رجال لا تعرف الحب .. وترجع تزعل إنك سينجل

شيماء عادل

لو إنت من النوعيات اللى هنحكيلك عنها دى وسينجل على وضعك .. يبقا هتفضل كدة كتير ومتستغربش .. لأن البنات عمرهم مابيحبوا الراجل :

الفتًاى

1.jpg

يعنى إللى يبقى كل كلامه فتى وهرى وملوش تلاتين لازمة. إللى هو يقعد يقولك أصل العصور الملكية أصلها إغريقية والسحلية أصلا قرد والأتوبيس بيمشى بالهوا، وباريس بقت مشهورة بالسودانى المملح بدل الموضة. الراجل دا بيفتى فى كل كلامه وميقدرش يعيش ساعتين على بعض من غير فتى، سواء بسبب أو من غير على فكرة بس هو كده وبيفضل كده ونادرا ما بنقدر نغيره. والراجل دا بالمناسبة مش بس البنت إللى بتفقسه أول مابتقعد معاه، لأ وكمان كل أصحابه ومعارفه وأى حد يعنى كل إللى هو بيعمله إنه بيخلى شكله وحش أوى قدام الناس ومحدش بيطيق يقعد يسمع منه جملتين اتنين.

سوما العاشق

2.jpg


الخجول الرقيق مرهف الحس فياض المشاعر، الكام صفة دول هم إختصار لسوما العاشق. طيب واحدة واحدة كده، يعنى ليه؟! ليه أى بنت عندها إكتفاء ذاتى من كتر البنات إللى حوليها من أصحابها وإخواتها ومعارفها، تقبل كمان إنها ترتبط بواحد يحسسها إنها قاعدة مع صاحبتها!! نوعية الرجالة دى بيبقوا فاهمين الموضوع غلط، يعنى إنك تحاول تكون شبهها فتكون رقيق زيها أو خجول وبتتكسف تقول إللى جواك أو تكون قاعد وشك فى الأرض، ولما تكونوا خارجين وبتعرفك على ناس تفضل واخد ركن ومكسوف ومش بتتكلم دا غير إهتمامك الفظيع ببشرتك وكم الكريمات إللى بتستخدمها ، كل دا هيؤدى لنتيجة واحدة وهى إنك تفشل فشل ذريع. وأكبر دليل على كده وعلشان أبسطهالك تخيل الموضوع بالعكس، يعنى لو هى حاولت تقلدك وتكون شبهك علشان تقربلك فتحولت لإمرأة مسترجلة..ياترى فى الحالة دى هتكون مبسوط وطاير من الفرحة؟! معتقدش.

رئيس مراجيح مولد النبى

3.jpg


ودا الإنسان المغرور المتكبر والمنفوش على الفاضى وإللى شوية هوا كفيلة إنها تطيره. والراجل دا كمان بيبان من أول قعدة، علشان كلامه الكتير عن نفسه بيكشفه، يعنى بيبدأها بإنه سليل عيلة كذا وإللى بترجع أوصلها للعايلة المالكة فى بريطانيا وطبعا كمل تعليمه فى هارفرد ومعاه شهادة ال HSBC، وكل هدومه جاية من باريس وبيقضى الويك إند فى المالديف، وحضر فرح إبن عمدة سملوط وكان قاعد مع صفوت باشا وكاظم باشا بيتكلموا فى مصير الطاقة الذرية، وطبعا المدير فى الشغل ميقدرش يستغنى عنه ولا يعمل حاجة من غيره إلخ إلخ... بس الناس دى بتبقى fake بزيادة آآآه والله بزيادة لأن الناس مش هبلة وكل إللى حواليك عارفينك كويس فملهاش لازمة الرسمة دى عليهم وخصوصا كمان على البنت إللى بتحاول ترتبط بيها. لأن حتى لو هى قبلتك وانا أشك فى دا، فمستحيل أهلها يقبلوك. وكمان لازم تعرف حاجة وهى قاعدة ثابتة البنى أدم الكبير دا بيكون كبير بتواضعه وتصرفاته الكويسة إللى بتحبب اى حد فيه، لكن المغرور حتى لو كان فعلا غنى غناء فاحش أو عاش طول عمره بره مصر محدش ممكن يحترمه أو يقدره طول ماهو منفوش على الخلق كدا.

أنا مش عارفني

4.jpg


إللى هو على طول متقمص شخصية حد تانى. يعنى يحسسها إنه صايع أووى ولافف وداير وجايبها من الآخر، وهو أصلا
ابعد مكان راحه لوحده القهوة إللى فى أول الشارع وبيخاف من خياله. أو يكون ملوش فى الإنجليزى ومش مثقف أووى يعنى ويقضيها بقى نوعية جبتلك قادوو، ونقعد فى القافيه، ودا يبقى ماى بيست فريندز "واخد بالك من فريندز دى" بيجمعه على سبيل العظمة وغير كدا كتير. النوعية دى بنوجه ليها كلمتين أولا مفيش أحلى واحسن من إنك تكون على طبيعتك حتى لو كان فيك عيب أو نقص فى حاجة معينة دا مش هيعيبك لأن مفيش حد فينا كامل، ولو الموضوع مضايقك أنت شخصيا يبقى حاول تصلحه، يعنى تاخد كورسات فى اللغات، تقرا كتير وتابع أخبار علشان تكون مثقف، المهم إنك متكدبش فى حقيقتك لأن مهما طالت مدة الكدب وسبكتها أووى هيجى وقت وهتبان على حقيقتك وهيبان وشك الحقيقى، وهنا بقى نوجه الكلمة التانية إنك كدا كدا هتخسرها لما تعرفك على حقيقتك وتكتشف إنها كانت بتحب واحد تانى.


شارك هذا المقال: