القواعد الستة للإستمتاع بالفسيخ

فريق راجل. دوت كوم


كل سنة وانتو طيبين وكل شم نسيم والفسيخ قالب ريحة بيوتكم .. الموضوع ده لأكيلة الفسيخ بس يعنى الرنجاوية يمتنعون .. علشان تستمتع بالفسيخ لازم تتبع القواعد دى ..

1- من الكيس للأكل
أحسن حاجة فى الفسيخ إنك تاكله وهو لسه مفتوح طازة .. وإوعي تستجيب لأفكار إنك تفتحه من بدرى وتسيبه لحد معاد الغدا فى التلاجة كده لحمه هينشف ويجلد ومش هتستمع بيه.

2- بصل أخضر
البصل الأخضر كما هو معروف أخو الفسيخ التوأم مينفعش فسيخ من غير بصل أخضر ، ولو مفيش بصل أخضر ممكن تاكل معاه البصل العادى بس بشرط تقطعه طرنشات وتنقعه بميه وخل شوية علشان ميبقاش حامي زيادة.

3- إوعي الليمون
أكيلة الفسيخ اللى بجد .. واللي واخدينه عن إقتناع وحب عمرهم مابيحطوا حاجة على الفسيخ خصوصاً الليمون ... معروف إن الليمون حمضيات وده بيخليه يتفاعل مع كل حاجة بيتحط عليها وبيغير طعمها ، الفسيخ فعلاً ريحته وطعمه بيتغيروا مع الليمون ومتفكرش إنك كدة بتحمي نفسك من الميكروبات او حاجة ... إنت رجلك جت خلاص .. فإستمتع .

4- المشروبات بعد مش أثناء
أكبر غلط ممكن تعمله فى حياتك إنك تشرب مشروب غازى أثناء اكلك للفسيخ او اى اكل عموماً.. بس مع الفسيخ اللى ملحه بيكون زياده عن كل حاجة بتاكلها فى الطبيعي لو شربت معاه اي حاجة فيها سودا زى المشروبات الغازية بتتفاعل مع بعضها جوة معدتك وممكن تسببلك مشاكل فى الهضم وفى جدار المعدة...خليك بعد الأكل يهضم أحسن وممكن تحط على كوباية الحاجة الساقعه نص لمونة.

5- ركز على ضوافرك
طبعاً الفسيخ أكتر أكلة ممتعة وقت الأكل إنما بمجرد ماتشبع بتضايق من ريحتك ومن ريحة اللى حواليك وخاصة ريحة إيدك اللى مبتطلعش بسهولة ، الحل الطبيعي اللى بتعمله معظم الناس انها بتدعك ايديها بالليمون علشان يطلع الزفارة .. بس صدقنى مهما عملت كده هتلاقي ريحة والافضل علشان الريحة تروح خالص تحاول وانت بتغسل ايدك تركز على ضزافرك مش على جلد ايدك لأن هى دى اللي بتحتفظ بالريحة لمدة اطول ممكن تغسلها بالليمون وبعد كدة بالصابون كويس جداً واى سائل تاني.

6- الشاي والزبادى
بعد ماتخلص الجريمة .. علشان ماتعاقبش عليها كتير لازم تحبس بكوباية شاي مظبوطة حتى لو مبتحبش الشاي ... الشاي هيفيدك جداً فى موضوع العطش والمية ومش هيخليك محتاج تشرب كتير ، وبعدين مفيش مانع من علبة زبادى صغيرة علشان تسرع الهضم وتريح معدتك ... وبالهنا والشفا


لو كنت أكيل فسيخ ..وعندك حاجة عايز تضيفها للقواعد إكتبهالنا ياللا


شارك هذا المقال: