10 نصايح لقضاء ليلة راس سنة صح

فريق راجل. دوت كوم


بص يامعلم دي شوية نصايح من الآخر لو عايز الليلة دى تعدي زى الفل عليك وتقضيها فى الروقان والإنبساط

1- متنزلش مكان مفتوح زى كافيهات فى الشارع او وسط البلد او الكوربة أو أى حاجة شبه كده .. عيال صغيرة بقا وهيصه كدابة ملهاش اى لازمة

2- لو مش حاجز انت واصحابك او اللى هتسهر معاه فى مكان بقالك فترة الافضل انك متروحش لانك هتروح مش هتتبسط وممكن متدخلش اصلاً لو العدد خلص والليلة تضرب وتتعكنن

3- ابعد عن السينمات تماماً .. مش وقت سينما خالص النهاردة علشان ممكن تكره كل حاجة ليها علاقة بالسينما وبالسنة الجديدة اصلاً من الزحمة والناس الأوفر

4- ابعد عن المولات ... مش هتعرف تتحرك ولا تقعد ولا تاكل ولا تشرب ولا اى حاجة

5- متنزلش بدرى علشان توفر طاقتك .. اتقابل قبل الساعه 12 بساعه ولا اتنين بالكتير متبتديش اليوم من المغرب يعنى ! الا لو رايحين فى حته معينه هتبتدى فى وقت معين

6- جرب مكان جديد عن اللى جربته السنه اللى فاتت أو اعمل حاجه مختلفه علشان متحسش بروتين وعدم تجديد

7- لو ناوى تقعد فى البيت وتقضيها HOME Alone اقفل الفيسبوك بتاعك والواتساب علشان محدش يقل مزاجك برساله مبعوته لمليون واحد فى نفس الوقت او صورة بابا نويل شايل شنطة لايكات

8- متتفرجش على برامج فى التليفزيون لأن كله هيكون حلقات مسجلة لأن كل المذيعين والضيوف هيبقوا مشغولين بسهراتهم وحفلاتهم فمتزعلش لو فاتك حاجة فى التليفزيون وكله هيتعاد بكرة تانى فمش هتفرق بقا

9- لو خاطب او مصاحب ومش هتتقابلوا النهاردة لازم الساعه 12 تكلمها او تبعتلها رساله على الاقل علشان متبقاش سنة سوده عليك من اول دقيقة حتى لو انت سهران فى حته او مشغول لازم تفكر نفسك وتأمن

10- خد بالك من صحتك كويس .. وانت فاهم وانا فاهم !


شارك هذا المقال: