عربية الرجالة الجديدة من BMW!

كيرلُس إدوارد

كشفت بي ام دبليو مؤخراً عن اهم عربية عندها. بعد اختبارات كتير و تجارب اكتر و نماذج تجريبية و تسريبات, كشفت بي ام دبليو عن النسخة الرياضية من الفئة الخامسة G30, هي M5 xDrive 2018 الجديدة كلياً

الجديد في M5 هي انها بتنزل بنظام M xDrive وهو نظام الدفع الكلي للعجلات و تختلف عن الطرازات السابقة ان كل الموديلات الي فاتت كانت دفع خلفي فقط وده كان بيخلي المنافسين يتفوقوا عليها نظراً لانه قوة بالحجم ده صعب التحكم فيها عن طريق الدفع الخلفي بس و معظم المنافسين زي اودي و مرسيدس و بورش بيستخدموا انظمة دفع كلي All Wheel Drive

p90273034-highres-1503333709.jpg

موتور M5 الجديد هو ­نسخة متطورة من الموتور القديم 8 سلندر سعة 4.4 لتر Twin-Turbo لكن دلوقتي بيقدم قوة مقدارها 600 حصان و عزم 750 نيوتن.متر وبكدا M5 الجديدة بتقدر تحقق اسرع رقم تسارع ل BMW من الفئة الخامسة من 0 لـ 100 كلم/س في 3.2 ثانية فقط! و من 0 لـ 200 كلم/س في 11.1 ثانية و ده رقم مبهر جداً

بي ام دبليو حرصت ان M5 الجديدة تكون اخف عن الموديل السابق لكنها اخف بحوالي 150 جكم فقط! لكن عن طريق شوية تعديلات تقدر تخفف وزن العربية فمثلاً تقدر تختار ان الفرامل تكون من الكاربون سيراميك Carbon Ceramic وده بيخفف الوزن حوالي 150 كجم كمان و عملوا السقف من مادة الكاربون فايبر و كمان بي ام دبليو صرحت انهم خففوا وزن الشكمان Exhaust

p90273039-highres-1503333608.jpg

من داخل المقصورة هتلاقي كل الفخامة و الرفاهية الي متعود عليها من BMW وكل الخامات الفخمة الجلد الي تتوقعها. بالاضافة لكراسي داعمة للسائق و الراكب الامامى و كمان هتلاحظ وجود زرارين لونهم احمر في عجلة القيادة دول من خلالهم تقدر تتحكم في اوضاع القيادة المختلفة

زي ما وضحت في الاول ان العربية بقت بتعتمد علي نظام الدفع الكلي الا ان BMW برمجت اوضاع مختلفة للتحكم في النظام ده حيث تقدر تختار 4WD و ده نظام الدفع الكلي العادي و بيوزع القوة بالتساوي علي العجلات الامامية و الخلفية

و فيه نظام جديد مختلف هو 4WD Sport بتقدر تنقل "معظم" القوة للعجلات الخلفية بس علشان تقدر تعمل دريفت بالعربية و بتنقل باقي القوة للعجلات الامامية علشان تقدر تحافظ علي الثبات و الـ Traction.

p90273048-highres-1503333589.jpg

او تقدر تختار 2WD و ده بيفصل خالص القوة عن العجلات الامامية وبتبقي العربية دفع خلفي فقط و ده منك لنفسك بقي هتقدر تسيطر علي عربية 600 حصان و دفع خلفي فقط! : D


شارك هذا المقال: