إزاى تفك الملل من العلاقة الزوجية

مروان حازم

طبعا كلنا واخدين بالنا من حالات الطلاق اللى انتشرت و حالات الملل و الخناق اللى بتبقى واضحة جدا بين الازواج، دة غير المسلسلات الى كل مواضيعها تقريبا بقت ان واحد و مراته حسوا بملل فا اتطلقوا او راح عرف عليها واحدة تانية و الحوارات دى. و طبعا الاسباب بتبقى معروفة او شبه موحدة

فى كل الحالات الى حوالينا و هى انهم فاكرين انهم وصلوا لطريق مسدود و مفيش امل يكملوا و دة اغلب الوقت بيبقى غلط ساعات بيبقى صح بس مش كتير. طيب هل الغلط على الراجل و لا الست دة مش موضوعنا دلوقتى، الموضوع الاهم انك المفروض الراجل اللى المفروض يقود العلاقة دى للطريق

الصح مش يعند و ينشف دماغه و يدمر الدنيا. معروف عن الستات انهم بيفكروا بعاطفتهم اكتر من عقلهم و الراجل العكس و فى اللحظات الى بتحسوا فيها بالملل دى بيبقى كل واحد عايز التانى يفكر فى التانى و لكن الانانية الى موجودة جوا كل واحد بتخليه يفكر ان الطرف التانى هو اللى مش بيضحى

كفاية لانجاح العلاقة دى. فا تعمل ايه ايه بقى قبل الدنيا ما تقلب غم و عك و العلاقة توصل لمرحلة الطريق المسدود دة بقى الى هنتكلم عليه النهاردة.


بغض النظر عن المشاكل الى انتوا بتمروا بيها بس انت لازم تبقى الحيطة الى تتسند هى عليها حتى لو هى مفترية فا هى بقت كدة من ضعفها بس فا حاول تخليك مرح و فرفوش معاها عشان تخلى المود ظريف. المؤشرات لحياة رايحة ناحية الملل هى انك تحس انك مش مبسوط معاها و على طول

حاسس انك فى روتين مبينتهيش و مفيش فسح او خروج او حتى لما بتخرجوا بتنتهى الخروجة بخناقة دة غير انها على طول مشغولة بالاطفال لو فيه او مبقيتش مدياك اهتمام كافى او انك بقيت مشغول زيادة عنها و مبقيتش تفكر فيها زى زمان.


بما ان احنا حطينا ايدينا على بعض الاسباب الى ممكن تكون مزهقاكوا من بعض نيجى بقى لبعض الحلول المقترحة الى ممكن تنقذكوا من خراب البيت الى بنيتوه سوا، و اتمنى انكوا تجربوا الحلول دى و هتشوفوا النتيجة هتبقى ايه.

man-1485335_960_720.jpg


اولا: يوم اجازتك لو مش هتخرجوا و قررتوا تقعدوا فى البيت اعمل الاتى يا باشا انت تستنى ساعة اما هى تدخل تحضر الغدا و تدخل معاها تساعدها و تشاركها و تقعد تتغزل فيها و قد ايه انت حاسس بالمجهود الى هيا بتعمله و ممكن تقولها "علمينى بقى بتعملى الاكل ازاى" و اضعط على نفسك و خليك مستمتع و هيا بتشرحلك و حسسها باهميتها بالنسبالكو حضروا الاكل و السفرة مع بعض و بعد الاكل ساعدها برضه فى الترويق و كدة.


ثانيا: خلاص كلتوا و اتبسطوا متقعدش حاطط وشك فى التليفون او فى التلفزيون و تبقى هى قاعدة جمبك وشها فى الموبايل برضه لا انت تسالها تحب هى تتفرج على فيلم ايه بليل و نزل الفيلم و ظبط القعدة و هات كيسين شيبسى كدة او قلها هى تعمل الفيشار و انت تظبط الفيلم و اقعدوا اتفرجوا و انتوا مع بعض و يا ريت تعملهالها مفاجأة مثلا باول فيلم شفتوه مع بعض مثلا حسسها انك مش ناسى حاجة ممكن تكون هى نسياها.


ثالثا: عود نفسك دايما على شكرها على كل كبيرة و صغيرة و "تسلم ايدك" على كل اكلة او حتى لو جابتلك مياة برضه تشكرها هى بتعمل دة عشان خاطر ربنا و عشان خاطرك فا متحسسهاش انها شغالة عندك او انك بتمن عليها بقعدتك الكريمة معاها.


رابعا: حاول تعملها مفاجأة كل حبة كدة مش لازم تبقى غالية او مكلفة او فيها مجهود لكن ممكن مثلا وردة واحدة كدة او شوكولاتاية واحدة برضه مش بالكم صدقنى هو بالكيف انت ازاى تحسسها انها على طول فى دماغك و مش ناسيها خالص.


خامسا: فى يوم كدة حاول تسرب العيال و تقولها تتشيك كدة و تلس انت كمان شيك كدة و تروحوا تسهروا برة فى مطعم حلو كدة من اللى هي بتحبهم او حاجة جديدة بس حلوة و رومانسية و بعد كدة ترجعوا البيت و انت المفروض انك عارف الباقى و تبقى تاخد العيال بعدين.

nik-shuliahin-251237-1-.jpg


سادسا: لو انتوا لسة مخلفتوش خدها الملاهى و عاملها على انها طفلة بس مش تستعيلها لا يعنى دللها و دلعها و خليها تتبسط و تغير جو و تفرفشوا انتوا الاتنين و على فكرة الملاهى ملهاش سن و مش بتاعة عيال زى ما الناس فاهمة.


سابعا: ممكن تحجزلها فى spa مثلا و تخليها تفك شوية عن نفسها و فى بعض الفنادق بيبقى فيها باكدج للازواج و بيبقى رومانسي جدا و صدقنى هتفكوا انتوا الاتنين من التوتر اللى حواليكم.


ثامنا: استاذن من الشغل بدرى و هات غدا قبل هى ما تعمل غدا و ريحها يوم.


تاسعا: لما تجيب لها هدية حاول تبعد عن الحاجات اللى هي بتستخدمها عشان تعملكوا انتوا حاجة يعنى مش فى عيد ميلادها تجيبلها حلل مثلا لا تجيبلها حاجة خاصة بيها هى مفيش حد هيستخدمها غيرها هى مش كل واحد يدخل المطبخ يستخدمها.


عاشرا و اخيرا: لازم تعرف ان انتوا الاتنين عصب بعض و بتتسندوا على بعض و زى ما انت سندها هى كمان سندك و حاولوا بقدر الامكان متدخلوش حد ما بينكم نهائى الا لو لا قدر الله الموضوع مدمر و لكن غير كدة لا تدخل حد من عندك و لا حد من عندها انتوا مش صغيرين عشان كل واحد

يجيب ولى امره انتوا مسؤولين بما فيه الكفاية ان انتوا اتجوزتوا فا حافظوا على سرية حياتكم الشخصية و مش كل حاجة تحصل تحكوها حلو او وحش صدقونى الموضوع دة اهم عنصر فى المقالة كلها بيوت كتير اتخربت بسبب تدخل المحيطين فبعضهم غيران و بعضهم مش هيغلط الطرف الخاص بيه و هتوصل للطريق المسدود فا بلاش من الاول احسن.
اتمنى تكونوا استفدتوا من الكلام الى فوق دة و اتمنى مكونش تقلت عليكم فى الكلام و ربنا يهديكم جميعا للافضل.


شارك هذا المقال: