لو بتعمل الخمس حاجات دول يبقى إنسى الترقية

شيماء عادل

طبعا موضوع الترقية دا من أهم الحاجات إللى بتستناها وبتتعشم بيها كل سنة لأنها ببساطة خطوة مهمة جدا فى حياة أى شخص، خطوة بتنقلك لقدام وتخليك تحس إنك مش هتقضى سنة تانية كاملة فى نفس المنصب وبنفس المرتب والصلاحيات وكمان علشان تحس إنك فعلا شاطر وناجح والدليل على دا إن مديرك معجب بيك وهيرقيك وأهى تبقى شوية فشخرة قدام أهلك وأصحابك برده.

unnamed.jpg

لكن فى شوية تصرفات هتمنعك تحقق حلمك الجميل دا وهتلاقى نفسك لبست فى نفس المكتب يا معلم، تصرفات لو عملتها فى شغلك يبقى إنسى الترقية بكل أشكالها والتصرفات دى معظم المواقع العلمية والدراسات والأبحاث أكدوها علشان كده لازم تاخد بالك وتركز كويس لو حاطط عينك على منصب أكبر.

1- هو فى overtime ؟؟!

unnamed-1-.jpg

أهو السؤال دا فى حد ذاته كارثة، مش كارثة فى إنك بتطلب حقك..لكن كارثة لو بينت إن كله بحسابه ولامؤاخذة.

يعنى إنك تبقى عايز مقابل لأى وقت إضافى هتقعد تخلص فيه شغل مطلوب منك، أو إنك أول ماتيجى الساعة 5 تطلع تجرى علشان محدش يزنقك فى شغل، أو لو إطلب منك تنزل يوم إجازتك مثلا علشان مؤتمر للشركة أو..أو... وخد من دا كتييير.

كل دا طبيعى وكلنا بنتعرضله بس لو أنت مشيت الموضوع بالورقة والقلم والحسابات الزيادة والمقابل المادى هتلاقى مديرك علم عليك من أولها وحطك فى خانة "بتاع الovertime" وطبعا هيكون أسهل حاجة عنده إنه ميطلبش منك حاجة وبالتالى هيشوف أى حد غيرك مستعد "يتنفانى" فى

شغله (قال يعنى الموضوع تفانى) وهيطلب منه ويقرب منه ويحبه وهكذا وصاحبنا التانى هيكون لعبها صح.

2- العصفورة مبتبقاش ملك الغابة

unnamed-2-.jpg

لو فاكر إنك لو بقيت "العصفورة" لمديرك وإنك تكون وكالة أخبار متنقلة بتقوله على كل حاجة بتحصل من وراه وتقوله مين كويس ومين لا وبيتقال عليه إيه وهو مش موجود إن دى حاجة هتكون فى صالحك وهتكون سبب إختياره ليك علشان الترقية، تبقى بتحلم.

فبالرغم من إن دا أغلب المديرين بيكون عايزينه وبيكون عندهم فضول يعرفوا كل حاجة بتحصل من وراهم إلا إنه بيبقى عارف إن الرغى الكتير والنميمة سبب فشل محتمل ممكن يحصل فى الشغل وبالتالى هتكون أنت سبب الفشل دا ومن الآخر هتصغر من نظره فمستحيل تبقى أنت إختياره القادم للترقية.

3- الروتين مبيأكلش عيش

unnamed-3-.jpg

لو أنت شخص روتينى جدا عايش اليوم بيومه معندكش طموح أو مش بتحاول تعمل حاجة لنفسك وللمكان إللى أنت فيه، معندكش أفكار جديدة فى مجال شغلك ممكن تساعد الشركة إنها تبقى أكبر أو تحقق مبيعات أعلى مثلا...

من الآخر يعنى لو أنت بتبقى قاعد زى البطيخة مش فارقة معاك وكل إللى بتعمله إنك تنفذ إللى بيطلب منك وبس فهتفضل طول عمرك يطلب منك وأنت تنفذ وبس لكن عمرك ما أنت إللى هتطلب. أصل بالعقل كده إزاى ممكن تكون عشمان فى مرتب زيادة وأنت أصلا مش بتحاول ولا بتسعى حتى علشان تبين إنك تستحق الزيادة دى..."إعقلوا الكلمة"

4- على بيه مظهر

unnamed.png

لو بتحب المنظرة وماشى تتفشخر على خلق الله إللى فى الشركة فطبعا دا هيخلى علاقتك وحشة بالناس إللى معاك وممكن كمان يبوظ علاقتك بمديرك، ولو أنتوا من الشركات اللذيذة والcool إللى بتحب تعمل إستفتاء على أحسن موظف والكلام دا فطبعا أنت هتكون أبعد ما يكون عن الترقية حتى لو

فعلا أنت شاطر فى شغلك وبتحقق كويس لكن كونك إنك شخص مكروه من زملائك هيبعدك عن الترقية. لأن دراسات كتير أثبتت إن حوالى 40% من الأشخاص إللى بيتبعوا منطق "بحبكوا كلكوا" بتكون فرصهم أكتر فى الترقية.

5- دا مش مكتوب فى ال job description

unnamed-4-.jpg

لو أنت قريب شوية من بتاع الovertime وبتحسبها كويس فى موضوع المهام الوظيفية دا يبقى برده هتزعل

يعنى لما مديرك يطلب منك حاجة هى أصلا مش شغلك أو مش من إختصاصك وأنت ترفض، أو متحبش تساعد أى حد من زمايلك فى حاجة بيعملها مثلا كنوع من المشاركة الوجدانية كل دا هيصب فى غير مصلحتك فى الآخر.

من وجهة نظر أى مدير إنت كده مش شخص helpful ولا عندك روح الفريق والتعاون والعمل الجماعى وكل المصطلحات الأفلاطونية دى وبالتالى مش أنت خالص الشخص إللى هتكون فى باله لحركة الترقيات الجديدة.


شارك هذا المقال: