بعد إختراق حسابه .. إعرف" تفاهة "باسوورد مارك زاكربرج

عمرو موسى


دايما الواحد بيبقى قلقان حد يعمل هاك للإيميل أو الفيسبوك أو أي أكونت ليه علي السوشيال نيتوركس لإنها عادة عليها معلومات مهمة عنك, عشان كدة دايما بناخد بالنا إن محدش يكون عارف الباسورد, أو نحاول نخليها حاجة صعبة مش متوقعة, وده اللي فشل فيه مارك

عادة سيئة في معظمنا إننا بنعمل نفس الباسورد لكذا حساب, يعني مثلا يكون باسورد الإيميل بتاعك وفيسبوك وتويتر نفس الباسورد, عيب الموضوع ده إن لو لا قدر الله حد عرف الباسورد دي فإنت كل حساباتك إتضربت, إحنا بنقع في الغلطة دي عشان بنكسل نحط باسورد لكل حساب لأحسن ننساهم, بس مكنش عمري هصدق إن مارك زاكربرج بنفسه صاحب أكبر سوشيال نتورك في العالم يقع في نفس الغلطة

الموضوع بدأ لما تم الإعلان عن إختراق 500 مليون حساب علي لينكد ان, واللي من حظه الإسواد كان حساب مارك واحد منهم, والموضوع كان سيء أكتر عشان مارك عامل زينا وكان عنده نفس الباسورد لكذا حساب, الهاكر قدر يوصل لحسابه علي تويتر ويكتب تويت يثبت إن تم إختراقه, وقدر كمان يوصل للأكاونت بتاعه علي إنستاجرام وبينترست

9678156_mark-zuckerberg-got-his-twitter-hacked-after_a2f80fd8_m.jpg

المضحك في الموضوع إن باسورد مارك كانت حاجة تافهة جدا, dadada اللي هوا لو عيل صغير الباسوورد بتاعته مش هتبقي كده

المشكلة إن دي مش المرة الاولي اللي حساب من حسابات مارك يتم إختراقه, من حوالي سنتين فيه هاكر فلسطيني إسمه خليل أخد باله إن فيه ثغرة أمنية في فيسبوك بتتيح للناس إنهم يكتبوا بإسم بعض, بعت لفيسبوك محدش عبره, فقرر إنه يدخل علي صفحة مارك شخصيا ويكتب من عليها, ونجح في كده فعلا, وده اللي بيثبت مقولة باب النجار مخلع


شارك هذا المقال: