إزاي تعمل "مش من هنا" بكرة؟

فريق راجل. دوت كوم

من الأفضل لبكرة…إنك تشد الفيشة وحتى ما تتابعش..لو جربت تعمل أي حاجة غير كده، هتلاقي سد منيع في وشك..فبص:

تجنب الدخول أونلاين والتليفزيون

هتلاقي الدنيا متقسمة ٣ فرق: فرقة بتبكي على اللي فات واللي جاي، وفرقة ضد اللي فات وفرحانة باللي جاي، وفرقة بترغي في مواضيع عامة خالص (بس دول نادرين) فأحسن حاجة تعملها هي إنك تتجنب الدخول أونلاين لأن سوشيال ميديا بتبقى زحمة ومش مسلية اليوم ده…وإياك، شوف إياااك! تفتح أي قناة تليفزيونية أيًا كان أتجاهها اليوم ده. أنسي الأختراع ده. يعني مسموح لك ببصة كده على سوشيال ميديا، بس التليفزيون إياك! 

أخرج وأنجز مشاويرك في المنطقة المحيطة بيك

أنزل أتفسح، أدخل سينيما، قابل صاحبتك، كلم صاحبك اللي على طول وراه شغل حتي في الويك آند علشان تتقابلوا، خلص مشاوير زي "ترفي البنطلون" أو تجيب كرافتة جديدة أو تصلح مراية العربية الشمال اللي لبستّك في كل رصيف في مصر، بس علشان ساعات بيبقى فيه تقفيلات طرق بشكلًا ما كده، فخليك في منطقتك…أضمن وأروق وده بخليك مش حاسس بالواقع أكتر. 

روح الچيم

الچيم اللي دفعت اشتراكه سنة وماعتبتهوش ده، يلا، روحه…أو أجري في الشارع…أو مارس أي رياضة كانت واحشاك. 

أرغي مع أمك

أمك اللي بقالك ١٥٠ سنة ما عملتش معاها حوار مدته أكتر من ٥ دقايق وبيبقى غالبًا عن طلب هي نسيت تعملهولك، أعمل لها شاي بلبن دافي وأقعد أرغي معاها ساعتين عن مواضيع كتير ومختلفة ومتفرقة، وحاول تبقى مواضيع فلسفية عن دور المرأة في المجتمع، المواضيع دي بتاخد وقت وبتجيب ضحك مع الأمهات…وإحنا عايزين نشفط وقت ونضحك اليوم ده، لأنك عامل عبيط خالص، هه؟

رتبّ المكتب والدولاب وكده يعني

الكام حاجة كده في بيتك اللي حاططهم في دماغك وعايز تعمل لهم بس مكسل، أعملهم. فضّى أدراج المكتب ووضب الدولاب اللي بقيت تقفله بالشلوت من كتر ما هو مش منظم، وهات حد يصلح سلك الشباك بدل ما الناموس دمر جلدك…كده يعني، هتتسحل ومش هتركز في حاجة

أهم حاجة: كُل فشار

نقي لك فيلم حلو…لأ مش فيلم، نقي بعدد ساعات اليوم…يعني تشغل فيلم ورا فيلم ورا فيلم…وتعمل حوالي ٥ طن فشار…وتلبس تقيل وتقعد بقى تتفرج علي أفلام وتاكل وفشار…وتعمل ميت. 


شارك هذا المقال: