متسافرش تشتغل فى السعودية .. إعقل

أحمد صلاح
شارك هذا المقال:

لو انت زى كل الشباب اللى زهقت من البلد دى وفكرت انك تسافر وتاكل عيش فى حته تانية احب اقولك ابعد عن السعودية دلوقتى أو على الأقل ماتخليهاش من اوليات البلاد الى انته بتفكر تسافر ليها .. ولو مش مصدقنى كلم اصحابك او معارفك الى شغالين هناك دلوقتى وهما هيقلولك الوضع هناك عامل ازاى .. وده قبل ماتسافر وتلاقى نفسك دافع فلوس كتير عشان خاطر العقد والفيزا ومصاريف السفر وخلافه وتلاقى نفسك هناك مش بتقبض !!! مش بقبض ؟؟ ايوة يافندم ممكن ماتقبضشى وممكن تلاقى مرتبك بيتأخر كل شهر وممكن فى النهاية برده تلاقى الشركة بتنهى عقدك ومرجعاك على مصر !!! وده حصل مع ناس فعلا

1.jpg

طيب كل ده بسبب ايه ؟؟ البلد دى اتحسدت واتنق عليه من المصريين ولا ايه ؟

لا السعودية دلوقتى ومن اواخر السنة الى فاتت بدأت بتعانى من ازمة وانكماش اقتصادى ولأول مرة من سنييين كتيرة يكون عندهم عجز فى موازنة الدولة تقريبا 145 مليار ريال سعودى لسنة 2015وده رقم مخيف

unnamed.png

ايه سبب الأزمة ؟؟

سبب الازمة هوعجز الموازنة لان ايرادات السعودية قلت بكتييير عن مصروفاتها عن كل سنه
من المعروف ان اى دولة كل سنه مصروفاتها بتزيد عن السنه الى قبليها ولكن من السنه الى فاتت وبعد قرار دخول السعودية فى حرب اليمن لانها مهدده حدودها الجنوبية من وقتها والسعودية بتدفع فاتورة كبيرة شهرية على الحرب وفى الوقت نفسه ايراداتها قلت بشكل ضخم من النفط لان هوه اكبر مصر للايراد فى ميزانية السعودية والى سعره نزل من 110 دولار للبرميل ل 40 دولار يعنى اكتر من 60%

unnamed.jpg

طيب ده هيأثر عليك ازاى بقه يالى مسافر السعودية ؟؟

مبدأيا كده بعد العجز الكبير ده فيه قرارات تقشفية يعنى ايه ؟ يعنى الدوله هتبدأ توفر فى مصروفاتها وده هيعمل انكماش اقتصادى .. يعنى ايه برده .. تعالى نخدوها واحدة واحده ..
دلوقتى على سبيل المثال كان فيه قرار تقشف بايقاف " للمشروعات البنية التحتية "

يعنى لو فيه شركة مقاولات بعد ماكانت بتنفذ للحكومة 20 مشروع فى السنة دلوقتى هاتنفذ مثلا 5 مشاريع طيب يعنى ايراد الشركة دى هاتقل كتير .. طيب الشركة هاتعمل ايه ؟؟ طبيعى القرار ده هيأثر على الشركة وانها برده هاتوفر مصروفاتها والى اهم عنصر فى مصروفاتها هيا الرواتب .. فبالتالى يا أما هاتقلل الرواتب او مش هاتدفع رواتب لغاية مانته تزهق وتهرب من الشركة او هما هيسرحوك وده شوفناه حصل لمئات المصررين الفترة الى فاتت ..

ده غير ان السعودية قررت ترفع الدعم للمواد البترولية يعنى هتلاقى البنزين والكهرباء والغاز اسعارهم عالية وده يعنى المعيشة هاتبقه غاليه
و زيادة الضرائب على الموظفين الاجانب الى هوه حضرتك ...

unnamed-1-.jpg

على اى حال انا مش بقولك خليك قاعد فى مصر ومصر حلوة والكلام ده .. انا بقولك خد بالك وادرس موضوع السفر قبل ماتدفع فلوس وتضيع القرشين الى معاك وماتقبلش بمرتب قليل هناك لان الموضوع اختلف عن الكام سنة الى فاتو .. وبرده فى بدائل كتير لدول عربية تانية فكر فيها ..