بالتفاصيل .. إزاى تفتح مشروعك أون لاين #1

أحمد صلاح

فى ظل ظروف البلد الصعبة اليومين دول .. وارتفاع الاسعار كتير مننا دلوقتى بقه بيفكر يشتغل شغلانتين وتلاته عشان يقدر يحقق دخل اكبر .. وبرده شباب كتير نفسهم يفتحوا مشروع تجارى خاص بيهم .. بس يجى العائق قدام كل الشباب وهيا تكاليف المشروع ده لان دلوقتى كل حاجه غاليه فلو اى شاب فكر يفتح مشروع ولو حتى محل بقاله هيبقى قدامه تكاليف كتير زى الايجار وتشطيبات المحل ومصاريف الدعايه .. الخ ده غير طبعا التراخيص واللف على المصالح الحكوميه والروتين الجميل ..


انهارده هنتكلم عن المشاريع الاون لاين ودى انتشرت كتير اليومين دول ونجحت بصوره غير طبيعيه وده لاسباب كتير اهمها ان تكاليف المشروع هتكون اققل بكتير وتقريبا مصاريف الاعلانات تكاد تكون معدومه ..
هنتكلم بشكل مفصل عن كل حاجه فى المشاريع الاون لاين وهانقولك كمان ايه اللى ممكن تشتغل فيه وهنجاوبلك على السؤال بتاع اجيب البضاعه منين ؟؟ ... وهنقسم الموضوع على مرتين عشان هنتكلم بشىء من التفصيل
البداية

ميزه المشاريع الاون لاين انها مش بتحتاج اى تكاليف ايجار وكمان بتوفر عليك الدعايه والاهم من كدا انها بتستهدف زباين من اماكن مختلفه وبعيده
واول خطوة هيا انك تفتح صفحة او جروب على الفيس بوك وتسميها الاسم اللى يعجبك والافضل انها تكون مرتبطه بالنشاط اللى انته هاتعمله

وده لينك الفيس بوك عشان تعمل صفحه

https://www.facebook.com/pages/create/

وده طبعا بعد ماتختار الحاجه اللى انت قررت هاتبيعها اون لاين .. وقبل ما اقولك على اكتر الحاجات اللى بتتباع اون لاين وناجحه وتجيبها منين .. لازم تقعد تفكر مع نفسك الاول وتدرس السوق وتشوف ايه اللى انت ممكن تكون فاهم فيه ..

فكر بره الصندوق

مش لازم تكون الصفحه او الجروب ده بيبيع سلعه .. فيه افكار كتير ممكن تفكر فيها ومتكنشى اتعملت قبل كدا زى انك ممكن تقدم خدمه .. ودى امثله لحاجات مش موجوده فى الوقت الحالى اون لاين بشكل كبير وممكن تبدأ بيها
ممكن تقدم خدمه نقل طرود حاجه كده زى الديلفرى

ممكن لو عندك عربيه مثلا ممكن تقدم خدمه ليموزين بعربيتك مش هتخسر حاجه بدل العربيه مركونه تحتك وخاصه لو حاسس ان العائد من اوبر وكريم مش مغرى
ممكن تعمل اتفاق مع المحلات على خصومات لو حد اشترى منهم من خلال الصفحه وممكن تعرض على صفحتك دى العروض وافضل الاسعار واصحاب المحلات هيرحبوا بالفكره لانهم اكيد عايزين يبيعوا

اعلانات الفيسبوك

ناس كتير هتقول ان صفحه الفيس دى مش هاتتشاف كتير ومش هقدر اوصل لناس كتير اعرضلهم افكارى او الحاجه اللى انا ببيعها ... لا يابيه .. الموضوع دلوقتى بقه سهل جدا لان الفيس بيعملك اعلانات وهتلاقى صفحتك بتزيد يوم ورا التانى بس طبعا الموضوع بفلوس بس مش كتير .. يعنى ممكن تبدأ تعمل اعلانات ب 200 جنيه فى الاسبوع ودا رقم بسيط لميزانيه التسويق بتاعت المشروع .. واللينك دا هيوضحلك اكتر

https://www.facebook.com/business/help/547448218658012

استنونا فى المقال الجاى بقه واللى هاقولكم فيها اشهر الحاجات اللى بتتباع اون لاين وبتتجاب منين فى مصر زى الملابس والادوات المنزليه والاكسسوارات الحريمى ...


شارك هذا المقال: