خمس إشاعات طاردت مايكل جاكسون فى حياته

فريق راجل. دوت كوم


بمناسبة الحديث عن مايكل جاكسون اللى رجع بقوة داخل مصر اليومين اللى فاتوا بسبب زيارة العرض العالمي Thriller Live للقاهرة فى كايرو فيستيفال هنفكركم بأكتر 5 إشاعات طلعت على أسطورة البوب أثناء حياته :

1- غير لون جلده !
لون مايكل جاكسون كان نقطة نقاش وجدل كبيرة جداً فى العالم خصوصاً لما ظهر لأول مرة ببشرة بيضاء عكس لون بشرته السمراء فى كليب Black Or White سنة 1991، وكل منطقة فى العالم ألفوا إشاعة مختلفة وكانت سبب كبير فى زيادة شعبيته من كتر الكلام الكتير اللى طلع ولكن الحقيقة إنه أعلن بعد كدة إنه تعرض لإصابة بمرض جلدى – البهاق – أفقده لون بشرته الأساسية وغنه مسعاش لده بنفسه.

2- عمليات التجميل
فى نفس إطار الإشاعات المتعلقة بشكله برضو العالم كله مكنش لسه يعرف أوى فكرة عمليات التجميل والتغيير فى الملامح ، والمعروف عن مايكل جاكسون إن ملامح مناخيره إتغيرت فجأة وإعتبر الناس وقتها إن دى عملية من عمليات التجميل اللى بيسمعوا عنها – الناس طول الوقت فاكرة إن مايكل مش عاجبه شكله – وبرضو الخبر إنتشر جداً ولكن الأطباء والمقربين منه قالوا بعد كدة إنها كانت عملية لتجميل مايكل من آثار حادثة اتعرض ليها قبل كدة واتحرق جزء من فروة راسه ووشه وإن واحدة من العمليات أثرت علي قدرته على التنفس فلجأ انه يعمل عملية تانية في مناخيره تساعده أكتر على التنفس والغنا وده اللى غير شكلها.

3- ميوله الجنسية
طبعاً العالم تجاوز الحاجات دى دلوقتى ..لكن وقت مايكل جاكسون كانت التساؤلات دى لسه بتاخد حجم أكبر من اللى بتاخده حالياً وناس كتير بدأت تسأل عن ميوله الجنسية وتشكك فيها وتخمنها لأنه لجأ فى معظم الأحيان لوضع مكياج علشان يدارى آثار المرض ولأنه كان حريص جداً على إخفاء حياته الشخصية وده اللى خلي التساؤلات تكتر .

4- بيكره العرب
الجمهور العربي فيه منه كتير جداً بيعشقوا مايكل واتربوا على الاغاني والكليبات بتاعته أيام ماكانت بتتحط لسه على شرايط فيديو ، ومع ذلك ناس كتير جداً روجت للإشاعة دى لدرجة إن فيه كلام كتير اتقال عن تصريح لمايكل فى احدى المجلات الأمركية إنه لو كان يعرف ان العرب هيسمعوه مكنش غنا أصلاً !
طبعاً مايكل نفي الكلام ده والمقربين منه بعد كده بشكل عملى عن طريق ظهوره مع بعض الشخصيات العربية فى مناسبات عامة كتير وزيارته لبعضها كمان.

5- إسلام مايكل جاكسون
القصة بدات بإنتشار مقطع فيديو عليه اغنية دينية لشخص مش عربي صوته يشبه لحد كبير صوت جاكسون ومن هنا انتشرت اشاعة اعتناقه للاسلام قبل وفاته واتكلم عنها العالم كله فيه اللى أكد وفيه اللى نفي .. لكن مايكل كان ليه أخ أكبر منه ومقرب ليه جداً اسمه Jermaine Jackson اعتنق الإسلام فى التمانينات وسمه نفسه محمد عبد العزيز وده اللى خلى الناس تقول إنه نجح فى اقناع اخوه الصغير مايكل بدخول الاسلام ولكن برضو دى هتفضل مجرد إشاعة قابلة للتأكيد او النفي.

الإشاعات عمرها ماقللت من مسيرة اى نجم أو فنان وفى الأخر الكلام بيتنسي والفن بس هو اللى بيفضل .. علشان كده بندعوكم تروحوا تستمتعوا بفن مايكل جاكسون فى العرض العالمى

إوعي تفوت الفرصة دى .. جاتلك لحد عندك .. وممكن تحجز أون لاين دلوقتى من اللينك ده

http://ticketsmarche.com/se_1812_thriller.html

 


شارك هذا المقال: