راجل حول العالم.. #1 برلين - ألمانيا

عمرو موسى


كتير من الدول منعرفش عنها حاجة غير الكام جملة اللي الناس سمعتها وبتكررها عنهم من ناحية الثقافة, الناس, والمدن, فيما يسمي بال Stereotype, وده طبعا مش بيبقي دايما صح, بالعكس ده في معظم الأحيان بيبقى غلط لإنه في معظم الأحيان بيبقى مبني علي رأي شخصي.

أنا عمرو كاتب في راجل دوت كوم وبدرس لمدة 6 شهور في برلين, وعشان ألمانيا تعتبر في وسط أوروبا فبيبقي عندي فرصة إني أزور كذا مدينة من كذا بلد في الأجازات, ومن هنا جاتلي فكرة إني أكتب عن كل مدينة بروحها, وإيه اللي مميز في المدن دي, بطريقة عامة علي قد ما أقدر من غير ما أركز علي مواقف شخصية, ونبتدي ببرلين اللي عايش فيها..

resizee.jpg


برلين هي عاصمة ألمانيا وتاني أكبر مدينة في أوروبا, أكتر المدن اللي فيها سكان حوالي 3 ونص مليون شخص, طبعا ده ميجيش حاجة جنب القاهرة بس بالنسبة لأوروبا تعتبر تاني أزحم مدينة بالسكان بعد لندن, بس من العيشة هنا أقدر أقول إن ده يعتبر علي الورق بس, النظام مخلي كل حاجة ماشية مظبوط وعمر ما بتحس بالزحمة, ممكن كل أربع خمس أيام كده تشوف شارع زحمة ولا حاجة في ساعة زوروة, بس عموما قواعد المرور هنا مبتهزرش علي العربيات والمشاة كمان, يعني الناس لازم تعدي الشارع من المكان المخصص لكده ولما الإشارة بتاعتهم تفتح

اللي مكنتش أعرفه وإكتشفته لما جيت هنا إن نسبة كبيرة جدا من الناس اللي عايشة في برلين مش ألمان, من جنسيات كتيرة مختلفة, اللي خلاني أكتشف كده إني دايما في المواصلات بسمع لغات كتير غير الألماني, إنجليزي وأسباني وتركي وعربي, غير إني ممكن في اليوم الواحد أشوف مش اقل من 10 ستات محجبة مثلا,  إبتديت أقرا أكتر عن الموضوع وإكتشفت إن %30 من الناس اللي عايشين هنا مش ألمان, معظمهم طلاب أو ناس في التلاتنيات وشغالين هنا, خصوصا إنها تعتبر عاصمة الشركات الناشئة أو ال Start Ups وده بيخليها واجهة هايلة للشباب

1975.jpg


برلين متعتبرش مدينة سياحية بالدرجة الأولي, فيها أماكن تتزار طبعا وبتبقي مليانة بالسياح, بس معظم الحاجات دي ليها علاقة بالحرب العالمية التانية عشان المدينة تعتبر إتبنت من أول وجديد بعد الحرب يعني من حوالي 80 سنة بس

بس فكرة إن فيها جنسيات كتير ده مخليها حاجة كده زي ما تقول ملتقي ثقافات وتحس إن الألمان اللي عايشين هنا نفسهم إتأثروا بالثقافات التانية, الموضوع ده حلو أوي عشان مخلي كل مكان ليه شكل وجو مختلف, كل يوم هتلاقي حاجة جديدة تعملها وحتة جديدة تروحها, صعب تزهق, عشان كده هيا تعتبر بالنسبالي واجهة حياة مثالية

berlin.jpg


لو حد عنده أسئلة, استفسارات, اقتراحات أو حاجات تانية عايزني أبقي أركز في الكلام عليها في المدن التانية ممكن يبعتلنا علي راجل, ولصور أكتر ممكن تعملي فولو علي إنستاجرام
 @TheMouu


شارك هذا المقال: