مين هو Mr. Robot؟

عمرو موسى

إحتمال كبير تكون شفت أسم Mr. Robot علي فيسبوك أو تويتر الفترة اللي فاتت، أو ممكن تكون شفت ڤيديو صغير متاخد من حلقة من الحلقات. المهم، Mr Robot هو مسلسل دراما أمريكي ويعتبر الشغل الشاغل لمحبي مسلسلات الدراما الأمريكاني الفترة اللي فاتت:


المسلسل بيتكلم عن عالم المبرمجين وقراصنة الإنترنت بس بشكل مختلف أو أكتر منطقية، بعيد عن القالب المشهور المتكرر عن الهاكرز إنهم بيعرفوا يعملوا ويخترقوا كل حاجة بكام دوسة علي الكيبورد بكل سهولة وإنهم Nerds زي ما الكتاب بيقول والجو ده. أحداث المسلسل منطقية جدًا لدرجة إن آخر حلقة تم تأجيلها أسبوع بسبب تشابه أحداث الحلقة مع حادثة إطلاق نار حصلت على الهوا خلال نشرة أخبار في ولاية Virginia في أمريكا!

بطل المسلسل Elliot Alderson؛ مهندس أمن معلومات في شركة AllSecure اللي بتقوم بحماية المعلومات الرقمية للشركات والمؤسسات الكبيرة, Elliot عنده مشكلة في التعامل مع الناس في الحياة الواقعية وبيروح لدكتور نفساني لأن عنده Social Anxiety Disorder (رهبة من التعامل مع الناس) بس بيحاول يتغلب علي الموضوع ده بطريقته الخاصة - واللي هي مرعبة شوية- بيعمل Hack لأي حد، ومن خلال المعلومات اللي بيعرفها بيعرف الشخص ده بيفكر إزاي وعلي أساسه يتعامل معاه إزاي. أحداث المسلسل بتتصاعد بظهور Mr Robot اللي بيحاول يقنع Elliot بأفكار ثورية ويوضح له إزاي ممكن يساعد في جعل العالم مكان أفضل بموهبته.

دي فكرة عامة عن المسلسل من غير ما أحرق عليكوا أي أحداث مهمة لو ناوين تتفرجوا. عمومًا، معظم احداث المسلسل غير متوقعة وده اللي بيخليك في أوقات كتير متبقاش فاهم أصلًا إيه اللي بيحصل، أو عايز تتفرج علي الحلقة اللي بعديها علي طول عشان تفهم إيه اللي بيحصل

 شوية معلومات كمان ممكن تحمسكم أكتر عشان تتفرجوا عليه:-

- Mr Robot  من أعلي الـRatings في تاريخ المسلسلات الأمريكي.  الـRating بتاعه 9.1 علي IMDb ولو تعرف IMDb (هو أكبر موقع للأفلام والمسلسلات في العالم) فأكيد انت فاهم يعني إيه حاجة تكون واخدة 9.1 عليه ومن  أول Season

- تم إعلان إنه هيكمل وهيكون فيه منه Season 2 نتيجة رد فعل العظيم للمشاهدين بعد إذاعة أول حلقة أو الـPilot زي ما بيسموها.

- بطل المسلسل "رامي مالك" اللي  بيقوم بدور Elliot من أصل مصري لكنه اتولد وعاش في أمريكا. شارك في كذا فيلم في هوليود أشهرهم Need For Speed, The Twilight Saga  و Night At The Museum 2  

Ramy-Malek.jpeg

مصدر الصورة: cdn.indiewire.com

- "سام إسماعيل" الكاتب والمنتج برضه من أصل مصري، وقال في حوار له إنه زار مصر بعد ثورة 25 يناير وإن الربيع العربي يعتبر من الحاجات اللي ألهمته لكتابة Mr. Robot وكمان الأزمة المالية العالمية. 

Sam-Esmail.jpg

مصدر الصورة: i.imgur.com

-المسلسل بيخليك تبتدي تفكر في طريقة استخدامك للـSocial Networks والتكنولوچيا عمومًا وإزاي المعلومات اللي انت بتنشرها على سوشيال ميديا وشايفها غير مهمة علي الإطلاق، ممكن تساعد ناس تانية في اختراق حياتك الخاصة وشغلك والشركة اللي انت شغال فيها.

-تم عرض Season 1 من Mr Robot  المكون من 10 حلقات وهيتم عرض Season 2 في  2016.


شارك هذا المقال: