دليلك علشان تكون " بابا " المثالي

أحمد عصام

لكل اب مستجد او مقبل على مرحلة انه يبقى مسئول عن اطفال..دي شوية حاجات لازم تاخد بالك منها..الكلام ده مش نصايح من اب مجرب بس كلام عن دراسه و جاى من وجهة نظر طفل كبر ولسه فاكر الحاجات الغلط اللي حصلت في تربيته لعلك تتفَاداها:

● الطريق مش بيبدأ من بعد الولاده..الدراسات اثبتت ان الطفل اللي اهله بيتكلموا معاه وهو في بطن مامته بيطلع تفكيره اكبر من سنه ومعدل نموه الفكري بيكون اسرع.


● ابنك هايصدق كل حاجه هاتقولهاله..بالتالي لو قُلت قدامه انه ذكي، شاطر ف الماث، بيتكلم انجليزي كويس جدا، خطه حلو، شيك....الخ، تلقائيا بيبتدي يبقى كده، حتى لو انت مش شايف ده..وده بيبتدي يبان لما يبقى عنده 10-12 سنه بالكتير..ف لو عايز ابنك يطلع كويس ف اي حاجه..بس كرر قدامه انه كويس فيها..ووجهه ليها وسيبه..وادعيلي.


● على النقيض تماما..لو قلت قدامه انه غبي،مبيعرفش يكون صداقات، ضعيف الشخصيه، مهزأ، شكله وحش، مبيعرفش يلبس...الخ، برده هيصدقك حتى لو هو ابدى رفضه..عقله الباطن متخذك مرايته..ف حاول تكون المرايه الصح وماتلوموش على اخطاءك.


● الـReverse Psychology بتنفع..جربها بس مش كتير..عشان الاطفال اذكى من ما تتخيل وممكن يفهموها.


● الطفل بيكون تفكيره الأُسري اللي هايتعامل بيه مع شريك حياته من خلال اللي بيشوفه ف البيت..هايطلع اب مضحي او ام بتصاحب ولادها لو انتوا كده ف البيت..و هايضرب مراته وهي هاتطلع نكديه لو انتوا كده ف البيت.


● لما ابنك يسألك سؤال..متردش عليه..اسأله انت شايف ايه؟ او تفتكر ليه؟ وهكذا..عوده انه يعتمد على نفسه..ووجهه يقدر يجيب المعلومه منين..وسيبه..بس بعد ما تتأكد انه بيجيب المعلومه من مكان مناسب و ملائم لسنه..و لما يسألك سؤال وجودي مش هاتعرف تجاوبه..سيبه يطلعلك اكتر من احتمال واسأله هو مقتنع بإيه..متفرضش عليه رأيك.


● ربيه انه يبقى عنده attitude..الاطفال اللي عندهم attitude بيبقوا حاجه كويسه لما بيكبروا لو قدرتوا تعلموهم يستعملوه ازاي.


● لو لاحظت ميوله لهوايه معينه..ماتستناش..وماتسيبوش هو يكمل معاها لوحده..لو وجهته صح ف الهوايه دي..ممكن تغيرله مستقبله المهني كله للاحسن..احنا ف زمن مختلف عن ابهاتنا..اي حاجه دلوقتي ممكن يتعمل بيها بيزنس..ركز.


● لو لقيته بيحاول يتكلم معاك اديله تركيزك التام لو انت فاضي..و اتكلم معاه كإنه شخص بالغ..لو حس انه مهم هاتزيد ثقته ف نفسه ومش هايخاف يتكلم قصاد الناس او يعبر عن رأيه..ولو مش فاضي..اقطع اللي انت بتعمله لمدة 30 ثانيه وقوله انا مشغول..ممكن تفكرني نتكلم ف الموضوع ده بليل مثلا..او لو بدأ يكتب..اديله ورقه وقلم وخليه يكتب عنده الموضوع اللي عايز يكلمك فيه بعدين عشان يفتكر.


● لو مش مستعد ماديا انك تقدر support الطفل اللي هاتجيبه..ماتخلفش..ابوس ايدك ماتظلموش معاك..العيل مابيجيش برزقه..هو ملوش ذنب انك عايز تنام مع مراتك..واللي يقولك عايزين نفرح بعيالك..بكف ايدك وعلى وشهم عشان دول مش هايدفعولك نكله لما تخلف.


● طبعا مش محتاج احذر من الدلع الزياده..الخوف الزياده..الضرب..الخناق قدام الاطفال او استعمال الصوت العالي ف الكلام لان دي لو مش بديهيات بالنسبالك ف انت لا تصلح تكون اب او ام او غطا بلاعه اصلا.


شارك هذا المقال: