الوصايا ال 10 في تعليم الانجليزي

أحمد سامي

1-الغرض من تعلم لغة , انك تعرف تتعرف علي ثقافات تانيه سواء في مجال شغلك او حتي حياتك الخاصة , مش المنظرة و الفشخرة .

2- بالتالي لاداعي ان حضرتك تتكلم انجليزي عمال علي بطال في اي موقف خصوصا في الأماكن العامة , انت غالبا جدودك كانوا بيعزقوا في الأرض مش من أحفاد ريتشارد قلب الأسد ولا حاجة.

3-لا داعي برضه انك تخلي ولادك يتكلموا انجليزي و بس في كل موقف اهبل , وتفضل تكلمهم بالانجليزي في الأماكن العامة , الطفل يقدر يتواصل ب 4 لغات في سن صغير عادي من غير ما لغة تأثر ع التانيه , انك تنسيه لغته الأم , ده ياعدم معرفة منك يا قلة أصل و فشخرة كدابة

editing-1756958_960_720.jpg

4- مش عشان تتكلم انجليزي كويس , لازم تتكلم ب لهجة (Accent) , انك تتقن تكوين الجمل و التعبير عن أفكارك و مشاعرك بالكلمات و التعبيرات المناسبة أهم 100 مرة من انك تتكلم ب لهجة كويسة

5-بلاش وحياة أبوك تتريق علي نطق حد في الانجليزي وتقفلوا الناس من اللغة , الايطالي أو الفرنسي لما بيتكلم انجليزي بينطق ب مخارج حروف لغته الأم , فا عادي ان مصري يقول .. اي نييد صام ووطار .. مش عيب ولا كخة , وبالتمرين يقدر يحسن نطقه , ده اذا كان محتاج ده ,بلاش تعقدوا الناس الله يرضي عليكوا عشان أهم خطوة في تعليم اي لغة أنك تتغلب علي خوفك من التعبير عن نفسك باللغة دي قدام الناس !

6-التمرين علي النطق السليم , محتاج تمرين كتير و محتاج أنك تتعلم من حد متخصص في علم الصوتيات .. مش مجرد انك تفضل تسمع من حد أمريكي أو بريطاني أو حتي نطقه كويس .. لازم حد متخصص يفهمك ازاي تحرك لسانك و شفايفك و تستخدم احبالك الصوتيه , ويعرفك الفرق بين طريقة نطق الحرف في لغتك العربية الجميلة و اللغة الانجليزية.. اللهجة (accent) زي اللي بيعزف علي اّلة موسيقية , لما بتتعلم أصولها صح بتحترفها .. مش مجرد تقليد و يبقي صوتك وحش و مبالغ فيه !

correcting-1870721_960_720.jpg

7- المفاجأة بقه أن أكتر حد تتعلم منه انجليزي صح , هو المصري المتخصص في اللغة الانجليزية مش الأمريكاني أو البريطاني , وده لأن المصري المتخصص فاهم أكتر عيوبك في الكلام و النطق لأنه أدري من الأجنبي بثقافتك و لغتك الأم وتعبيراتها و مواقفها, فا يقدر يحلل مشاكلك و يعالجهالك صح عن طريق المقارنة بين الثقافتين , احنا مش بنمسح لغة و نضيف لغة جديدة , احنا بنعرفك الفرق بين طريقة التعبير في اللغتين و نوجهك ازاي تتغلب ع الفروق دي .. بس زي ماقولنا ( متخصص ) مش فتاي , أو لمجرد أنه بيتكلم كويس اعتبر نفسه متخصص و بدأ يدي محاضرات للناس ! ومدرس الانجليزي الشاطر لازم يبقي مثقف في اللغة العربية و مخارج نطقها !

8- المفاجأة الأكبر أنك عشان تتكلم انجليزي كويس , مش لازم تكون بتسمع كويس ! لازم تكون بتنطق كويس .. النطق الصح هو اللي هايخليك تتكلم صح و كمان تسمع أصح .. وده بالنسبة للشخص البالغ الراشد , عشان كده ممارستك ل اللغة مع حد متخصص أفضل بكتير من مجرد الممارسة بالاستماع لشخص بينطق صح لمجرد أني أجنبي !

9- العكس صحيح بقه بالنسبة للطفل , الطفل عقله زي الفلاشه الفاضية كده , لازم اللي يسمعه يبقي نطقه سليم عشان لما يبدأ يحاكي و ينطق اللي بيسمعه , ينطقه بشكل سليم و غير مفتعل .. ولذلك مش الحل ان حضرتك ترمي ولادك في مدرسة أجنبي و خلاص , ده حل جزئي ! الحل أن حضرتك كا أم أو أب تكونوا بتمارسوا معاه اللغة بشكل صح جوا البيت .. لأنه مهما سمع من المدرسة النطق السليم و جه البيت و سمع نطقك .. تطوره هايبقي محدود و في الاّخر هايقلدك عشان بيتأثر بيكي عاطفيا أكتر .

correcting-1351629_960_720.jpg

10- اّخر الوصايا و أهمها .. الانجليزي بيحتاج وقت و ممارسة و صبر . زي اللي عايز يخس بالظبط , سواء بمساعدة حد أو لوحدك , الموضوع مش سهل و مش مستحيل في نفس الوقت .. هو بس محتاج حد عنده الاستعداد في الاستمرارية في التعليم .


شارك هذا المقال: