سبع قواعد للنجاح على طريقة نجوم الجيل

أحمد عصام

تعريف كلمة جيل .. الجيل هو وحدة قياس زمنيه يتم تقديرها عن طريق حساب متوسط الفترة مابين ولادة الآباء وولادة أبنائهم ..وتقدر عادة بـ 33 سنه..ايه التعقيد ده!


بمعنى ابسط هى الفتره الزمنيه اللى ف خلالها بتتغير مفاهيم وعادات كافيَه انك تقدر تفرق بسهول بين مرحلتين عمريتين وتقدر من خلالها تلاحظ الفرق ف تصرفاتهم و اسلوب حياتهم.
طب استفدت انا ايه دلوقتى ؟ وايه علاقة اللى قلته بالنجاح وجو الـHuman Development

اللى انا متوقع انك هاتقوله؟
بص يا سيدى..انا مش هنا علشان اسمّعك كلام يمكن قريته او سمعته ف 100 مكان قبل كده...ولا علشان اقولك الوصفه السحريه اللى هاتجيب من الاخر..ببساطه لان النجاح مش بالسهوله دى..انت هنا ليه؟ علشان انا متأكد انك دوست على لينك المقال ده لهدف ما فى دماغك..حياه معينه او حاجه عايز تعملها..و ببساطه..انا عايز اوريك الطريق..وانت واختيارك..ياتشوفه..ياماتشوفوش

طب ايه علاقة تعريف الجيل بالكلام ده؟
خلينا نرجع لورا 35 سنه..يعنى تقريبا اوائل التمانينات..و حط تعريف لشخص ناجح و اتشهر فى مصر بسبب نجاحه..دلوقتى بص على شخص تقدر تقول عليه معروف بسبب نجاحه دلوقتى..وقارن مابين عناصر النجاح من وجهة نظرك..ها..فهمت انا قصدى ايه؟


كتير مننا لما بيحاول ياخد لنفسه شخص ما يعتبره قدوه ليه..معظمنا بيختار حد اكبر منه نسبيا علشان يمشى على نفس خطواته تجاه النجاح..سواء أب..أم..او شخصيه عامه..معظمهم غالبا هايكونوا اكبر فى السن نسبيا وعدوا بتجارب يمكن لسه بدرى عليك جدا انك تعدى بيها..وبتحاول تختصر خبرتهم ف شوية نصايح بتسمعها منهم او شوية حاجات هما مشيوا عليها وبتحاول تكمل على نفس الطريق..بس لو بصيت عليها من بره..هتلاقى انك بتعيد نفس الدايره اللى هما مشيوا فيها من غير ماتفكر هل اللى هم بيعملوه ده ينفع ف الزمن اللى احنا عايشين فيه دلوقتى ولا ده مابقاش اصلا معيار من معايير النجاح بتاعة الجيل ده!


وائل غنيم..عُمر سمره..كايروكى..احمد مراد..دينا الوديدى..وغيرهم من الناس اللى اكيد اسم واحد فيهم –ان مكانش كلهم- عدى عليك قبل كده..لما تيجى تقارنه بشخصيات نجحت ف نفس المجال من 30 سنه..هل عناصر النجاح كانت واحده؟ اكيد لأ..ومهما كانت الامثله الحديثه للنجاح تبدو صغيره ف وجهة نظرة..ده لا يقلل من الفرق اللى عملوه ف انهم يعكسوا صوره ايجابيه عن بلدك زى بالظبط الصورة الايجابيه اللى عكستها نفس الامثله القديمه..وكمان 30 سنه الناس هاتبتدى تفتكرهم انهم كانوا رموز ف مجالهم.


لما جينا بصينا للامثله الجديده الى بتعكس صفة "ناجح" قدرنا نلاقى pattern  او اوجه تشابه بتوحّد مابينهم، واللى ادت بشكل او باخر انها تحطهم على طريق النجاح، وانهم يبقوا معروفين ف مجالهم، وامثله للجيل يحتذى بيها.. وعلشان انا طولت عليكم بما فيه الكفايه..خلينا نقول شويه من العناصر دى بشكل مختصر..على وعد ان لو حصل تفاعل من الناس..هانعمل جزء تانى من المقال فيه عناصر جديده بتفاصيل اكتر:

1-       حدد مجال معين لتميزك..المشاريع دلوقتى بقى اساسها التخصص..ومهما كانت حاجه صغيره..ممكن ف يوم تكون السبب انك تبقى واحد من المسيطرين على الاقتصاد بسببها..خليك فاكر ان فيسبوك كان ف يوم شغال على كمبيوتر صغير ف اوضة شاب عنده 21 سنه


2-      خلى حياتك بتتمحور حوالين الحاجه عنصر نجاحك..كل حاجه بتعملها لازم تكون لسبب او لاخر بتخدم الحاجه اللى انت عايز تنجح فيها..دراستك مصاريفك..اكلك..علاقاتك..ده لوحده هاينعكس على شكلك وعلى تصرفاتك..وهايمهدلك الطريق.


3-      خليك مختلف ف احلامك..ماتخليش حلمك انك تفتح مصنع غزل ليك ولابوك او مطعم او مجرد ابلكيشن للعبه على الموبايل..بمعنى..ماتمشيش على سكه حد غيرك كتبها قبل كده..او ع الاقل اعملها بشكل مختلف..خليك مميز.


4-       حط مجهود كبير ف طريقة تقديم نجاحك واعملها مهما كانت مكلفه...وقدم نجاحك باسلوب مش عادى..الـMarketing لاى فكره دلوقتى بقى اهم من الفكره نفسها..افتكر ان فيلم Dead Pool ميزانيته كانت 58 مليون دولار تقريبا تلتهم كان للـMarketing..ولحد دلوقتى عامل 130 مليون.


5-      خليك مثقف..كل اما تعرف اكتر ف المجال اللى انت عايز تنجح فيه كل اما بيزود فرص تميزك ف المجال ده..و وبيخلى الناس تجيلك انت دوناً عن غيرك..والموضوع دلوقتى بقى اسهل من زمان بمراحل.


6-      حاول تعمل ضجه..بعض الناس دلوقتى بقت تعمل مصيبه بس علشان الناس تعرفهم وتتكلم عنهم..بعد كده بيعرفوا يظبطوا صورتهم ف دماغ الناس ( زىLady gaga  مثلا)..وافتكر..No publicity is a bad publicity..يعنى مفيش حاجه اسمها دعايه وحشه..الدعايه دعايه.


7-      ماتنامش على فكرتك لو بدأت تنجح..حاول توصل لشريحه مختلفه او تقدم حاجه جديده مكمله لنجاحك..لو اعتمدت على الفكره المبدأيه اللى نجحت بسببها..هاتتحول لنجاح مؤقت..ومحدش هايفتكر اسمك كمان سنه.
النجاح اسلوب حياه..مش خطوتين تلاته بتمشى عليهم و خلاص..اسعى..وافتكر ف يوم انك قريت الكلام ده على Ragel.com


شارك هذا المقال: