7 قواعد لازم تشكمها بيهم قبل ماتتجوزوا

شيماء عادل


لو داخل على جواز أو لسه خاطب ومقضيها دلع وفسح وخروجات، فالله يخليك قرر أنكم تعملوا خروجة من دول للحوار الرخم ده ... واتفقوا من الاول على القواعد دي 

دي قواعد ثقيلة وفى نفس الوقت ضرورية .. فتقدر تقول عليها قواعد ثقرورية :

المصروف:

لازم من أولها كده تتفقوا مين هيكون مسئول عن مصروف البيت، وهى عادة بتكون البنت ودا على فكرة أحسن وأريح ليك مية مرة، لأنك لو أنت إللى هتكون مسئول عن المصروف مش هتترحم طلبات وهتلاقى نفسك كل يوم مقرر عليك وانت راجع من الشغل تعدى على السوبرماركت أو الفرن أو

الصيدلية أو أو .... ومهما حاولت تظبطها صدقنى مش هتعرف لأنك كل يوم هتلاقى حاجة جديدة نقصت من البيت أو حد تعب أو هى نفسها كمراتك يعنى وليها حقوق عليك محتاجة حاجات كتير لنفسها، فافكك من الحوار دا أحسن وخليها هى إللى تمسك المصروف وتشيل هى الشيلة كلها. أما بالنسبة

لحوار إنها تساهم معاك فى مصروف البيت لو هى بتشتغل، فأوعى تفتح معاها الحوار دا خااالص وحتى لو هى عرضت اوعى توافق لأنك ببساطة أنت الشخص إللى هتكون مسئول عنها بعد باباها إللى طبعا مكنش بيخلها تدفع مليم وعن ولادك فى المستقبل فلازم تكون أد المسئولية دى حتى لو هتموت

نفسك وتشتغل ليل ونهار بس متحسسهاش إنك جايبها تصرف على نفسها، حسسها دايما إنك هتقدر تكفيها وهتعمل كل إللى فى مقدورك علشانها وصدقنى ساعتها بس هتلاقيها واقفة جنبك وبتساعدك من وراك ومن غير ما انت تحس كمان.

111.png

يوم الجمعة والزيارات العائلية:

كمان موضوع من الموضوعات المهمة جدا هو زيارات أهلى وأهلك وبالتحديد يوم الجمعة، هنقضيه فين وإزاى، هنمشيها أسبوع وأسبوع ولا نص اليوم هنا ونص اليوم هناك، ولا نخليها جمعة وسبت، ولا مش هنتحرك من البيت فى أم اليوم دا. صدقنى دا حوار من الحوارات الثقرورية المهمة جدا

علشان ترتاح فى حياتك الجاية كلها وتتجنب خناقة كل أسبوع . كمان متنساش تتفقوا على أيام العيد هنروح لمين أول يوم ومين تانى يوم وأول يوم فى رمضان وراس السنة وهكذا.

unnamed-2-.jpg

تقسيمة البيت إزاى:

عادة الموضوع دا أنت هتفتحه علشان تعرف قرارها بس مش أكتر، لكن مش هتتناقش فيه ولا حتى تحلم إن يكون ليك نصيب من أصله لأن من المعروف إن مراتك المستقبلية هى إللى هتستحوذ على نصيب الأسد فى كل ركن فى البيت، يعنى هى إللى هتختار هتنام على أى ناحية من السرير "وغالبا

بتكون الشمال ومتحاولش تعرف ليه!!" وهتاخد كام دولاب وتسيبلك كام رف تعطفا منها، وهتسمحلك بأنهى كرسى فى الليفينج "ومتفكرش تقعد مكانها"، وممكن تاخد رف واحد فى الحمام مش أكتر على كام شبر فى التسريحة وكده يعنى. زى ما قولتلك متحاولش تتناقش فى الحوار دا ولا تعشم نفسك

لأنك حتى لو وصلت معاها لقرار إننا نقسم كل حاجة صدقنى هتزعل بعد الجواز.

unnamed-3-.jpg

الخروجات والفسح:

دا كمان ثقرورى أصيل ولازم تتفقوا عليه وبلاش تقول دا حاجة تافه ونسيبها بظروفها لأنك الوحيد إللى هيعيش فى نكد بعد كده بناءا على كلامك دا، فبلاش. الخروجات والسفر والفسح هى حاجة مهمة جدا عند أى بنت وأكيد شوفت نماذج كتير قدامك من الخناقات والمشاكل اللى بعد الجواز بسبب

الحوار دا.. "أنا زهقت وعايزة أخرج" و "أنت مش مهتم بيا" وممكن توصل ل"أنت مبقتش تحبنى" علشان خروجة تخيل!! بس دى مش تفاهه ولا كلام فاضى، زى ما أنت بيفرق معاك حاجات معينة هى كمان بيفرق معاها الحوار دا جدا وبتربطه بحاجات كتير زى الحب والإهتمام. كل إللى عليك

إنك تقعد وتتكلم معاها فى الحوار دا قبل الجواز وتتناقش فى ظروف شغلك وهل هتحددوا يوم معين للخروجات زى الويك إند مثلا، ولا إذا كنت بتخلص شغل بدرى ممكن تخروجوا كل يومين مثلا. وخدها نصيحة طول ما أنت مريحها فى الحوار دا بالذات هتسيبك تعمل إللى أنت عايزة زى إنك

تنزل مع أصحابك ولا تقعد على القهوة أو تلعب دورين بلاى ستيشن ولا تتفرج ع الماتش.

unnamed-4-.jpg

شغلك وشغلها:

لو هى بتشغل يبقى لازم تفهم ظروف شغلها كويس، يعنى مينفعش تكون بتشتغل فى الماركيتنج والإعلانات أو صحفية مثلا أو فى العلاقات العامة أو ميك-أب آرتست ولا مساعدة تنفيذية لصاحب شركة كبيرة وتيجى أنت تطلب منها إنها تكون فى البيت كل يوم الساعة 3 ولا 4 لان دا عمره ما

هيحصل. فى مجالات ملهاش مواعيد محددة أو بتحتاج تتأخر شوية فلازم أنت تكون فاهم وعارف الفرق بين موظفين الحكومة ولا المدرسة وبين أى وظيفة تانية وتشوف ظروف شغلها هتتناسب مع ظروف شغلك انت كمان ولا لأ زى أنك تكون أنت كمان بتتأخر فى شغلك، فهنا أحسنلك إن هى

كمان تكون مشغولة علشان متركزش معاك وتبدأ المشاكل.

unnamed-5-.jpg

علاقتكم مع الناس:

ناس زى العايلة والجيران والصحاب، التعامل معاهم هيبقى إزاى. ياترى أنت إجتماعى أوى وبتحب الزيارات والمجاملات والمناسبات ولا لأ وهى كمان من أى نوع فيهم. لازم تعرفوا شكلوا حياتكم وعلاقتكم مع الناس هتبقى عاملة إزاى وتوصلوا لحل أو لطريقة ترضيكوا أنتوا الأتنين.

unnamed-6-.jpg

العيال والخلفة:

دا طبعا مش محتاجين نقول هو إد إيه مهم، لأن كل المرتبطين بيتكلموا فيه من قبل الخطوبة حتى، بس بما إن الحوار بقى رسمى وفى خطوبة وداخلين على جواز يبقى لازم فعلا تفكروا فى الموضوع دا بجدية. بمعنى إنك تشوف دخلك كام فى الشهر وكام فى السنة كلها وتقريبا هتقدر تحوش كام

وتسأل أصحابك إللى حوليك إللى سبقوك وتعرف منهم أسعار المدارس إيه ومصاريف طفل بأكله ومتابعة الدكتور والأدوية واللبس هتعملها كام فى الشهر، الحوار مش سهل خالص ومش هتقدر ابدا تسيطر عليه أو تتحكم فيه بس بالتقريب هتقدر تفهم ظروفك وتعرف إزاى تقدر تعيش إبنك أو بنتك فى

مستوى كويس . أما بالنسبة لأسماءهم فأنت ممكن تختار من إللى هى هتقول عليه مش أكتر من كده.

unnamed-7-.jpg


شارك هذا المقال: