هو انتوا مش رجالة برضو ولا إيه ؟!

أحمد صلاح

شوفنا التسريب اللى نزل لفريق تحليل ماتش مصر والبرتغال واللى كان فيه الفاظ خارجه من مجدى عبد الغنى لأحمد حسام وحازم أمام وطبعا الوقت اللى حصل فيه التسريب ده كان " اوف اير "


وشوفنا ردود افعال من معجبينهم كانت منهم اللى مستاء من الالفاظ دى ومنهم اللى بيقول عادى مادام هما كانو برا الهوا يبقى اكيد براحتهم زى اى حد طبيعى وممكن يكون فيه الفاظ ماتعجبشى معجبينهم ..


بس الموقف ده اكيد حصل معاك قبل كدا .. هو فعلا بيحصل كتير فى حياة كل واحد , ممكن تكون قاعد مع زمايلك فى الشغل وتكون واخدين راحتكم فى الكلام وممكن يطلع منكم الفاظ خارجه خالص .. وفجأه واحد فيكم يبص ورا ويكتشف ان فيه زميلتكم بنت معاكم فى الاوضه او كانت معديه بالصدفه وتكتشفوا انها سمعتكم وساعتها بتتمنى ان الارض تتشق وتبلعكم هههههه


ولا ممكن تكون بتشتم فى مديرك وفجأه تلاقيه فى وشك وتقعد تقول لنفسك هو سمع ولا لاء ؟؟!!


طيب المواقف دى بتتصرف فيها ازاى ؟ وايه انسب حل


انسب حل انك ماتحورشى .. يعنى حاول ماتكدبشى او تقول لا ماحصلشى .. وخاصة لو انت متأكد ان اللى قدامك سمعك


ولو حد اتصنت عليك او سجلك ( زى موقف مجدى عبد الغنى ده ) لازم تعرف ان العيب على اللى اتصنت عليك مش فيك ..


وانت طبيعى فى شغلك او فى علاقتك مع بعض الاشخاص اكيد لازم تكون رسمى والناس اللى بتتعامل معاك مش شايفين الوجه الخفى لشخصيتك .. وانت اكيد لما تروح وتنزل مع اصحابك فى القهوة طبيعى ان هيكون فيه الفاظ فى الكلام ماينفعشى تتقال فى اى مكان  .. انت بس كل مشكلتك فى المواقف دى انك بتقول لنفسك انا شكلى ايه قدام الطرف الاخر .. دا انا اكيد سقطت من نظره


ماتلومشى نفسك كتير بس دايما الدرس اللى لازم نتعلمه هنا انك لازم تكون مركز وواخد بالك من الخيانه او من اى حد يتجسس عليك فى اى وقت


شارك هذا المقال: