بنقترح عليك: أجدد أجزاء Mission Impossible

أسامة البرقوقي

مع كل مرة بعرف إن فيه فيلم Mission Impossible جديد ببتدي أفكر يا تري توم كروز هيعمل إيه المرة دي وهل ده هيبقي نهاية واحدة من أنجح سلاسل الأفلام في التاريخ وهيبتدوا يدوروا علي ممثل شاب يكمل مكانه زي ما بيحصل كل فترة في أفلام جيمس بوند وأفلام  Bourne ولا هيبقي بداية جديدة وتوم كروز هيثبت إن مهما كانت أفلامه مؤخرًا ما بتنجحش أوي بس أول مابيبقي "إيثان هنت" الموضوع بيختلف ومع نزول Mission Impossible: Rogue Nation  اتأكدت إن ده أكيد مش هيبقي أخر فيلم. ودي أكتر حاجات عجبتني في الفيلم بس الأكيد إن أي حد هيلاقي أكتر:

رجع للكلاسيك:

كلاسيكي؛ رجع لأفلام المخابرات الكلاسيكية. جو المنظمة السرية اللي محدش قادر يحدد وجودها من عدمها، عدم مساندة الـCIA لفريق "إيثان هنت" ومطاردتهم له والمفاجأت اللي بتظهر في النص واستخدام الأقنعة و الـMind Games مع شرير الفيلم. التفاصيل دي خلت الفيلم ده من أحلي الأفلام في السلسلة.

عملية السرقة:

ماينفعش يبقي فيه  فيلم Misson Impossible من غير عملية سرقة لحاجة من مكان محدش يقدر يوصل له غير طبعًا توم كروز والفريق بتاعه، والمرة دي ماخيبش ظننا برضه، وكانت عملية متنفذة سينمائيًا بمهارة ومش كلها معتمدة علي التكنولوچيا زي ما توم كروز معودنا إنه يطلع فوق برج و ينط  لبرج تاني أو طبعًا لقطة نقطة العرق اللي كانت من أشهر اللقطات في تاريخ السينما ودي من الحاجات اللي توم كروز بيلعب عليها دايمًا في أفلام Mission Impossible.

ريبيكا فيرجسون (أوف أوف..خطيرة!):

rebecca.jpg

مصدر الصورة: screenrant.com


من وجهة نظري، دي المفروض تبقي Bond girl اللي جاية وكانت مفاجأة من مفاجأت الفيلم خصوصًا إنها معملتش أفلام تذكر غير فيلم Herclues والباقي كان مسلسلات ومامثلتش أكشن قبل كده زي ما توم كروز بيقول في الفيديو ده بس أختاروها عشان عندها قدرات بدنية، وهي قدرات - بصراحة- باينة جدًا في الفيلم:


المطاردات:

فيلم Mission Impossible مايكملش من غير على الأقل مطاردة واحدة سواء كانت عربيات أو موتوسيكلات وهم مابخلوش علينا وكان فيه الأتنين، صحيح ماكنوش أحسن حاجة لأنهم ماخدوش وقتهم في الفيلم وأنتهوا نهايات غريبة مش مثيرة زي مثلا مطاردة القطر في الجزء الأول، بس أكيد من أحسن مفيش. 

الخلاصة: الفيلم يستاهل إنك تلحقه في السينما وتستمتع بيه.


شارك هذا المقال: