انتشر امبارح فيديو لشاب مصرى بيحاول يتكلم مع بنت وبيعزمها على قهوة فى شارع من شوارع التجمع الخامس ..

يمكن يكون ده خبر عادى او حاجة عادية فى أى بلد لا تعشق الهرى والحوارات ، فى بلد الرجالة فيها بتعامل البنات بشكل طبيعى والبنات عارفة كويس الفرق بين الإعجاب أو التحرش ...

احنا بندافع عن الراجل اللى طالع فى الفيديو مش من منطلق ان احنا راجل دوت كوم ولكن من منطلق البشرية والإنسانية اللى المنطق فيها قرب ينتحر للى بنعمله كمصريين وخاصة كمصريات .. كل واحدة غاوية شهرة تعمل فيديو وتألف حدوتة وبوست على حاجة تافهة !

أيوة تافهة الولد كان محترم وبيقول حاجة بتتكرر كل يوم فى الجامعات والمدارس ومواقع التواصل الإجتماعى بس مع بنات مش غاويين شهرة !

ينفع نموت كل القطط اللى فى الدنيا ؟ لأ.. ليه ؟ علشان فيه حاجة اسمها توازن بيئي لو القطط ماتت الفيران هتاكلنا ..

وهكذا لو الولاد والبنات متعرفوش على بعض بشكل محترم واحنا فى 2018 يعنى هننقرض !