جوجل ترافيك...مش هتقف في زحمة تاني

عمرو موسى

مش محتاج أكتب مقدمة عن قد إيه إحنا بنعاني من الزحمة في مصر ، خصوصًا لو عايش في القاهرة. يعني أبسط مثال يبين قد إيه الشوارع على طول زحمة إنك لو نزلت من بيتك الساعة 8 الصبح هتحس إن الناس كلها رايحة شغلها بدري. لو نزلت 10 الصبح هتحس إن كل الناس رايحة شغلها متأخر، أما بقى لو نزلت الساعة 12 الضهر هتحس إن الناس كلها مزوغة بدري من شغلها، ولو نزلت الساعة 3 أو 4 أو 5 أو 6 هتحس إن الناس كلها راجعة من شغلها. وطبعا بالليل مصر كلها في الشارع بتعمل أي حاجة. بكل بساطة الشوارع عندنا 24 ساعة زحمة ٧ أيام في الأسبوع صيف أو شتا ومعندناش حاجة اسمها ساعة ذروة. الأسبوع كله ساعة ذروة

المهم، علشان الزحمة مشكلة عالمية مش في مصر بس، وعلشان إحنا بنعاني منها بشكل أكبر من باقي العالم (لأسباب كتير أوي محتاجة مقال تاني) أطلقت جوجل أحدث خدماتها 'جوجل ترافيك' في مصر الإسبوع اللي فات بعد أن تم إطلاقه في 13 مدينة، وبقى ينفع سكان القاهرة يستخدموه عن طريق برنامج 'جوجل مابس' اللي ممكن ينزل علي أي موبايل سواء أندرويد أو لأ بس أهم حاجة يبقى فيه GPS

برنامج 'جوجل مابس' ببساطة معمول عشان يساعدك ماتتوهش، عايز تروح حتة معينة ومش عارف الطريق. أكتب اسم المكان علي 'جوجل مابس' والبرنامج هيديك صورة للطريق علي الخريطة من المكان اللي انت فيه للمكان اللي عايز تروحه: وخطوات تمشي عليها زي تخش يمين كمان قد إيه، تطلع الكوبري ولا تكمل علي طول، تنزل النفق ولا تاخد اليوترن وإلخ...

google-maps.jpg

 au.idigitaltimes.com

مع إضافة خدمة 'جوجل ترافيك' بقى يوضح لك إيه الطرق اللي ماشية وإيه الطرق الزحمة عن طريق الألوان، يعني مثلا المنطقة اللي لونها أخضر دي ماشية تمام، البرتقاني ماشية بالراحة شوية، الأحمر فاتح واقفة، الأحمر غامق واقفة خالص.

خدمة قوية زي 'جوجل ترافيك' ومقدمة من شركة عملاقة زي جوجل هتهدد مستقبل واحد من أنجح البرامج المصرية وهو 'بيقولك'

bey2oulak.jpg

scoopempire.com

 تطبيق زي 'بيقولك' أتشهر جدًا في مصر وبقى عليه أكتر من مليون مُستخدم نشط شهريًا لإنه ساعد في حل مشكلة بنواجها كل يوم وهي زحمة الطرق، وبقى ممكن قبل ما تتحرك من أي حتة تشوف الطرق الزحمة في 'بيقولك' علشان تتجنبها وتدور علي طرق بديلة وفي أقل من 5 سنين بقى موجود في القاهرة وأسكندرية وكمان تم إطلاق منه نسخة عالمية ابتدت تشتغل في السعودية

بس 'جوجل ترافيك' فيه 3 مميزات عن 'بيقولك' تخليه يبقي أولوية إنك تستخدمه في الهروب من الزحمة وهما:

- جوجل مابس سهل جدًا التعامل معاه، بتفتح الـLocation علي موبايلك وبتكتب انت عايز تروح فين وهو بيديك الخريطة والخطوات اللي تمشي وبس كده خلاص، على الجانب الأخر 'بيقولك' مش سهل كده، معظم الناس الكبيرة مش بتفهم Franco أو بتفهمه بالعافية، كمان شكل البرنامج نفسه بتفضل فترة على ما تفهمه وتتعود عليه.

- لو انت مثلًا في مصر الجديدة وعايز تروح التجمع الخامس، هتدخل علي جوجل مابس تكتب المكان اللي عايز تروحه في التجمع، هيبين لك الطريق والطرق البديلة له، وعلي أساس الزحمة تختار عايز تمشي في أنهي واحد، بس لو بتستخدم بيقولك، هتدخل تشوف شارع الثورة زحمة ولا لأ، وطريق السويس زحمة ولا لأ، وإيه نظام الدائري، وإيه أخبار التجمع الخامس من جوا للحتة اللي انت رايحها، وممكن تضطر تقرا تعليقات الناس علشان تعرف مثلًا الطريق زحمة في أنهي مكان بالظبط. ببساطة جوجل مابس أسرع ميت مرة لإنه بيوفر لك كل المعلومات مرة واحدة مش زي بيقولك.

- جوجل مابس بيعتمد علي الـData اللي من مستخدمي الموبايلات الأندرويد في تحديد سرعة الطريق وعلى أساس ده بيتحدد الطريق ده زحمة إلي أي درجة في حين إن 'بيقولك' بيعتمد علي المعلومات اللي الناس بتدخلها يدويًا، يعني إلي حدًا ما أعتقد معلومات 'جوجل مابس' هتكون أدق من 'بيقولك' ومتوفرة معظم الوقت.

في رأيي، لو "بيقولك" ماشتغلتش علي تطوير البرنامج وإضافة مميزات جديدة وحل النقط السلبية دي في وقت قريب شهرتهم هتقل كتير لصالح 'جوجل مابس' وأحدث خدماته 'جوجل ترافيك


شارك هذا المقال: