم وإبتسامتهم المجانية ولعب الأطفال ودوشتهم .. كل دى طقوس مصاحبة للصلاة ولكن الأهم هو ( السنكحة ) بتاعتك انت والشلة فى الشوارع المحيطة وياسلام لو فيه شلة بنات عجبتكم .. متفهمش ايه علاقة صلاة العيد بالتظبيط .. ولكن دى بقت حاجة ثابتة خلاص ..

3- الفطار والكحك والشاي بلبن

snowball-cookies-recipe-11.jpg


لمتكم كلكم بعد الصلاة والفطار اللى عادة بيتكون من طبق كحك كبير والشاي بلبن اللى طعمهم سوا بيبقا زى السحر وبيدى طعم لصباح أول يوم العيد ... وبعدها كمان بيبتدى الكل فى طلب العيدية والمفاوضات عليها ..

4- النوووووووم
كل ده ومفيش نوم فغالباً لو معندكش ضيوف او مش رايح لضيوف بدرى فبتلاقي كل البيت نامله الكام ساعة دول لحد بعد العصر علشان يقدر يواصل ...

tumblr_mgdossXlsg1qedlyeo5_250.gif

5- العيال كبرت والزعيم وكدة أوك

مسرحيات كتيييير جداً موجودة فى تاريخ الفن ... لكن خلاص اتنين تلاتة منهم اتحفروا فى ذهننا كلهم انهم مسرحيات العيد لازم تلاقيهم على كل القنوات تقريباً والمحطة الواحدة بتقسمهم على التلت ايام والعيال كبرت رقم 1 والزعيم بعدها ومن كام سنة دخلت مسرحية كدة أوك فى اللعبة وبقت كمان من علامات التليفزيون المميزة فى العيد ...

لو عندك كمان علامات مميزة لاول يوم العيد فى مصر اكتبهالنا وقلنا عليها ، وقلنا عملت إيه من الخمس حاجات دول ... وعيد سعيييد


شارك هذا المقال: