تفسير الأسطورة الذكورية لـ "چيمس بوند"

فريق راجل. دوت كوم

جميس بوند شخصية خيالية لجاسوس بريطاني خلقها "إيان فليمنج" سنة ١٩٥٣ وكانت روايات إلى إن ابتدى يتبني عليها سلسلة أفلام سينمائية وصلوا لتلاتة وعشرين فيلم. شخصية جميس بوند تجمع بين البطولة والذكاء والشكل الحلو والقدرة على جذب النساء لحد ما بقى أسطورة ذكورية ومرجع للي المفروض الراجل يكونه…يعني مثلًا: 

السلوك العام:

James-Mannersjpg.jpg

باستثناء المرات اللي بيبقى فيها بيحارب الأعداء، چيمس بوند كان دايمًا "الچنتيل مان" اللي بيعرف يتصرف صح ويتكلم صح وواثق من نفسه كفاية لدرجة تخليه يشد أي واحدة وده لأنه تقيل ومش رغاي ومش بيقول افيهات وحشة وغير لائقة على الموقف ولا بيسكّر طينة ويرجّع في الحفلات وانتو فاهمين الباقي

الشياكة الدائمة:  

James-dress-well.jpg

مفيش مرة شفنا فيها لبس أقل من خطير والمقاسات بالمسطرة سواء في بالليل أو ع البحر. چيمس بوند ما بيلبسش كروكس. طبعًا ضيق الوقت وقلة الفلوس والخلق بيتحكموا في موضوع الشياكة الدائمة، بس خلّي الاستثناء إنك لابس مبهدل مش الاستثناء إنك مُهتم. ممكن تدخل على سيكشن "الموضة" عندنا وهيساعدك تلبس اللي يليق عليك

الثقافة:

james-knowledge.jpg

عارفين إنك غالبًا مش بتحب تقرا.  الصورة الكليشيه للثقافة هي القراية لكن هي المعروفة عمومًا من ضمنها إنك تقرا، وفيه إنك تبقى دريان باللي بيحصل حوااليك، إنك بتعرف تشغّل جهاز أو بتفهم فيهم. إنك بتعرف تسوق عربية أو بتفهم فيهم. إنك تسافر كذا حتة. إن عندك معرفة في حاجات مختلفة مش زي الكرسي.

طريقة أكلك وشربك:

james-eat.jpg

فيه حقيقة متداولة في مجتمعنا عن بعض الرجال وهي إن "اللي بيتحط قدامه، بياكله" والحقيقة بقيت تتقال عادي وتتبلع بل تعتبر ميزة. دي مش ميزة. الرجل المفروض يبقى له ذوق رفيع في الأكل وفي الشرب وله طريقة رايقة في أسلوبه للأكل وللشرب. يعرف يختار إيه هيدخل معدته وفي أي وقت وبأي طريقة. بوند مش هياكل نص حلة محشي ساقعة بالليل وهو واقف خطف!

الاهتمام بالشكل الخارجي: 

james-be-fit.jpg

انت مش ست ومش بتبقى لطيفة خالص لما تقضّى قدام المراية ضعف الوقت اللي بتقضّيه الست ومش لازم خالص تروح مع موجة اللياقة السائدة حاليًا ومطارة الجسم المضبوط بالملّي، بس مش لازم تبعد أوي عن المقاس المظبوط. لا تبقى أرفع جدًا من اللزوم ولا أتخن جدًا من اللزوم..حاول تلعب في الجسم اللائق وانسى حكمة "الراجل ما يعبوش إلا جيبه" دي موروثات خاطئة. خلّي الرياضة في ليستة اليوم. 

مصدر الصور: thegentelmansjournal.com 

 


شارك هذا المقال: