12 عمل تبرأ منهم النجوم وتمنوا مسحهم من تاريخهم !

شيماء عادل
شارك هذا المقال:

الندم أو الإعتراف بالغلط مش حاجة تعيب صاحبها بالعكس هى بترفع منه وتزود من قيمته قدام الناس وقدام نفسه، خصوصا لما تكون الحاجة دى علنية والناس كلها شايفاها. علشان كده الفنانين الكبار قبل الصغار لازم يكونوا صرحاء مع نفسهم وجمهورهم ويعترفوا إنهم إختاروا أدوار وحشة أو

عملوا أعمال فنية سيئة ومفيش مانع إنهم يذكروا السبب وراء دا، ودى حاجة هتخلى الجمهور يحترمهم أكتر. فعلى رأى الفنان الكبير عزت أبو عوف إللى قال:" أى فنان يعلن أنه مندمش على بعض أعماله هو كداب"

علشان كده فى مجموعة من الفنانين أعلنوا ندمهم على أعمال قدموها ويمكن فى منهم يصدمك.

1- أمير كرارة

unnamed-2-.jpg
بصرف النظر أن كرارة من وجهة نظرى لازم يقدم تفسير أو إعتذار أن أعماله فى الكام سنة إللى فاتت وإللى تقريبا كلهم بشكل واحد وتيمة واحدة، إلا إنه أختار دوره فى مسلسل ليلى مراد "أنا قلبى دليلى" ليعترف بإنه مش فاهم لحد دلوقتى هو إزاى عمل الدور دا ولا كان فاهم هو بيعمل إيه ولا حتى الدور دا إيه أصلا وإنه فى خلال مشواره الدور دا مضفلوش أى حاجة خالص.

2- تامر حسنى

1719879687970595099.jpg

بعد الهجوم الكبير إللى إتعرضله تامر وأغنية "خليها تاكلك" إللى عرضت فى فيلم "عمر وسلمى2" سواء من بعض الجمهور أو النقاد والموسيقين الكبار زى حلمى بكر، قرر تامر إنه يعتذر عن الأغنية دى وبرر السبب إنه مكنش يقصد المعانى والإيحاءات إللى وصلت للناس.

3- أيمن بهجت قمر

unnamed-4-.jpg

كلنا عارفين إن قمر شاعر غنائى وسيناريست كبير ورصيده عظيم سواء فى الأغانى أوالأفلام، وإنه بيشتغل مع حيتان زى الهضبة وحماقى وفؤاد والجسيمى وتامر. بس كل دا ممنعهوش إنه يطلع يعتذر ويصرح بكل وضوح وشجاعة إنه ندمان على أغنية "بعشق أمك" من فيلم "المش مهندس حسن" وقال قمر "أغنية قذرة جدا وبكرهها، وكانت أقذر حاجة عملتها فى حياتى وعيب لما أكتب أغنية فيها الكلام دا...بس للأسف كنت محتاج فلوس وكان عليا أقساط فاضطريت أكتبها، لكن طبعا ندمان عليها.

4- الزعيم

unnamed-10-.jpg

آآه تخيل حتى الزعيم عادل إمام طلع وصرح إنه فى حاجة من اعماله ندمان عليها!! وهو دوره فى فيلم "سيد درويش" وإللى قدم فيه دور صبى العالمة مع هند رستم، وقال إن الزمن لو رجع لورا كان هيرفض الدور دا.

5- منى زكى

unnamed-8-.jpg

الحقيقة الإعتراف دا صدمنى أنا شخصيا، يمكن لأنى وأنا بتفرج على الفيلم محستش إنه فيلم فاشل أو هابط أو يمكن لأنهم كممثلين مكنش باين بينهم كمية الكراهية دى... فيلم "أحلامنا عمرنا" ودورها مع مصطفى شعبان صرحت منى إنها بتتبرأ من الفيلم دا وإنه كان فيه مشاكل كتيرة أوى، وقالت السبب يمكن قلة الخبرة وعدم الإحترافية فى فريق العمل كله دا غير المشاكل مع الإنتاج نفسه.. بس الأكيد إنها عمرها ما هتكرر تجربة تانية مع مصطفى شعبان !!


6- ياسمين عبد العزيز

unnamed-11-.jpg

بالرغم من إن ياسمين ساعات كتير بتألش منها وبتقدم أفلام وأدوار دون المستوى، إلا إنها لما إتسألت عن أكتر الأدوار إللى ندمانه عليها قالت دورها فى فيلم "كركر" مع محمد سعد وبالرغم من إنها محبتش تقول الأسباب بالظبط إلا إننا كلنا أكيد عارفين السبب...

7- عصام كاريكا

unnamed.jpg

كاريكا ندم جدا على إعادة تلحينه لأغنية "حب إيه" للست وإستخدامها بطريقة شعبية فى فيلم "اللمبى" وبالرغم من إنها إنتشرت جدا لأنها كانت مع بداية اللمبى وتحقيقه لنجاح إلا إن دا زعل كاريكا أكتر لأنه حس إنه بيعبث فى التراث الفنى المصرى وإنه مينفعش يحول وستغل أغنية عظيمة بالشكل دا.

8- حورية فرغلى

unnamed-5-.jpg

يمكن تعرضها لنقد وهجوم كبير جدا وحتى إن خطيبها يقلع الدبلة لما يتفرج على الفيلم كل دا خلى حورية تعتذر عن فيلم "كلمنى شكرا" وقالت إنها مكنتش تقصد إنها ثقدم مشاهد خارجة بالشكل دا وخصوصا المشهد إللى بتظهر فيه عارية تماما من ضهرها.

9- عزت أبو عوف

unnamed-6-.jpg

فنان كبير زيه لازم يكون مثل وقدوة وعلشان كده طلع بكل شجاعة وصراحة وأبدى ندمه عن دوره فى فيلم "أيظن" وقال إن الدور دا لو إتعرض عليه إنهاردة أكيد هيرفضه لأنه مش مناسب له، وقال كمان إنه قبل الفيلم من باب المجاملة لمى عز الدين وللمخرج وإنه لما قرا السيناريو عجبه لكنه فوجئ مع بداية التصوير بحاجة تانية خالص.

10- حلمى

unnamed-9-.jpg

طبعا إحنا كلنا ممكن نكون شايفين إن مفيش دور لحلمى ممكن يكون ندمان عليه.. ودا أكيد لكنه لما إتسأل فعلا قال إنه مش ندمان على أى قرار أو أى عمل لحد دلوقتى ، لكن كان بيتمنى لو رجع لورا إنه يغير نهاية فيلم "ألف مبروك" ويخلى "أحمد" البطل يعيش ميموتش.

11- نسرين أمين وياسمين صبرى

unnamed-7-.jpg

جمعناهم مع بعض لأنهم هما الأتنين ندمانين على نفس العمل وهو مسلسل "الأسطورة" ودى حاجة يمكن أغلبنا يعرفها بعد الكلام الكتير والجدل والخناقات إللى على الهوا إللى إنتشرت خلال موسم رمضان إللى فات. والسبب وراء ندم نسرين وياسيمن إنهم إكتشفوا إن المخرج محمد سامى بيحذف مشاهد ليهم ويقصر فى أدوارهم لحساب مراته "مى عمر" إللى قدمت دور شهد ودا إللى خلى ياسمين صبرى تنسحب من المسلسل ومتكملش أخر 3 أيام من التصوير. وشوفنا كلنا تصريحات ليهم على السوشيال ميديا أو فى لقاءات تلفزيونية، فقالت نسرين " لو أعرف إن المسلسل بطولة المدام مرات المخرج أم عدسات ملونة ما كنت بدأت.. إنها الكوسة فى أوضح صورها"

وقالت ياسمين: "أنا حزينة على نفسى" وإنها متفرجتش على المسلسل من كتر زعلها ونزلت على تويتر التصريح دا

12- شيرين عبد الوهاب

unnamed-3-.jpg

لما إتسألت عن التمثيل قالت إنها مش بتحسب "ميدو مشاكل" من ضمن مسيرتها الفنية وإنها بتعتبر أول عمل حقيقى ليها هو مسلسل "طريقى" وندمها على الفيلم دا بسبب إنها كانت (زيرو خبرة) حسب ما قالت ومحدش من فريق العمل كان مهتم إنه يعلمها ويزود من خبراتها فى التمثيل وإنها بتعبر الفيلم دا مجرد رحلة مدرسية.