I SCORE ازاى تحمى نفسك منه وايه اضراره عليك‎

أحمد صلاح

تعرف ايه هو " اى سكور I-score" .. لو ماتعرفوش لازم تعرفه دلوقتى عشان ممكن فى يوم من الايام لو عرفته صدفه هاتزعل اوى .. لانك ممكن فى يوم من الايام تحب تروح تاخد قرض من اى بنك وتفتكر ان الموضوع سهل وتلاقى فجأه موظف البنك يقولك مش هتقدر تاخد القرض لان مدرج قوايم سلبيه فى الاى سكور


اى سكور دا هو التصنيف الائتمانى بتاعك وده اللى بيحدده " الشركه المصريه للاستعلام الائتمانى i-score" وده باختصار تاريخك الائتمانى .. يعنى ايه الكلام دا ..


يعنى مثلا لما تحب تروح تاخد قرض البنك اول اجراء بيعمله انه بيبحث بأسمك فى شركه الاى سكور دى ويشوف انت قبل كدا اخدت قروض ولا لا ؟ ولو اخدت قروض هل انت كنت بتسدد الاقساط فى مواعيدها ولا كنت متعثر فى سدادها ..


لان فيه ناس فاكره ان الموضوع سهل انه مثلا يروح ياخد قرض من بنك ويقوم طالع من البنك دا واخد قرض تانى ويقول ان البنك التانى دا مش هيعرف انى واخد قرض اصلا ...


طيب ايه اسباب انك تكون مدرج فى القوايم السلبيه ؟


لو مدرج فى القوايم السلبيه اى سكور دا معناه ان انت تاريخك الائتمانى كان سىء .. وللاسف مش بس ممكن يكون بسبب انك تعثرت فى سداد قرض .. ممكن الموضوع يكون ابسط من كدا وانت مش واخد بالك .. زى مثلا ممكن تكون من فتره مطلع "كريديت كارد , بطاقه مشتريات " ومستخدمتهاش وعليها رسوم اصدار اللى هيا 50 جنيه ولو مادفعتهاش بعد سنه هتلاقى البنك علطول يبعت للاى سكور عشان يحط اسمك فى القوايم السلبيه .. وتقوم انت بعد كام سنه تروح تاخد قرض يقولك اسفين يافندم مش هتقدر تاخد القرض


ليه لازم يكون الاى سكور بتاعك كويس ؟


مش بس عشان يوم ماتروح تاخد قرض .. لا ممكن تروح تقسط حاجه تبع شركه كبيره زى عربيه او اى سلع .. او لو رايح تقدم فى شقق المشروع القومى للاسكان


ازاى تعرف الاى سكور بتاعك ؟


ممكن تروح اى فرع بنك من اللى انت بتتعامل معاهم واطلب منهم هتدفع رسوم 50 جنيه وهيطلعلك تقرير بحالتك

اللى عايزين نقوله انك لازم تاخد بالك لو عندك اى حساب مفتوح فى اى بنك قديم بقاله فتره .. ماتسبوش لازم تروح تشوف عليه رسوم كام وتقفله ولو عندك قرض قديم او اى اقساط لازم تسددها مش كدا وبس لو عندك كمان مديونيه فاتوره موبايل اوعى تكسل عشان ممكن يجى يوم وتلاقى نفسك محروم من انك تاخد اى ائتمان



شارك هذا المقال: