لو قالتلك كدة .. إوعي تخليها تكمل كلام

مصطفى سامى

انت اول راجل في حياتي :
كتير مننا كرجاله بيسمع الجملة دي في بداية اي علاقة له بغض النظرعن شكل أو سن الانسانة اللي هيرتبط بيها ..  
و بعيدا عن مدى مصداقية الجملة دي – اللي في الغالب بيكون كدب -  الا ان في كتير من الرجاله لسه واحد من شروطهم انهم يتجوزوا بنت يكونوا هما اول حد في حياتها .. و للاسف اصرارهم على الشرط ده بيخليهم يختاروا شريكة حياتهم غلط .. و مش بعيد يطلعوا رقم خمسة او ستة في حياة البنت دي ..  
عموما لو انت واحد من الرجاله اللي بيدوروا على بنت عشان يسمعوا منها الجملة دي " انت اول راجل في حياتي "  فهيبقى مهم انك تاخد بالك من باقي الجمل اللي جاية دي خاصة لو كنت في بداية العلاقة :

1-    احلى حاجة في علاقتنا انها مختلفة ...
الجملة دي هي اكبر كدبة ممكن تعيش فيها..  مفيش حاجة اسمها علاقة مختلفة كل العلاقات شبه بعض بكل تفاصيلها من اول النظرة لحد السرير !  فياريت متقنعش نفسك بغير كده ولا تعلي سقف طموحاتك او تكون متخيل ان البنت هتتنازل عن حاجة و حتى لو اتنزلت عن شيء فده اكيد عشان تكسب غيره..

2-    ماما بتحبك قوي ..
اول ما تسمع الجملة دي لازم قلبك يتقبض .. مش تقليل من الست حماتك المستقبلية ولا حاجه لا سمح الله  .. لكن في الواقع الجملة دي بتكون هي اول اشارة من البنت عشان تاخدك في العلاقة للشكل الرسمي و الخطوبة و الجواز .. فياريت متفرحش قوي الا اذا كنت جاهز فعلا للخطوة الرسمية دي ...
ملحوظة : الجملة دي ممكن تتقال باشكال تانية زي ( انت فيك شبه كبير من بابا عشان كده حبيتك – او ماما بعتالك السلام – او لازم ادوقك صنية البطاطس اللي ماما بتعملها )

3-    انت في جواك حاجة مخبيها ؟
حتى لو مكنتش مخبي اي حاجة  فخليك متأكد ان السؤال ده هيتسألك في وقت معين ؟ و طبعا انت كراجل بتعتبر ان دي فرصة تطلع فيها اللي جواك.. صحيح كلمة " بحبك " سحرية و بتحس معاها بطعم مختلف .. بس مفيش مانع لو استنيت شوية على الأقل عشان متحطش نفسك في موقف محرج لان كده كده البنت هتتقل و تتفاجىء و تعمل نفسها مش واخده بالها ..

4-    انا بحب الورد قوي ..
في الواقع مفيش بنت بتحب الورد لكن كل بنت بتستنى انه يتجبلها ورد عشان تقدر تتباهى بيه و تصوره و تفرج عليه صحابها..
و البنت عموما لما بتقول الجمله دي هي بتفتحلك الباب قدام فكرة انك تجيبلها هدايا ..
و هنا لازم تكون حذر جدا .. و متحاولش انك تجيب هدايا كتير في بداية العلاقة .. وفر الموضوع ده لمرحلة تانية .. لانك لو بالغت في الهدايا مع بداية العلاقة ده هيوصلك لحاجة من اتنين...  يا اما هيضطرك انك تصرف مبالغ كتير جدا على مدى العلاقة او ان هيجيلك يوم و تخفض من نوعية الهدايا و ده للاسف هيحسس البنت بعدم الاهتمام.. فخليك ديما مع الهدايا الرمزية اللي معانيها في علاقتكم مش في قيمتها و سعرها .

5-    انا اصلا مبحبش النكد..
لو مع اول خناقة ليك سمعت الجملة دي من البنت اللي بتحبها فاعرف انك داخل على ايام سودة و ياريت تهرب بسرعة .. و ده  لسبب بسيط  انه مفيش بنت مش نكدية و لو حابب تتاكد من ده فياريت تروح تقعد مع الحاج والدك قعدة صفا و تاخدها فيها رايه عن علاقته بوالدتك ..  فما بالك ببنت نكدية و مش حاسه بده ...


شارك هذا المقال: