حاجات تعملها تخلى 2018 أحلى من 2017

كيرلُس إدوارد

السنين مجرد ارقام لكن فعلياً مش بتفرق معانا بحاجة, لكنها وقت بيتعد علينا. وعلشان لازم نستغل كل وقتنا في حاجات مفيدة و علشان ديماً الكسل والتباطئ ومشاكل تانية كتير بتأثر علي حياتنا بشكل سلبي من غير ما نحس. السنين وخصوصاً الوقت ده من كل سنة الي بتنتهي فيه السنة القديمة وتبدأ سنة جديدة. بيكون وقت مناسب لناس كتير تفكر هي عملت ايه السنة الي فاتت وحققت ايه وكسبت ايه وخسرت ايه! وبيكون وقت مناسب اكتر انهم يفكروا هيعملوا ايه الفترة الجاية وهيحققوا ايه في السنة الجديدة. مع وعود طبعاً لنفسهم انهم هيكونوا افضل من السنة الي فاتت وانهم هيشتغلوا علي نفسهم.

علشان كدا يا رجالة لازم نتكلم عن صفة مهمة جداً لازم تكون عند كل واحد فينا علشان يقدر يسيطر اكتر علي حياته ويتفوق علي نفسه وعلي الي حواليه ويحقق نجاحات مهمة مش صعب ان اي حد يوصلها لكن مش كتير بيوصلولها علشان اسباب منها الكسل او ضعف الشخصية او عدم الالتزام.

الصفة الي لازم تكون عند كل واحد فينا هي القيادة ابسطها انك تكون مسيطر علي حياتك وشغلك ونفسك. القيادة مش سهلة لكنها في نفس الوقت مش صعبة. القيادة صفة مهمة جداً هي الي خلت ناس كبيرة زي ستيف جوبز والون ماسك يحققوا نجاتهم لانهم كانوا قياديين اكتر من امكانياتهم التقنية. يعني ستيف جوبز كان مثلاً مش بيقوم بكل مهام البرمجة وتجميع الاجهزة لكنه كان قائد وبافكاره قدر يحقق نجاحه وقدر يشغل الناس لحسابه ويساعدوه في تحقيق حلمه.

sky-2996551_960_720.jpg

علشان كدا هناقش معاكم حاجات تقدر تستخدهم في حياتك وتحسن بيهم صفة القيادة في شخصيتك!

الـFeedback

واحدة من الحاجات المهمة جداً وكلنا بننساها او مبنهتمش بيها بسبب "الغرور" محدش بيحب يسمع تقييم الناس له او حتي انه يقيم نفسه.
اسأل نفسك واسأل الناس الي حواليك في الشغل او افراد اسرتك, تقدر تسألهم شخصياً او حتي ببوست علي الفيس بوك وتسالهم, ايه الحاجات الي المفروض تعملها علشان تخليك افضل؟ ، ايه الحاجات الي المفروض تبطل تعملها علشان تبقي احسن؟ ، ازاي احسن من اسلوبي في التعامل مع الناس؟

استخدام الـFeedback

بعد ما اخدت رأي الناس فيك وعرفت من وجهة نظرهم المفروض تعمل ايه ومتعملش ايه وتحسن ايه وايه وجهة نظرهم ابدأ رتب كل الحاجات الي طلبوها منك وشوف هتقدر تنفذ ايه الاول, شوف الافكار الجديدة الي اقترحوها عليك.
في حاجات طبعاً هتبقي صعبة في الاول وحاجات جديدة علي شخصيتك لكن لازم تتقبل التغيير كل فترة ومتثبتش ابداً علي افكار واحدة. الناس الي انت وثقت فيهم واخدت رأيهم اكيد هيكونوا عاوزينك تبقي احسن من الاول.

اعمل خطة لنفسك

notes-514998_960_720.jpg

اكتب قائمة باهدافك للسنة الجديدة والخطط الي ناوي تنفذها. اكتب الحاجات الحلوة الي هتنفذها والعادات الجديدة الي هتكتسبها واكتب الحاجات والعادات السيئة الي هتبطل تعملها.
زي مثلاً ممكن يكون هدفك تروح الجيم السنة دي وصحتك تبقي احسن ( الي هو احصائياً هدف 45% من الناس في العالم كل سنة : D) و في العادات السيئة ممكن تكتب انك هتبطل تدخين مثلاً - لو كنت مدخن -
ومتنساش تكتب اهدافك دي بصيغة الـSmart Goals يعني لازم هدفك يكون محدد وواقعي وتقدر تحققه فعلاً ومربوط بوقت محدد تقدر تقيس بيه حققت هدفك ولا لأ.

شارك تطوراتك

ديماً لو عاوز متنساش حاجة اتكلم عنها. اتكلم مع الناس الي سألتهم قبل كدا واخدت رأيهم, قولهم اخر تطوراتك, حققت قد ايه من اهدافك. عملت ايه جديد واتعلمت ايه وبطلت ايه. قولهم خططك الجديدة وخليهم يشتركوا معاك فيها ويكونوا زي حكم عليك يقدر يوجهك يقولك انت بتحقق الي عاوزه ولا مش ماشي في طريقك صح.
برده لما بتقول للناس علي خططك ده نوعاً ما بيخليك تلتزم بيها علشان لما يجوا يسألوك عليها تاني هتبقي عاوز توريهم انك حققت حاجة ماكنش مجرد كلام وخلاص : D

notes-2208049_960_720.jpg

وسط كل ده متنساش تستمع بحياتك لان الوقت الي بيعدي مش بيرجع تاني, استمتع بحياتك وحاول تحقق اقصي استفادة ممكن من كل يوم علشان اكبر سعادة هتحسها في حياتك لما توصل للي انت عاوزه و تحقق نجاحك. اتمني في السنة الجديدة انها متكونش ابداً زي السنة الي فاتت. و لو السنة الي فاتت كانت حلوة اتمنالكم الي جاية تكون احلي ; )


شارك هذا المقال: