بعد سلسلة أفلام عبقرية .. العالم ينتظر لغز " نولان " الجديد

أحمد سامي

الحدث الفني الأهم بالنسبة لعشاق الأفلام الأجنبي و اللي تم الاعلان عنه مؤخراً .. مش هو جوائز الأوسكار و لكن كان اعلان المخرج المبدع  كريستوفر نولان عن فيلمه الجديد و اللي هينزل بعنوان   Dunkirk   

      
الفيلم هيحكي عن أحد بطولات الجنود في بداية الحرب العالمية الثانية من خلال عملية سميت بأسم دانكرك أو عملية دينامو و دي كانت عملية الانسحاب الأشهر في التاريخ بعد ما الألمان في سنة 1940 حاصروا القوات البحرية الانجليزية و قوات الحلفاء  في ميناء دانكرك في فرنسا .


 المعروف أن في بداية الحرب الألمان كانوا مسيطرين بشكل كبير علي سير المعركة و عشان كده مهمة إخلاء الجنود و قوات الحلفاء كانت تعتبر مهمة مستحيلة و كان كل أمل ونستون تشيرشل رئيس وزراء بريطانيا في الفترة دي انه ينقذ 20.000 جندي لكن في النهاية انقذوا أكتر من 300.000 !

newsdunkirk-tl.jpg


هنا كل عشاق نولان هيستنوا الابهار اللي ممكن يعمله في اخراجه للفيلم و ايه ممكن تكون المفاجأة اللي عودنا عليها في نهاية كل فيلم و اللي بتقلب علي كل المشاهدين الطربيزة خصوصا ان الفيلم عن أحداث حقيقية تمت بالفعل .


نولان معروف عنه انه بيحضر كويس النص اللي هيخرجه و بيحترم جمهوره و المعلومات اللي هيقدمها من خلال الفيلم و ده كان واضح جدا من خلال فيلمه الأخير Interstellar  اللي استعان فيه بعلماء في الفيزياء و الفضاء عشان يخرج الفيلم بالشكل المبهر اللي كلنا شوفناه .


الفيلم كمان هيطرح جدل و خناقة بين ألتراس نولان و ألتراس ستيفن سبيلبيرج اللي بيعتبره عشاقه أنه أفضل من قدموا أفلام عن الحرب العالمية و أن مفيش فيلم يقدر ينافس     Saving Private Ryan  اللي مفيش ولا فيلم من اللي أنتجوا عن الحرب  من سنة 1998 ( دي سنة انتاج الفيلم ) قدر ينافسه سواء في الاخراج أو الحبكة الدرامية أو حتي في التمثيل اللي كان بيمثل بطولته العظيم توم هانكس.


ناقص بس نقول أن بطل فيلم دانكرك هيكون تلميذ نولان النجيب توم هاردي اللي أداءه التمثيلي حصل فيه نقله نوعية من أول تعاون ليه مع نولان من خلال فيلم  Inception مرورا بظهوره في الجزء الأخير من سلسة  The Dark Night  وتأثير نولان علي توم هاردي ظهر في فيلمه الأخير  The Revenant و اللي أترشح من خلاله لجايزة الأوسكار السنة دي في دور مساعد . الفيلم تم اعلان ميعاد طرحه في السينما في يوليو 2017 و طبعا تفاصيل الفيلم هيتم التعتيم عليها و دي عادة نولان عشان يخلينا كلنا مستنيين لغز فيلمه الجديد ....

tumblr_liego9Qyyw1qa3j7jo1_500.jpg

يا تري مخبيلنا ايه يا نولان !


شارك هذا المقال: