راجل حول العالم .. #5 باريس - فرنسا

عمرو موسى

باريس, أكيد سمعت كتير عنها, وإتحكالك من الناس اللي زارتها عن إزاي هي جميلة أو عن إزاي الناس بتبالغ فيها وإنها مجرد مدينة مليانة بالسياح اللي زاحمين كل حتة, هحاول أحكي عن تجربتي هناك وأتكلم عن النقط اللي الناس متكلمتش عنها كتير أو ممكن يكونوا ميعرفوهاش

A photo posted by Amr Ahmed Moussa (@themouu) on


مبدأياً قبل ما أروح كنت حاسس بنسبة كبيرة إني هكون من الناس اللي هتقول إن باريس مدينة مبالغ فيها ومتصيتة علي الفاضي, عشان أنا في العموم مبحبش المدن الزحمة اللي صورها علي الانترنت تكون تحفة بس هيا في الحقيقة حاجة عادية جدا, بس بصراحة لازم أعترف إني كنت غلطان, باريس حتة من الجنة حتي لو زحمة وغالية ومليانة سياح

أول حاجة لازم أتكلم عنها هي برج إيفل, مكنتش أعرف إنه كبير قوي كده, طوله 324 متر يعني حوالي قد برج القاهرة مرتين, بتقدر تشوفه من أي حتة عالية في باريس, وكمان بتقدر تشوفه بوضوح من الطيارة, قدامه جنينة كبيرة أوي ممكن تروح تقعد فيها, تخيل كدة قد إيه حلو إنك تروح الصبح تفطر في الجنينة دي والبرج قدامك, وحوالين البرج بيبقى فيه الناس اللي بتغني وبتعزف فبيدوا جو جميل للمكان

A photo posted by Amr Ahmed Moussa (@themouu) on


مش برج إيفل بس اللي قدامه جنينة حلوة ممكن تقعد فيها, باريس مليانة جناين مفتوحة للناس, خصوصا إن الصيف إبتدي يدخل والجو هناك كان حلو, في معظم الجناين بتلاقي فيه كراسي وشيزلونجات للناس تقعد تستمتع بالشمس, ناس مرفهة يابا!

A photo posted by Amr Ahmed Moussa (@themouu) on



الحاجات اللي تتزار في باريس كتير أهمهم كنيسة نوتردام والساكركير اللي يعتبروا من أهم الكنايس اللي في العالم, الأرك دي تريومف, شارع الشانزليزيه, ومتحف اللوفر طبعا, ممكن تدخله ببلاش لو إنت طالب, بس المتحف كبير أوي لإنه أكبر متحف في العالم يعني ممكن ياخد يوم كامل ومش هتعرف تخلصه كمان, الجزء المصري اللي جوا من أحسن الحاجات اللي في المتحف بشهادة كل الناس هناك

A photo posted by Amr Ahmed Moussa (@themouu) on

A photo posted by Amr Ahmed Moussa (@themouu) on


باريس كمان فيها الفرع الوحيد لديزني لاند في أوروبا, مكنش عندي الفرصة إني أروح بس كل الناس اللي راحوا حتي لو مكنوش بيحبوا حاجات ديزني وهما صغريين عجبتهم جدا وقالوا إنها تستاهل

نيجي بقي للكلام اللي يزعل, باريس غالية في كل حاجة, تعتبر أغلي مدينة أوروبية روحتها لحد دلوقتي, الفلوس بتطير في الهوا, عشان كده لو ناوي تروح لازم تعمل حساب الموضوع ده


لو عايز تتعرف على أجزاء راجل حول العالم اللى فاتت :

راجل حول العالم.. #1 برلين - ألمانيا 

راجل حول العالم.. 2# فينيسيا - إيطاليا 

راجل حول العالم.. #3 روما- إيطاليا   

راجل حول العالم.. #4 براج - التشيك 


شارك هذا المقال: