إيه نظام الـiPhone الجديد؟

عمرو موسى

Apple في آخر تلات سنين من أول 4 iPhone بتعلن عن الموبايل الجديد من سلسة iPhone كل سنة في شهر سبتمبر. المتوقع إن الـiPhone القادم بعد 6 iPhone و Plus 6 iPhone هيتم الإعلان عنه الشهر اللي جاي في المؤتمر السنوي.

بعيدًا عن فيديوهات الـiPhone Concept اللي كله إزاز أو فيه كيبورد ليزر أو هولوجرام أو بيشتغل كبروجيكتور واللي دايمًا بتنزل كل سنة في نفس الوقت والناس بتعمل لها شير علي أساس إن ده الـ iPhone الجديد: 


كل سنة في نفس الفترة بتبدأ تظهر إشاعات كتير قريبة للتصديق عن مواصفات وإمكانيات النسخة القادمة، نقل وتصديق الإشاعة بشكل عام في المجتمع مهتم بالتكنولوجيا بيبقي علي حسب الإشاعة دي جاية منين، فيه بلوجرز وكتاب ومواقع بيعتبروا مصدر موثوق لدرجة إن بقالهم تلات سنين بيجيبوا تقريبًا كل مواصفات الجهاز كاملة قبل المؤتمر وبتطلع صح، لدرجة خليت بعض الناس تتهم Apple إنهم بيقصدوا يسربوا معلومات الجهاز الجديد كنوع من الدعاية

دي معظم الإشاعات اللي ابتدت تظهر مؤخرًا، مجرد توقعات، ممكن تبقى صح وممكن جدًا طبعًا تتطلع غلط، بس الكلام بيدور حوالين إنه: 

نفس التصميم مع تغيير داخلي في المواصفات:

زي أي نسخة فيها حرف s بيبقى نفس تصميم النسخة اللي قبلها من جسم الجهاز وماتريال تصنيعه، نفس الكلام في ال 6s، نفس تصميم الجهاز مع تلات اختلافات كبيرة عن الـiPhone 6 في المواصفات، بروسيسور أسرع A9 2 GB Ram  وكاميرا خلفية 12 ميجابيكسل اللي متوقع يطلع منها أداء أقوي للكاميرا اللي أدائها أصلًا أكتر من مبهر من أول iPhone 5

Force Touch

ميزة الـForce Touch تعتبر أهم ميزة في ال iPhone الجديد اللي متوقع إنها هتحدد بشكل كبير نجاحه وتحقيقه لأرقام البيع المتوقعة ولا لأ، زي ما Apple اعتمدت علي Siri في iPhone 4s واللي كان ساعتها جديد علي الناس فكرته كمساعد شخصي ينفع تتكلم معاه مش مجرد تديله أوامر، بترجع تاني وتعتمد علي ميزة جديدة تمامًا

فكرة  الـForce Touch ببساطة إن الجهاز بيحس بقوة ضغط الصباع علي الشاشة وعلي أساسها بيحدد الأمر اللي هيتنفذ

الميزة دي موجودة بالفعل في Watch Apple وآخر MacBook بس بشكل مختلف شوية وبتركز علي القوائم الجانبية، بس الإشاعات بتقول إنها في الـiPhone هتركز أكتر علي الـShortcuts

المثال اللي الناس بتوصفه عشان تفهم الميزة بتشتغل إزاي هي إن مثلا لو فتحت الـMaps علي الجهاز ودوست علي مكان معين بضغطة أقوي شوية، هيبتدي يديك Directions للمكان ده وده هيوفر عليك خطوتين إنك تختار المكان علي الخريطة بعد كده تختار من الـMenu إنه يديك Directions

أعتقد الميزة دي هتبقى مفيدة جدًا وهتبقي نقلة كبيرة لفكرة التعامل مع الجهاز لأنها هتوفر الكتير من الوقت وهتخلّي التعامل مع الجهاز أسرع لأنه هيحسن فكرة فهم الجهاز للحاجة اللي المستخدم عايز ينفذها بشكل أسرع، ممكن في الأول الناس تاخد شوية وقت على ما تتعود عليه، وبرضة مدى حساسية لشاشة هيكون ليها دور كبير

iPhone 6C

Untitled.jpg

مصدر الصورة: apfeleimer.de

أقل إشاعة ليها متداولة هي إن فيه نسخة تالتة من iPhone وهيا 6c الإشاعة مصدرها بلوجر مشهور بصحة أخباره، لكن علي الجانب الاخر فيه تقارير متسربة بتأكد إن النسخة اللي جاية هتبقى جهازين بس، خصوصًا إن كان فيه أخبار قديمة إن  Apple رافضة فكرة نسخةجديدة من C أو علي الأقل مأجلة الفكرة للسنة الجاية. عمومًا هو مفيش معلومات كتيرة عنه غير إنهم قاموا بزيادة سعة البطارية من 1500 لـ1715 ميلي أمبير، مع حجم الشاشة 4 انش يعني نفس حجم 5c، والتركيز علي السوق الصينية لإنها أكتر بلد حقق فيها 5c مبيعات كبيرة، مفيش أي معلومة ذكرت عن الماتيريال المستخدمة في جسم الجهاز؛ هل هتفضل بلاستيك ولا هيتم تغيرها؟ بس تم ذكر انه هينزل بكذا لون زي الـ5c

أكيد إن فيه إشاعات ومعلومات جديدة ظهرت وأنا قاعد بكتب المقالة دي. علي العموم فاضل أقل من شهر ونعرف Apple مخبيلنا إيه. 


شارك هذا المقال: