ستات تتحب: هند صبري

فريق راجل. دوت كوم

في الزمن ده صعب جدًا تلاقي ست تجمع بين الجمال والذكاء والنجاح والقوة، بيقولوا إن الراجل بيهرب من الست اللي من النوع ده، بس ده الراجل اللي أي كلام، بس الراجل الصح تعجبه الست اللي من نوعية "هند صبري"

العلم نور

أكيد شيء مهم إن الواحد يبقى أتعلم اللي بيشتغله لكن دايمًا بيبقى فيه إضافة معينة لما يبقى الفنان أصلًا درس شيء أدبي أو علمي بحت. كأنه فيه ثقافة زايدة على موهبته الفطرية. هند صبري في الأصل حاصلة على ليسانس حقوق من كلية الحقوق التونسية سنة ٢٠٠١، وبعد حتى ما حققت نفسها كممثلة، كملت دراستها وعملت ماچستير في قانون حقوق الملكية الفكرية سنة ٢٠٠٤ وزي ما هي ممثلة عربية، فهي تقدر تمارس المحاماة في تونس. 

الذكاء في الخطوات: 

اختيارات هند صبري في شغلها في منتهى الذكاء. جت من تونس لما إيناس الدغيدي اختارتها لفيلم "مذكرات مراهقة"، الفيلم كعادة أفلام إيناس الدغيدي كان فيه مشاهد متحررة جدًا وده سبب هجوم عليها كوجه جديد. من بعدها، ركزت في اختياراتها وحطت نفسها في الحتة اللي رسمتها وابتدت تشتغل مع مخرجين زي داوود عبد السيد ومحمد خان ويسري نصر الله، ومن هنا أنطلقت ولكن في أي لقاء لها لازم تشكر إيناس الدغيدي على الفرصة الأولى (عندها أصل)

النجاح المهني: 

gayza.jpg

النتيجة الطبيعية للذكاء في الخطوات؛ تعتبر من أكتر الممثلات الشابات العربيات حصولًا على جوائز اللي من ضمنهم أفضل ممثلة عن دورها في فيلم "جنينة الأسماك" من مهرجان روتردام للأفلام العربية في هولندا سنة ٢٠٠٨ وأفضل ممثلة في مهرجان أفلام السلام بهوليوود عن دورها في فيلم "أسماء" وأفضل ممثلة عن دورها في فيلم "الجزيرة" من المهرجان القومي للسينما المصرية سنة ٢٠٠٨ 

الحياة الشخصية:

with-her-husband.jpg

gololy.com

عمومًا، بعيدة كل البعد عن دوشة الأوساط الفنية والخناقات والمعارك وأعياد الميلاد. عاطفيًا، بعد انتهاء علاقتها الرسمية بالمنتج محمد حفظي، قدرت تحافظ على صداقتها به بمنتهى الهدوء والأدب، وأشتغلوا بعدها مع بعض على برنامجها الوحيد "الشقة". بعدها بفترة أتجوزت "أحمد الشريف" وهو مالوش أي علاقة بالفن وكان لها تصريح مرة حكيم جدًا إن مهم ترجع أخر اليوم بيتها تلاقي راجل وزوج مالوش علاقة بمجالها فيوقّفها على أرض الواقع بعيد عن الأضواء. ده غير إنها أم ناجحة لبنتين. 

التصالح مع الشكل: 

with-no-makeup.jpg

elcinema.com

أغلب الستات عندهم مشاكل سطحية وأزمات ثقة مع شكلهم وخصوصًا المشاهير. من فترة، قررت هند صبري إنها تصور نفسها من غير أي ماكياچ في فترة أجازتها، الموضوع عمل ضجة كبيرة لأن رغم إنها حركة تبدو عادية بس هي نادرة جدًا في المجتمع الفني الشرقي. 

الدور الإنساني: 

world-food-program.jpg

lahamag.com

من ٢٠٠٩، بتتعاون مع برنامج الغذاء العالمي التابع للأمم المتحدة وده هدفه رفع الوعي عن مشكلان الجوع في المنطقة العربية وفي ٢٠١٠ تم اخيتارها رسميًا كسفيرة لمكافحة الجوع في برنامج الغذاء العالمي التابع للأمم المتحدة. وبسبب أنشطتها اللي من نوع ده وتفوقها الفني، اختارتها مجلة CEO Middle East سنة ٢٠١٣ ضمن قائمة أقوى ١٠٠ ست عربية. 

ولذلك كله طبعًا هند صبري تدخل في قسم "ستات تتحب" 


شارك هذا المقال: