إزاي تشتري خوذة موتوسيكل؟

محمود مصطفي كمال

خلينا نتفق علي حاجة .. أي حاجة أنت مش مغطيها بلبس Safety كويس وأنت راكب الموتوسيكل إعتبر أنك مستغني عنها! وده مش هزار، لأن وأنت راكب العربية عندك رفارف وإكصدامات و Airbags ، وأنت راكب الموتوسيكل عندك جلد وعضم، وصدقني الأبحاث أثبتت أن الأسفلت أخشن من جلد البني أدم، والجاذبية أقوي من مواتير الموتوسيكلات،   يعني أؤكد لك أنك هتزعل جامد لو وقعت من علي الموتوسيكل علي أي سرعة . وأنا عارف أن الخوذة الصغيرة مع قميص من غير كم وسيجارة ونضارة شمس شكلهم كوول جداً .. بس ده طول ما أنت فوق الموتوسيكل بس .

 

طب إيه أهم حاجة في لبس الـ Safety للموتوسيكل؟ أكيد أكتر حاجة مش عايز تستغني عنها هي راسك، فأهم حاجة هي الخوذة، طيب ... إزاي تشتري خوذة؟ ده تقدر تعرفه في العشر نقط دول .

 

١ - الخوذة ليها كذا شكل ، الخوذة اللي بتغطي الوش كله Full face ، والخوذة اللي بتغطي نص الوش، والخوذة اللي بتغطي الجزء الأعلي من الرأس، وفيه تصميمات لخوذات ممكن تقفلها Full face ، أو تفتحها Half face ، تجيب أنهي واحدة؟ أكيد الـ Full face لأنها أكتر واحدة أمان . وفيه أسطورة بتقولك أن السكوتر مش لازم تلبسله Full face لأنه مش بتاع جري يعني .. بس صدقني وأنت بتقع، الأسفلت مش هيسألك " كابتن، أنت واقع من علي سكوتر بيجو فيفا سيتي ولا من علي سوزوكي هايابوسا ! ؟ " ، وكمان الأبحاث أثبتت أن لو وقعت من علي سكوتر وأنت ماشي بسرعة ٧٠ كيلومتر في الساعة، هي هي زي لو وقعت من علي موتوسيكل Racing ماشي بسرعة ٧٠ كيلومتر في الساعة ! " لا تخرج قبل أن تقول سبحان الله ".

 

٢ - الخوذة ٣ أجزاء، جسم خارجي وحشو داخلي وبطانة، وطبعاً الناس كلها بتحكم علي الخوذة من شكلها من برة، بس الجزء الأهم مش ظاهر وهو الحشو الداخلي، ده اللي بيمتص الصدمة ويمنعها من الوصول للمخ، ممكن تقع من علي الموتوسيكل وراسك تخبط والخوذة تفضل سليمة وزي الفل، بس لو الحشو الداخلي فاسد الخوذة مش هتمنع ذبذبات الخبطة من أنها تتنقل لمخك وممكن لا قدر الله يحصل نزيف داخلي أو إرتجاج .. أو وفاة.

 

٣ - يعني ايه الحشو فاسد؟ ! ما الحشو الداخلي مجهز أنه يمتص عدد معين من الصدمات، وغالباً بيكون صدمة واحدة قوية، عشان كده لما ربنا ينجيك من حادثة، لازم تبوس الخوذة، بس ترميها ! لأنها مبقتش تنفع حتي لو سليمة من بره، وهتلاقي ده في كتالوج الخوذة " اللي مقرتهوش طبعاً " ، وخلي بالك الخوذة ممكن تبوظ لو وقعت من ايدك علي الأرض جامد.

 

٤ - مش أي خوذة تبقي خوذة .. فيه حاجات مضروبة وصيني كتير هي منظر بس ولا بتقدم أي حماية ولا أي حاجة.

 

٥ - إزاي تعرف أن الخوذة اللي عايز تجيبها خوذة فعلاً؟ لازم تكون واخدة شهادة إعتماد يا إما من أمريكا، وده إعتماد إسمه DOT بيكون علي ستيكر في ضهر الخوذة، يا إما بيكون من أوروبا وده إسمه ECE وبيكون متطرز علي حزام الدقن، لو في أي مكان غير غالباًً مضروبة، وإحتياطي لازم تسأل المحل علي إعتماد الخوذة، وتدور علي الموديل علي الانترنت وتتأكد أنه موجود فعلاً ومعتمد وبيتباع في أمريكا أو في أوروبا .

 

٦ - الخوذة ليها تاريخ صلاحية ، غالباً بيكون ٥ سنين " الخوذة بتاعتي دي بقالها معايا ١٠ سنين .. أنا مبسوط أوي " .. فاكس.

 

٧ - لازم تتأكد أن الخوذة متصممة صح، يعني مثلاً دورة الهوا جواها مريحة، فيه فتحات دخول وخروج للهوا مش دخول بس فا تموت مخنوق " مش هتموت يعني بس هتضايقك وتجبلك صداع "

 

٨ - فيه أسطورة بتقولك الخوذة لازم تكون ضيقة عشان هتوسع . طبعاً مينفعش تعامل الخوذة أكنها أميجو التركي بينور في الضلمة، لو الخوذة ضيقة هتجبلك صداع، والأحسن تكون علي قدك بالضبط، ولما البطانة تاخد علي وشك وتحس إنها وسعت غيّر البطانة.

 

٩ - وزن الخوذة مهم عشان رقبتك متوجعكش ، إلبسها وحس بوزنها أو إقراه في المواصفات، وطبعاً أخف خوذات اللي معمولة من الكاربون فايبر .. وبفلوس كتير " مش لازم كاربون فايبر بس متشتريش خوذة تقيلة بزيادة "

 

١٠ - الخوذة مهمة جداً بس مش لوحدها . . يعني لو سايق الموتوسيكل ولابس خوذة Full face وتي شيرت من غير كم وشورت .. هتعيش .. بس بأنهي عاهة بقى الله أعلم!


شارك هذا المقال: