بالتفاصيل .. إزاى تفتح مشروع ناجح اون لاين #2

أحمد صلاح

اتكلمنا فى الموضوع اللى فات عن ان النشاط التجارى اون لاين وفتحك لصفحه فيس والبيع من خلالها بيوفرلك فى تكاليف مشروعك كتير .. انهارده هنجاوب عن اكتر سؤال بيتسأل من كل الناس المكسله تشتغل فى المجال ده بسبب هيا مش عارفه تشترى البضاعه منين ..

وهنبدأ " بالملابس "

ويمكن هيا من اكتر الحاجات اللى بتتباع اون لاين , الملابس بشكل عام ممكن تشتريها من مصانع والمصانع دى كتير وفى اماكن مختلفه كل اللى عليك تدخل جوجل او يلو بيدجز وتكتب فى البحث "عناوين مصنع ملابس " هايطلعلك اسماء لمصانع كتيره وارقامهم ممكن تتواصل مع المصانع القريبه منك

انت لما تنزل تروح المصنع ده لازم تعرف انه هيتبسط بيك ليه ؟؟ لانه عايز يبيع وانت هتبقى عميل عنده وكمان برده لان المصانع دى اغلبيتها بيبقه عندها مشكله تسويق يعنى عندها بضاعه كتيره ومش عارفه تسوقها زى المصانع الكبيره ..

انت ممكن تروح تشترى اللبس اللى انت شايف انه هيتباع بسهوله وزوقه حلو ومش شرط تشترى بالدسته ممكن تتفاهم معاهم وتشترى نص دسته .. وفى ناس بتعمل حاجه حلوه بتنزل تصور اللبس وتعرضه على صفحه الفيس اون لاين ولما حد يطلبه منها بتعمل اوردر للمصنع بالبضاعه

أهم حاجتين تاخد بالك منهم وانت بتشترى ..الحاجه الاولى : لو مثلا لقيت تيشرت جمله بـ 50 جنيه لازم تسال نفسك هتقدر تبيعه بالسعر دا فى حاله انك ماعرفتش تبيعه بمكسب بحيث انك ماتخسرشى فيه والحاجه التانيه : انك لازم تتفق مع المصنع دا انك ترجعله اى حاجه فيها ديفوهات او عيوب تصنيع خلال فتره معينه

طيب ايه هيا الاماكن التانيه اللى ممكن تشترى منها ؟؟

- انزل ميدان العتيه هتلاقى فيه مكاتب فى العمارات اللى هناك

- الموسكى وهتلاقى هناك تنوع كتير اوى
- شارع الترعه البولاقيه بعد نفق شبرا على اليمين
- القنطره وهتلاقى هناك لبس مستورد كتير
- المحله الكبرى

"منتجات 2.5 و 7.5 "

المنتجات دى بتتباع بشكل كبير اون لاين برده لانها بتبقى رخيصه ودى هتتجاب منين
- الفجاله قدام محطه مصر هتلاقى فى الشوارع الجانبيه بضاعه كتير وبتتباع بالدسته
- درب سعاده فى الموسكى
- النزهه

" الشنط الحريمى "
اسعارها دايما بتكون نسبيا غاليه فى المحلات مع ان بالجمله بتكون اسعارها حلوه اوى وهتتباع هوا معاك ودى هاتجيبها من "درب اّيه" فى باب الشعريه

" الادوات المنزلية "

هاتروح تشتريها من "أبو النمرس" بعد المنيب

"قماش "

ده لو عندك هواية التفصيل وعندك ماكينه خياطه وعايز تعمل شغل بايدك .. هاتجيب القماش من "المطرية شارع الترولى" وهتلاقى القماش بيتباع بنص التمن وبيتباع بالكيلو
وبكده نكون غطينا نسبه كبيره من اماكن الشرا لاهم المشاريع اون لاين , انت بقه قررت تبدأ بأيه ؟! .. لوعندك نيه اتكل على الله وابدأ وبطل كسل واسعى وبكره مشروعك الصغير يكبر


شارك هذا المقال: